II Kôrintô 13 - Nau Brah Ndu Ngơi 2023

IV. Rdŭt ( 13:1-13 ) Nau nkah jêh ri nau mbah jô̆ khâl

¹ Aơ jêng tơ̆ rơh pe gâp văch ta khân may. “Lĕ nau mra jêng ngăn tă bơh bar mâu lah pe nuyh mbơh.”

² Tâm nôk khâl khân may rơh bar, gâp hŏ mbơh lor ma phung ƀư tih jêh bơh lor jêh ri ma lĕ rngôch phung êng. Aƀaơ aơ dôl gâp ndŭt măt, gâp mbơh tay ma khân may pô aơ tơlah gâp hăn tât tay đŏng, gâp mâu mra yô̆ an ôh,

³ yorlah khân may dăn du nau mbơh gay gĭt Brah Krist lah bơh bâr mbung gâp. Păng mâu jêng rdja ôh tâm nau gŭ ngao đah khân may, ƀiălah Păng jêng Nơm bêng nau dơi ta nklang khân may.

⁴ Nđâp tơlah bu pâng Păng ta si tâm rkăng tâm nau huơi, ƀiălah Păng dôl rêh ma nau brah Brah Ndu. Hên kơt nây đŏng, nđâp tơlah hên huơi tâm Păng, ƀiălah tâm nau brah Brah Ndu hên mra gŭ rêh đah Păng, gay gŭ ngao ma khân may.

⁵ Rlong uănh ôp sek hom khân may nơm gay uănh gĭt khân may hôm gŭ tâm nau chroh mâu lah mâu! Rlong uănh hom khân may nơm. Khân may mâu gĭt hĕ ma Brah Yêsu Krist gŭ tâm khân may? Klach lah khân may mâu tât keh tâm nal.

⁶ Gâp kâp gân ma khân may gĭt năl pô aơ hên mâu di lah mâu dơi tât keh tâm.

⁷ Ƀiălah gâp mbơh sơm dăn ma Brah Ndu gay ma khân may mâu ƀư du ntil nau tih ôh, mâu di gay ma mpơl hên dơi geh nau di, ƀiălah gay ma khân may dơi ƀư lĕ nau ueh, nđâp tơlah bu uănh hên tâm ban mâu geh tât nau tâm nal.

⁸ Yorlah hên mâu dơi ƀư nau tâm rdâng ma nau ngăn ôh, ƀiălah knŏng ƀư di tĭng nau ngăn.

⁹ Hên răm maak yorlah tơlah hên jêng huơi, khân may jêng ktang. Nau hên mbơh sơm dăn, nây jêng khân may dơi geh tât nau nŭm rĭng.

¹⁰ Yor ri, nôk ndŭt măt, gâp nchih nau aơ gay nôk gâp geh măt, gay gâp mâu ƀư janh nau dơi Kôranh Brah ăn jêh ma gâp, jêng nau dơi gay ndâk njêng khân may, mâu di gay ƀư rai ôh.

¹¹ Nau lôch dŭt, hơi phung oh, răm maak hom, srôih hom gay dơi geh tât nau nŭm rĭng, n'hao hom nuih n'hâm, du ai hom nau mĭn, gŭ rêh đăp mpăn hom, ri mơ Brah Ndu nau rŏng jêh ri nau đăp mpăn mra gŭ ndrel ma khân may.

¹² Ăn khân may tâm khâl ndrăng khân may, ma nau chŭm kloh Lĕ rngôch phung kloh ueh mbah jô̆ khâl khân may.

¹³ Dăn nau yô̆ bơh Brah Yêsu Krist, nau rŏng bơh Brah Ndu, jêh ri nau tâm rnglăp bơh Brah Huêng Ueh gŭ ndrel ma lĕ rngôch khân may!