II Kôrintô 10 - Nau Brah Ndu Ngơi 2023

III. Y-Pôl ngơi n'gang ma nau pah kan kôranh oh mon păng nơm ( 10:1 – 12:21 ) Nau du nuih n'hâm Y-Pôl

¹ Gâp yơh, Y-Pôl, vơh dăn ma khân may ma nau rdơ̆ rbăn jêh ri nau ueh bơh Brah Krist — gâp jêng bunuyh rdơ̆ rbăn tơlah tâm mâp đah khân may, ƀiălah bêng ma nau janh đah khân may tơlah gâp gŭ ngai! —

² Nôk gâp geh măt, dăn khân may lơi dĭng nchâp gâp dŏng nau janh gâp mĭn lah dŏng đah bunuyh mĭn lah hên gŭ ngao tĭng nâm nglay săk.

³ Nđâp tơlah hên rêh gŭ tâm nglay săk, ƀiălah mâu tâm lơh tĭng nglay săk ôh.

⁴ Ndơ tâm lơh hên dŏng mâu di jêng lĕ ndơ tâm lơh bơh nglay săk ôh, ƀiălah jêng nau brah Brah Ndu gay ƀư rlâm lĕ pôih,

⁵ rlâm lơi lĕ nau blau ngơi jêh ri ăp ntil nau sưr tâm rdâng đah nau gĭt rbăng Brah Ndu, jêh ri nchâp lĕ rngôch nau mĭn tông ma Brah Krist.

⁶ Hên rơm ndrăp jêh gay tâm rmal lĕ rngôch bunuyh mâu tông bâr kŏ tât khân may tông bâr da dê.

⁷ Khân may knŏng uănh padih. Tơlah mbu moh mĭn khân păng nơm jêng phung Brah Krist, pôri ăn khân păng mĭn tay hom, tơlah khân păng jêng phung Brah Krist, pôri hên tâm ban lĕ.

⁸ Nđâp tơlah hên tâm rnê ma hên nơm rlau keh djê̆ lê̆ yor nau dơi Kôranh Brah ăn jêh ma hên gay ma n'hao khân may, mâu di gay ma ƀư rai khân may ôh, gâp mâu mra bêk ôh.

⁹ Gâp mâu ŭch bu mĭn gâp nhhu khân may ma samƀŭt gâp ôh.

¹⁰ Yorlah geh bunuyh lah: “Nôk nchih samƀŭt păng ngơi dăng ngăn jêh ri ktang, ƀiălah tơlah geh măt, păng jêng rdơ̆ rbăn jêh ri nau păng ngơi mâu khlay ôh.”

¹¹ Bunuyh ngơi kơt nây gay ăn păng gĭt dôl hên ndŭt kơi, nau tâm samƀŭt tâm ban lĕ, pôri nôk geh măt, hên ƀư đŏng nâm pônây.

¹² Ngăn, hên mâu janh tâm rđĭl hên nơm mâu lah tâm rđĭl hên nơm đah phung n'hao êng ri ôh. Ƀiălah tơlah khân păng sŏk khân păng nơm veh đah khân păng nơm, mâu lah sŏk khân păng nơm gay tâm rđĭl khân păng nơm, ri mơ khân păng pưt nau gĭt mĭn.

¹³ Mpeh ma hên, hên mâu n'hao êng rlau ir, ƀiălah di ma keh Brah Ndu hŏ jao ma hên; tâm nau keh nây geh khân may lĕ.

¹⁴ Yorlah hên mâu ƀư rlau keh hên nơm ôh, nâm bu hên ê hŏ hăn văch ma khân may; ƀiălah ngăn hên jêng bunuyh djôt leo Nau Mhe Mhan Ueh Brah Krist hăn tât ma khân may jêh lor.

¹⁵ Hên mâu rnê êng rlau keh ôh, nâm bu ntĭt rnê êng ma nau kan bunuyh êng ƀư. Ƀiălah hên kâp gân tơlah nau chroh khân may văch ma toyh, nau kan hên ăt mra văch ma toyh tâm khân may, tâm keh hŏ jao ma hên,

¹⁶ kŏ tât hên dơi mbơh nkoch Nau Mhe Mhan Ueh tâm lĕ n'gor ngai lơn, ƀiălah mâu tâm rnê êng ma nau kan tâm ntŭk bunuyh êng hŏ ƀư jêh.

¹⁷ “Ƀiălah mbu nơm tâm rnê êng, tâm rnê hom tâm Kôranh Brah.”

¹⁸ Yorlah mâu di n'hao êng ma păng nơm ôh dĭng bu dơn, ƀiălah jêng nơm Kôranh Brah n'hao.