III Yôhan 1 - Nau Brah Ndu Ngơi 2023

Nau mbah jô̆ khâl

¹ Kôranh bu ranh nchih samƀŭt njuăl ma Y-Gaius, nơm bu rŏng, nơm gâp rŏng tâm nau ngăn.

Nuih n'hâm blau yơk jêh ri nau Y-Gaius blau yô̆

² Hơi nâu gâp rŏng, gâp mbơh sơm gay ma may geh nau chăt jêng tâm lĕ rngôch ndơ, geh nau ktang ma săk jăn, tâm ban đŏng geh nau chăt jêng ma huêng may lĕ.

³ Gâp răm ngăn ngên tơlah ƀaƀă phung oh nâu văch ta aơ mbơh nkoch ma may răp jăp ƀaƀơ tâm nau ngăn, nâm bu may hôm chuat tĭng nau ngăn.

⁴ Mâu geh ôh moh nau ƀư ma gâp răm maak rlau lơn jêng tăng phung kon gâp chuat tĭng nau ngăn.

Nau rnê n'hao Y-Gaius

⁵ Hơi nơm gâp rŏng, may răp jăp ngăn tâm nau kan may ƀư ma phung oh nâu, lor lơn jêng ma phung bu năch.

⁶ Khân may mbơh nkoch jêh ma nuih n'hâm may rŏng tanăp Phung Ngih Brah Ndu. Ŭch ngăn ma may kơl khân păng ăt hăn tâm trong khư ma Brah Ndu jêng ueh ngăn.

⁷ Khân păng luh hăn jêh yorlah amoh Brah Yêsu, jêh ri mâu sŏk dơn moh nau bơh phung padih ôh.

⁸ Yor nây, ăn he kơl phung bunuyh nây, gay ma he plơ̆ jêng phung pah kan ndrel ma khân păng yorlah nau ngăn.

Y-Điôtrep jêh ri Y-Đêmêtrius

⁹ Gâp nchih jêh bar pe rplay samƀŭt njuăl ma Phung Ngih Brah Ndu; ƀiălah Y-Điôtrep, nơm ŭch jêng mrô nguay, mâu dơn hên ôh.

¹⁰ Yor nây, tơlah gâp hăn tât, gâp mra rkê̆ch tay lĕ nau păng ƀư jêh, jêng lĕ nau ƀai mhĭk tâm rdâng đah hên. Nđâp lah kơt nĕ ê hŏ maak nuih n'hâm đŏng, păng lŏ mâu vơt rom phung oh nâu, jêh ri mbu nơm ŭch vơt rom, păng buay bu jêh ri mprơh lơi bơh Phung Ngih Brah Ndu.

¹¹ Hơi nơm gâp rŏng, lơi kơt nau mhĭk ôh, ƀiălah kơt nau ueh. Mbu nơm ƀư nau ueh jêng bunuyh Brah Ndu; ƀiălah mbu nơm ƀư nau mhĭk, mâu mâp saơ Brah Ndu ôh.

¹² Lĕ rngôch mbơh nkoch nau ueh Y-Dêmêtrius da dê, nđâp nau ngăn tâm ban lĕ. Hên mbơh nkoch đŏng ma păng, jêh ri may gĭt nau hên mbơh nkoch jêng nau di ngăn.

Nau mbah jô̆ khâl nglĕ dŭt samƀŭt

¹³ Gâp geh âk nau ŭch nchih ma may, ƀiălah gâp mâu ŭch nchih ma mâng nchih jêh ri dak ôch ma mâng nchih ôh.

¹⁴ Gâp kâp gân tâm mâp đah may gơnh, jêh ri he mra ngơi ndrăng he nơm.

¹⁵ Dăn nau đăp mpăn gŭ ndrel ma may. Phung mĭt jiăng njuăl nau mbah jô̆ khâl đah may. Dăn njuăl nau mbah jô̆ khâl ma phung mĭt jiăng tĭng amoh ăp bunuyh.