II Kôrintô 11 - Nau Brah Ndu Ngơi 2023

Y-Pôl jêh ri phung Kôranh oh mon nklă

¹ Gâp ŭch ma khân may ŭn nuih nau brŭt moih gâp djê̆ lê̆! Di ngăn, ăn khân may ŭn nuih.

² Yorlah khân may, gâp grang đah nau grang bơh Brah Ndu, yorlah gâp ƀư ndrôi jêh khân may ma knŏng du huê sai, tâm mpơl măt khân ay tâm ban du huê bu ur druh kloh ma Brah Krist.

³ Ƀiălah gâp klach, nâm bu bêh dŏng tâm nchră ndơm mƀruh H'Êva, nau mĭn khân may geh đŏng nau mhĭk, roh nau nanê̆ ngăn jêh ri nau kloh rsang đah Brah Krist nâm pônây.

⁴ Yorlah, tơlah bu văch mbơh nkoch ma khân may du huê Brah Yêsu êng ma Brah Yêsu hên mbơh nkoch jêh, mâu lah tơlah khân may sŏk dơn jêh du huêng êng đah Brah Huêng Ueh khân may sŏk dơn jêh, mâu lah tơlah sŏk dơn du nau mhe mhan ueh êng ma Nau Mhe Mhan Ueh khân may sŏk dơn jêh, pôri n'hêl nanê̆ khân may ndrăp gay dơn!

⁵ Gâp mĭn, gâp mâu jêng jê̆ lơn ma phung kôranh oh mon dŭt toyh nây ôh.

⁶ Nau gâp ngơi nđâp lah mâu blau ngơi ueh kđôi, ƀiălah nau gĭt rbăng mâu jê̆ ôh. Gâp hŏ mpơl rah vah jêh nau nây tâm lĕ rngôch nau geh jêh ri ta nklang lĕ rngôch bunuyh.

⁷ Moh nau tih gâp ƀư dôl gâp ntrŭnh dêh rhêt gay n'hao khân may? Mâu lah moh nau tih dôl gâp nhhơr săk jăn gay mbơh nkoch Nau Mhe Mhan Ueh Brah Ndu ma khân may, ƀiălah mâu dăn du ntil ndơ ôh?

⁸ Gâp sŏk jêh bơh Phung Ngih Brah Ndu êng dơn nau nkhôm bơh khân păng gay pah kan ma khân may.

⁹ Tâm mông gŭ ndrel đah khân may, mâp pưt kƀah, gâp mâu mâp ƀư jêr bu ôh, yorlah phung oh nâu gŭ ta n'gor Masêđôn văch sâm ăn jêh lĕ ndơ gâp pưt. Tâm lĕ nau, gâp njrăng mâu ŭch ƀư jêr ma khân may ôh, jêh ri gâp ăt ƀư tâm ban lĕ.

¹⁰ Tâm ban đŏng nau ngăn Brah Krist gŭ jêh tâm gâp, mâu du huê nuyh tâm lĕ n'gor Akai aơ dơi ƀư ma gâp mâu hôm rnê êng ma nau nây.

¹¹ Mâm ƀư kơt nĕ? Yorlah gâp mâu rŏng ma khân may hĕ? Brah Ndu gĭt nau nây!

¹² Ƀiălah nau gâp ƀư, gâp mra ƀư pônây, gay buay lơi nau tâm rlăch tă bơh phung vay joi nau tâm rlăch, pôri mơ bu saơ khân păng jêng tâm ban ma hên.

¹³ Yorlah phung kơt nây jêng kôranh oh mon nklă, phung pah kan ndơm jan lah ƀư jêng tâm ban ma kôranh oh mon Brah Krist.

¹⁴ Nau nây mâu hih rhâl ôh, nđâp ma Satan nơm jan lah njêng tâm ban ma tông mpăr nau ang.

¹⁵ Yor ri, phung oh mon păng nklă jêng oh mon nau sŏng srăng, pôri mâu geh hih rhâl ôh. Nau lôch khân păng mra dơn play mhĭk tĭng nâm kan khân păng hŏ ƀư.

