II Kôrintô 12 - Nau Brah Ndu Ngơi 2023

Nau tâm mpơl ma Y-Pôl

¹ Gâp rnê êng ma gâp nơm, nđâp tơlah mâu geh khlay ôh, ƀiălah gâp đŏng mra ngơi ma nau tâm saơ jêh ri ma nau tâm mpơl bơh Kôranh Brah.

² Gâp gĭt năl du huê bunuyh tâm Brah Krist, geh jât ma puăn năm rlau jêh, bu chông păng hao klơ ndâr trôk rơh pe (mâu lah tâm săk jăn, mâu lah padih săk jăn bunuyh, gâp mâu gĭt, Brah Ndu gĭt).

³ Gâp gĭt ma bunuyh nây (mâu lah tâm săk jăn, mâu lah padih săk jăn bunuyh nây, gâp mâu gĭt, Brah Ndu gĭt)

⁴ bu chông păng tât ta Parađi, ta nây păng tăng lĕ nau mâu dơi mbơh, jêh ri mâu đŏng geh nơm dơi ngơi.

Y-Pôl rnê êng ma lĕ nau rdja păng nơm

⁵ Ma bunuyh nây, gâp mra rnê êng; ƀiălah ma gâp nơm, gâp mâu tâm rnê êng ôh, knŏng tâm rnê êng ma lĕ nau rdja gâp dơm.

⁶ Nđâp tơlah gâp ŭch tâm rnê êng, gâp mâu di jêng bunuyh brŭt moih ôh, yorlah gâp lah nau ngăn. Ƀiălah gâp nkân êng mâu ƀư nau nây ôh, gay lơi ăn geh bunuyh mĭn ueh ma gâp rlau lơn ma lĕ nau khân păng saơ tâm gâp jêh ri tăng bơh gâp.

⁷ Gay mât gâp lơi sưr ma lĕ nau tâm mpơl khlay ngăn nây, du njăr lok tôt jêh tâm nglay săk gâp; du huê nơm mbơh bơh Satan hŏ dong gâp gay lơi ăn gâp sưr rlau.

⁸ Pe tơ̆ gâp mbơh sơm ma Kôranh Brah ƀư ăn păng du ngai đah gâp.

⁹ Ƀiălah Kôranh Brah lah: “Nau yô̆ Gâp bêng tŏng ma may, yorlah nau ktang Gâp plơ̆ jêng nŭm rĭng tâm nau rdja.” Pôri, gâp răm maak rnê êng âk ngăn ma lĕ nau rdja gâp, gay ma nau ktang Brah Krist gŭ tâm gâp.

¹⁰ Yor nây, yor Brah Krist, gâp maak dơn nau rdja, nau suai rak, nau ndĭt trơi, nau bu ƀư mhĭk, nau rêh ni. Yorlah nôk gâp rdja, ta nây gâp jêng ktang.

Nau Y-Pôl rvê

¹¹ Gâp jêng bunuyh brŭt moih! Khân may nchâp gâp kơt nĕ. Di lah ăn khân may tâm rnê ma gâp; yorlah gâp jêng dơm dam, gâp mâu đŏng jê̆ lơn ma phung kôranh oh mon dŭt toyh ri.

¹² Lĕ nau mbên ma du huê kôranh oh mon tâm mpơl jêh ta nklang khân may: Nây jêng nau nsrôih dơn, nau mbên khlay, nau khlay, jêh ri lĕ nau brah.

¹³ Yorlah, gâp mâu ƀư jâk ma khân may, mâm dĭng khân may jê̆ lơn đah ma Phung Ngih Brah Ndu êng? Dăn yô̆ ma gâp ma nau mâu sŏng nây!

¹⁴ Aơ jêng tơ̆ rơh pe gâp rơm ndrăp hăn chop khâl ma khân may; gâp mâu mra ƀư jâk khân may ôh, yorlah gâp mâu joi drăp ndơ khân may ôh, ƀiălah joi khân may yơh. N'hêl nanê̆ ngăn, mâu di phung kon ôh bun prăp drăp ndơ ma mbơ̆ mê̆, ƀiălah mê̆ mbơ̆ bun prăp drăp ndơ ma phung kon.

¹⁵ Gâp maak ngăn dŏng mpŭng moh ndơ gâp geh, suăt lĕ nau dăng ktang yor huêng khân may. Tơlah gâp rŏng ma khân may lơ âk lơn, mâm ƀư khân may rŏng ma gâp lơ hô djê̆?

¹⁶ Gâp yơh mâu mâp ƀư jâk khân may; ƀiălah ăt mĭn ma gâp jêng bunuyh blau plĕch, hŏ dŏng nau kue gay nhŭp khân may.

¹⁷ Pôri mbu nơm gâp dŏng tâm phung bunuyh gâp njuăl văch ma khân may gay ndơm khân may?

¹⁸ Lah ndrĭ gâp ntrôl Y-Tit hăn, jêh ri njuăl du huê oh nâu hăn ndrel ma păng. Y-Tit geh nau mƀruh khân ay mâu? Mâu di hĕ hên hăn ndrel tâm du nuih n'hâm jêh ri ndrel tĭng du trong ƀơh?

¹⁹ Bơh ntơm saơm, khân may mĭn ma hên koh dŏng ma hên nơm tanăp khân may. Hơi phung gâp rŏng ngăn ngên, nây jêng tanăp Brah Ndu jêh ri tâm Brah Krist hên ngơi, lĕ rngôch knŏng gay ndâk njêng khân may.

²⁰ Yorlah gâp klach tơlah gâp tât gâp mâu mra saơ khân may nâm bu gâp kâp gân, bi khân may saơ đŏng gâp mâu di nâm bu khân may ŭch. Gâp klach ta nklang khân may geh nau tâm jin, nau mâu nach, nau duh nuih, nau mbeh, nau ngơi kek, nau nchơt, nau sưr, nau uh ah.

²¹ Gâp klach pô aơ, jêh aơ taơ gâp tât ma khân may, Brah Ndu mra ƀư ăn gâp đit prêng yor ma khân may, jêh ri gâp mra nhĭm ma âk phung ƀư tih jêh bơh lor ƀiălah khân păng mâu ŭch rmal nau tih ma lĕ nau ƀơ̆ ƀơch, nau văng tĭr, nau ƀai khân păng ƀư tih jêh.