II Kôrintô 2 - Nau Brah Ndu Ngơi 2023

¹ Pôri, gâp tâm nal mâu plơ̆ chop khâl klach lah khân may rngot rvê ôh.

² Yorlah tơlah gâp ƀư ma khân may rngot rvê, pôri mbu nơm jêng bunuyh ƀư maak ma gâp, tơlah mâu di jêng phung bunuyh gâp hŏ ƀư rngot rvê jêh?

³ Gâp nchih jêh ma khân may kơt nĕ, gay ma nôk gâp hăn chop khâl, gâp mâu mra rngot rvê bơh phung bunuyh di ngăn ƀư ma gâp maak. Yorlah gâp rnơm tâm lĕ rngôch khân may sŏk nau răm maak gâp jêng nau răm maak khân may.

⁴ Nôk nchih jêh ma khân may, nuih n'hâm gâp rngot rvê, ji kruăt rêt jêh ri ma âk dak măt; mâu di gay ƀư ma khân may rngot rvê ôh, ƀiălah gay ma khân may gĭt nau gâp rŏng ma khân may jru ngăn.

Yô̆ an ma bunuyh ƀư tih

⁵ Tơlah du huê ƀư nau rngot rvê, bunuyh nây mâu knŏng ƀư rngot rvê ma gâp ôh, ƀiălah tâm du gưl nĕ dơm — Gâp mâu ngơi rlau keh ôh — hŏ ƀư rngot rvê ma lĕ rngôch khân may.

⁶ Bunuyh nây geh nau tâm rmal bơh âk bunuyh tâm phung khân may kơt nây jêng tŏng jêh.

⁷ Ƀiălah aƀaơ, ueh lơn khân may yô̆ nau tih jêh ri bonh leng bunuyh nây, gay ma bunuyh nây mâu ngâm tâm nau rngot rvê dŭt hâu.

⁸ Pôri, gâp vơl dăn ma khân may mpơl hom nuih n'hâm rŏng ma păng.

⁹ Yor nĕ gâp nchih jêh samƀŭt ma khân may, gay rlong uănh khân may tông bâr tâm lĕ kan mâu lah mâu.

¹⁰ Ƀiălah mbu nơm khân may yô̆ an, gâp yô̆ an lĕ. Tơlah moh ndơ gâp yô̆ an jêh, gâp ƀư pônây yor khân may tanăp Brah Krist,

¹¹ gay lơi ăn Satan dơi đah he, yorlah he gĭt jêh lĕ nau plĕch rlăm păng ŭch ƀư.

N'hôl ƀâu kah Brah Krist

¹² Tơlah gâp tât ta ƀon Trôas gay mbơh nkoch Nau Mhe Mhan Ueh Brah Krist, nđâp tơlah Kôranh Brah pơk mpông jêh ma gâp ta nây,

¹³ ƀiălah gâp mâu đăp rmên yorlah gâp mâu mâp Y-Tit, oh nâu gâp. Yor nây, gâp tâm nkhah phung bunuyh ta nây gay hăn ma n'gor Masêđôn.

¹⁴ Ƀiălah lah ueh ma Brah Ndu, jêng Nơm leo bôk ƀaƀơ ma hên tâm nau hăn tâm groi ndrel ma nau dơi tâm Brah Krist; jêh ri tă bơh hên, Păng ƀư n'hôl ƀâu kah ma nau gĭt rbăng Păng ƀâu lam ntŭk.

¹⁵ Yorlah hên jêng n'hôl ƀâu kah Brah Krist nhhơr ma Brah Ndu, ta nklang phung bunuyh geh nau rklaih jêh ri phung bunuyh geh nau rai yot.

¹⁶ Ma phung bunuyh geh nau rai yot, hên jêng ndơ ƀâu nau khĭt, njŭn leo tât nau khĭt; ma phung bunuyh geh nau tâm rklaih, hên jêng ƀâu nau rêh, njŭn leo tât nau rêh. Mbu nơm jêng bunuyh dơi ƀư lĕ nau aơ?

¹⁷ Yorlah, hên mâu tăch rgâl ma nau ngơi Brah Ndu nâm bu âk bunuyh êng. Ƀiălah jêng bunuyh Brah Ndu njuăl hăn, hên mbơh nkoch ma nuih n'hâm răp jăp tâm Brah Krist, tanăp Brah Ndu.