ហេឞ្រើ 9 - Nau Brah Ndu Ngơi 2023

Nau yơk mbah tâm neh ntu jêh ri nau yơk mbah ta klơ trôk

¹ Pôri, nau tâm rnglăp tal nguay geh đŏng lĕ nau tâm nal ma nau yơk mbah jêh ri du Ntŭk Kloh Ueh ta neh ntu.

² Yorlah du ngih bok ƀư jêh tâm jrô tal nguay, bu rnha ntŭk kloh ueh geh jâng kađen, sưng jêh ri piăng let nhhơr.

³ Pakơi bok nching tal bar, geh ntŭk bu rnha Ntŭk Dŭt Kloh Ueh,

⁴ ta nây geh nơng ƀư brah mah gay nhhơr ndơ ƀâu kah jêh ri Hip Nau Tâm Rnglăp, mblum ma mah. Tâm hip nây geh du mlâm yăng mah bu dơ mana, mâng jra luh kao Y-Arôn, jêh ri lĕ rlat lŭ bu nchih nau tâm rnglăp.

⁵ Ta klơ Hip Nau Tâm Rnglăp geh phung chêrubim chrêk rmah nkŭm ma ndrŭp nau yô̆. Ƀiălah aƀaơ mâu hôm dơi nkoch bri ăp ntil lĕ ndơ nây.

⁶ Lĕ ndơ nây dăp lor jêh tâm ban pônây, jêh ri ăp nar phung kôranh ƀư brah lăp tâm jrô tal nguay ngih bok gay nkra lĕ nau vay tâm rƀŭn ma nau yơk mbah.

⁷ Ƀiălah tâm jrô tal bar, knŏng kôranh ƀư brah toyh lơn lăp ta nây du tơ̆ du năm, jêh ri djôt leo mham gay nhhơr ndơ ƀư brah chuai nau tih ma păng nơm jêh ri ma phung ƀon lan.

⁸ Brah Huêng Ueh sŏk nau nây gay ntĭm lah ngih bok tal nguay hôm e, pôri trong hăn lăp ta Ntŭk Dŭt Kloh Ueh ê hŏ pơk ôh.

⁹ Nau nây jêng nau tâm ntĭt ma rnôk aƀaơ, tĭng nâm nau nây lĕ ndơ nhhơr jêh ri mpa ƀư brah nhhơr mâu dơi blau ƀư ma nuih n'hâm sŏng nơm yơk mbah geh nau dŭt ueh ngăn,

¹⁰ ƀiălah jêng knŏng tât ma ndơ sông sa, ndơ nhêt jêh ri lĕ nau rƀŭn ƀư kloh êng, jêng lĕ nau vay nchâp nglay săk djôt prăp kŏ tât rnôk nau tâm rgâl.

¹¹ Ƀiălah dôl Brah Krist tât jêh nâm bu du huê kôranh ƀư brah toyh lơn ma lĕ nau ueh pakơi aơ taơ, Păng rgăn jêh ngih bok toyh lơn jêh ri rah vah lơn — mâu di ti bunuyh ƀư ôh, nâm bu ntĭt mâu jêng lĕ ndơ tâm rnôk aơ ôh —

¹² Păng lăp jêh tâm Ntŭk Dŭt Kloh Ueh du tơ̆ rĭng jêh, mâu dŏng ma mham be nkuăng jêh ri kon ndrôk ôh, ƀiălah dŏng ma mham Păng nơm gay djôt leo tât nau tâm chuai n'ho ro ma he.

¹³ Yorlah tơlah mham be nkuăng jêh ri ndrôk nkuăng ndrel ma buh ndrôk me druh bu djrah ta klơ phung ƀơ̆, ƀư kloh ueh ma khân păng gay ma khân păng geh nau ƀư kloh ma nglay săk,

¹⁴ rlau lơn ma nĕ mham Brah Krist, jêng Nơm rnơm Brah Huêng Ueh n'ho ro, nhhơr Păng nơm mâu geh têl khap ma Brah Ndu, mra ƀư kloh nuih n'hâm sŏng khân may bơh kan khĭt, gay pah kan ma Brah Ndu gŭ rêh mro mrăng âk tơ̆ rlau lơn!

