II Kôrintô 3 - Nau Brah Ndu Ngơi 2023

Nau pah kan bơh nau tâm rnglăp mhe jêh ri nau pah kan bơh nau tâm rnglăp ơm

¹ Di hĕ hên ntơm plơ̆ tâm rnê êng ma hên nơm? Mâu lah nâm bu phung êng, hên ŭch geh samƀŭt nkoch lor đah khân may, mâu lah samƀŭt khân may nkoch lor đah hên ƀơh?

² Khân may yơh jêng samƀŭt nkoch lor ma hên, nchih jêh tâm nuih n'hâm hên, lĕ rngôch bunuyh gĭt năl jêh ri rŏ.

³ Rah vah ngăn khân may jêng blah samƀŭt bơh Brah Krist, nchih jêh tă bơh nau pah kan hên, mâu di nchih ma dak ôch, ƀiălah ma Brah Huêng Ueh Brah Ndu gŭ rêh mro mrăng; mâu di nchih ta kađar lŭ, ƀiălah nchih ta lĕ kađar nuih n'hâm kon bunuyh.

⁴ Tă bơh Brah Krist, hên chroh n'hêl nanê̆ nâm nđĕ đah Brah Ndu.

⁵ Mâu di hên geh nau blau gay mĭn ma hên dơi ƀư du ntil nau ôh, ƀiălah nau blau hên luh bơh Brah Ndu.

⁶ Păng yơh ăn ma hên geh nau blau gay pah kan ma nau tâm rnglăp mhe, mâu di nau tâm rnglăp ma rplay samƀŭt nchih ôh, ƀiălah nau tâm rnglăp tâm Brah Huêng Ueh, yorlah rplay samƀŭt djôt leo nau khĭt, ƀiălah Brah Huêng Ueh ăn nau rêh.

⁷ Yorlah, tơlah nau pah kan djôt leo tât nau khĭt, bu tor kach rplay samƀŭt ta kađar lŭ, ƀiălah hôm tât ma nau chrêk rmah, ƀư ma phung Israel mâu dơi uănh ta muh măt Y-Môis, yor nau ral chrêk rmah, nđâp tơlah nau chrêk rmah nây rgăn ngăch,

⁸ mâm ƀư nau pah kan tă bơh Brah Huêng Ueh mâu mra tât tâm nau chrêk rmah lơn ma nây?

⁹ Yorlah tơlah nau pah kan djôt leo tât nau tâm rmal, ƀiălah hôm geh nau chrêk rmah, pôri nau pah kan djôt leo tât nau sŏng srăng lơ hô geh nau chrêk rmah rlau lơn!

¹⁰ N'hêl nanê̆ ngăn, tâm nau aơ, nau chrêk rmah hŏ tă geh mâu hôm jêng chrêk rmah đŏng ôh tanăp nau chrêk rmah rlau lơn aơ.

¹¹ Yorlah tơlah nau rgăn ngăch hôm geh nau chrêk rmah, pôri nau hôm n'ho ro lơ hô geh nau chrêk rmah lơn!

Bok nkŭm klơ Nau Tâm Rnglăp Ơm

¹² Yor he geh nau kâp gân nâm nđĕ, pôri hên geh nau nănh,

¹³ mâu tâm ban ma Y-Môis ôh, sŏk bok nkŭm lơi muh măt păng nơm gay ma phung Israel mâu saơ nau nglĕ dŭt nau chrêk rmah gơnh nhop.

¹⁴ Ƀiălah nuih n'hâm khân păng ăt jêng dăng, yorlah kŏ tât ta nar aơ, tơlah khân păng rŏ Nau Tâm Rnglăp Ơm, bok nching nây ăt ê hŏ dơi sŏk bơh khân păng; yorlah knŏng tâm Brah Krist, bok nching nây dơi sŏk lơi.

¹⁵ N'hêl nanê̆ ngăn, kŏ tât ta nar aơ, ăp tơ̆ bu tăng rŏ ndrom samƀŭt Y-Môis, bok nching lŏ nkŭm tay nuih n'hâm khân păng.

¹⁶ Ƀiălah dôl du huê bunuyh plơ̆ sĭt ma Kôranh Brah, bok nching nây bu sŏk lơi.

¹⁷ Kôranh Brah jêng Brah Huêng Ueh, moh ntŭk geh Brah Huêng Ueh Kôranh Brah gŭ, ntŭk nây geh nau kon me.

¹⁸ Lĕ rngôch muh măt he mâu nkŭm da dê gay n'gơr uănh nau chrêk rmah Kôranh Brah, dơi tâm rgâl plơ̆ jêng tâm ban ma rup Păng, tă bơh nau chrêk rmah tât ta nau chrêk rmah; yorlah nau aơ luh bơh Kôranh Brah jêng Brah Huêng Ueh.