Nau kan jêh ri nau Y-Pôl rêh ni

¹⁶ Gâp rkê̆ch tay, lơi ăn bu mĭn ma gâp nâm bu du huê bunuyh brŭt moih ôh; ƀiălah tơlah khân may mĭn pônây, dơn hom gâp nâm bu du huê bunuyh brŭt moih, gay ma gâp dơi rnê êng djê̆ lê̆.

¹⁷ Nau gâp dôl lah mâu di jêng lĕ nau Kôranh Brah ŭch ma gâp ngơi, ƀiălah ngơi nâm bu du huê brŭt moih bêng nau rnơm tâm rnê êng.

¹⁸ Yorlah geh âk bunuyh rnê êng tĭng nâm nglay săk, gâp đŏng mra rnê êng.

¹⁹ Yorlah khân may kơp ma khân may nơm jêng phung bunuyh blau mĭn, maak nuih n'hâm sŏk dơn phung brŭt moih.

²⁰ Di ngăn, khân may vay sŏk dơn jêh tơlah bu nchâp khân may jêng dĭk, sa rvăn khân may, pit sŏk khân may, mưch rmot mâu lah tap ta muh măt khân may.

²¹ Gâp đit prêng lah nau nây, hên tâm mpơl jêh nau rdja tâm nau nây. Ƀiălah mbu moh janh rnê êng ma lĕ nau, ri mơ ngơi nâm bu du huê rluk mâl, gâp janh đŏng rnê êng ma nau nây.

²² Khân păng jêng phung Hêbrơ ƀơh? Gâp tâm ban đŏng. Khân păng jêng phung Israel ƀơh? Gâp tâm ban lĕ. Khân păng jêng phung kon sau Y-Abraham ƀơh? Gâp tâm ban lĕ.

²³ Khân păng jêng phung oh mon ma Brah Krist ƀơh? — Gâp ngơi nâm bu du huê bunuyh rluk mâl — gâp ueh lơn đah khân păng đŏng! Gâp hŏ pah kan hŏt rgănh âk lơn, gŭ ndrung âk lơn, bu dong âk lơn, âk tơ̆ bơi ma khĭt.

²⁴ Prăm tơ̆ phung Yuđa dong gâp ma mâng rse, ăp tơ̆ pưt du mâng jêng tŏng puăn jât tơ̆;

²⁵ Pe tơ̆ bu dong ma mâng, du tơ̆ bu klŭp ma lŭ, pe tơ̆ ngâm tâm kumpăn, du măng du nar sial khôm rdu tâm dak mƀŭt.

²⁶ Tâm âk nau hăn trong, gâp mâp nau djơh mhĭk ta dak krong, nau djơh mhĭk đah phung ntŭng, nau djơh mhĭk đah phung ƀon lan gâp nơm, nau djơh mhĭk đah phung bu năch, nau djơh mhĭk tâm ƀon toyh, nau djơh mhĭk tâm bri rdah, nau djơh mhĭk ta dak mƀŭt, nau djơh mhĭk đah phung nklă amoh jêng oh nâu,

²⁷ dơn nau hŏt rgănh, âk tơ̆ gâp rngeh măng, ji ngot, ji hir, âk tơ̆ ât sông sa, ji kăt ji go, gŭ săk hưl.

²⁸ Ê lah nkoch lĕ nau êng, ăp nar gâp rvê ma lĕ rngôch Phung Ngih Brah Ndu.

²⁹ Mbu nơm geh nau rdja, dĭng gâp mâu jêng rdja? Mbu nơm geh chêh prah, dĭng nuih n'hâm gâp mâu rngot?

³⁰ Tơlah gâp rnê êng, gâp mra rnê êng ma lĕ nau rdja gâp.

³¹ Brah Ndu, Mbơ̆ ma Kôranh Brah jêng Brah Yêsu, jêng Nơm geh nau tâm rnê n'ho ro, Păng gĭt gâp mâu ngơi mƀruh.

³² Ta ƀon Đamas, kôranh n'gor gŭ tâm dâng hađăch Arêtas ăn bu gak njrăng ƀon Đamas gay ăn bu nhŭp gâp.

³³ Ƀiălah bu ntrŭnh gâp tâm du mlâm bĭ, tă bơh mpông bloh njŏ tĭng mpêr ƀon, jêh ri gâp klaih bơh ti păng.