¹⁵ Yor ma nau nây, Păng jêng Nơm tâm nklang ma nau tâm rnglăp mhe; tă bơh nĕ, phung bunuyh geh jêh nau kuăl dơi sŏk dơn drăp ndơn n'ho ro ton jêh ma khân păng nơm, yorlah Păng khĭt jêh dơi tâm chuai nau tih khân păng hŏ ƀư tih tâm dâng nau tâm rnglăp tal nguay.

¹⁶ Yorlah ta ntŭk geh nau ntĭnh dăch dŭt, ăn mbơh rah vah bunuyh nchih nau ntĭnh dăch dŭt nây khĭt jêh.

¹⁷ Nau ntĭnh dăch dŭt geh knŏng khlay tât nau khĭt; yorlah tơlah nơm nchih nau ntĭnh dăch dŭt hôm rêh, nau nây mâu geh khlay.

¹⁸ Yor nây, nđâp ma nau tâm rnglăp tal nguay mâu khlay đŏng ôh tơlah mâu geh mham.

¹⁹ Yorlah nôk Y-Môis mbơh lĕ nau vay ntăm tâm nau vay ma phung ƀon lan, păng sŏk mham kon ndrôk jêh ri be nkuăng, ndrel ma dak, rse chăng krăk jêh ri n'gĭng hisôp, păng djrah ta ndrom samƀŭt jêh ri ndrel ma lĕ rngôch ƀon lan

²⁰ jêh ri lah: “Aơ jêng mham nau tâm rnglăp Brah Ndu ntăm nti jêh ma khân may.”

²¹ Jêh ri tâm ban ma nau nây, păng sŏk mham nây djrah ta ngih bok ndrel ma lĕ ndơ dŏng ma nau yơk mbah.

²² Tĭng nâm nau vay, ma lĕ rngôch ndơ ƀư kloh ma mham da dê; mâu nkhŭt mham, mâu geh nau yô̆ an ôh.

²³ Pôri, tơlah lĕ rup ma lĕ ndơ gŭ klơ trôk rnơm lĕ mpa ƀư brah nây gay geh nau ƀư kloh, pôri lĕ ndơ klơ trôk rnơm ma mpa ƀư brah ueh lơn gay geh nau kloh.

²⁴ Yorlah Brah Krist mâu lăp ôh tâm ntŭk kloh ueh bơh ti bunuyh ƀư, jêng rup ntŭk kloh ueh ngăn, ƀiălah Păng lăp jêh ƀon ueh klơ trôk, gay aƀaơ aơ Păng tâm tang he hăn tât tanăp Brah Ndu.

²⁵ Păng mâu đŏng nhhơr Păng nơm âk tơ̆ nâm bu kôranh ƀư brah toyh lơn lăp ăp năm tâm Ntŭk Dŭt Kloh Ueh nhhơr mham mâu di mham păng nơm.

²⁶ Yorlah pônây, bơh ntơm rhăk njêng neh ntu kŏ tât nar aơ, Păng dơn jêh nau rêh ni âk tơ̆. Ƀiălah aƀaơ, Păng tâm mpơl jêh knŏng du tơ̆ rĭng jêh tâm nglĕ dŭt tâm lĕ rnôk rô̆ gay nhhơr Păng nơm ƀư mpa ƀư brah sŏk lơi nau tih.

²⁷ Tĭng nâm bu hŏ nal jêh ma kon bunuyh mra khĭt du tơ̆, jêh nây dơn nau phat dôih.

²⁸ Tâm ban lĕ, Brah Krist nhhơr jêh Păng nơm knŏng du tơ̆, gay lâm lơi nau tih âk bunuyh; Păng mra tâm mpơl tal bar, mâu di gay sŏk lơi nau tih đŏng ôh, ƀiălah gay ăn nau tâm rklaih ma phung gŭ kâp Păng.