ហេឞ្រើ 8 - Nau Brah Ndu Ngơi 2023

Brah Yêsu jêng kôranh ƀư brah toyh lơn

¹ Nau khlay dôl he lah jêng: He geh du huê kôranh ƀư brah toyh lơn dŭt khlay, gŭ jêh mpeh pa ma sưng hađăch Nơm Dŭt Prêh ta klơ trôk,

² jêng bunuyh pah kan tâm ntŭk kloh ueh, jêng ngih bok ngăn, bơh Kôranh Brah ndâk, mâu di bơh bunuyh ôh.

³ Lĕ rngôch kôranh ƀư brah toyh lơn geh nau ndâk jêng gay nhhơr ndơ jêh ri mpa ƀư brah; yor nây, kôranh ƀư brah toyh lơn aơ ŭch geh ndơ nhhơr.

⁴ Tơlah Păng gŭ ta neh ntu aơ, Păng mâu jêng kôranh ƀư brah ôh, yorlah gŭ ta neh ntu aơ geh jêh kôranh ƀư brah nhhơr ndơ tĭng nâm nau vay nti jêh.

⁵ Nau khân păng pah kan jêng rup jêh ri gui ma lĕ nau geh gŭ ta klơ trôk; yorlah tơlah Y-Môis ntơm ƀư ngih bok, Brah Ndu ntĭnh ntăm ma păng pô aơ: “Njrăng hom, ƀư lĕ kan tĭng nâm rup hŏ ntĭm ăn may ta klơ yôk.”

⁶ Ƀiălah aƀaơ Brah Krist sŏk dơn jêh du nau pah kan toyh lơn, yorlah Păng jêng Nơm Tâm Nklang ma nau tâm rnglăp ueh lơn, bơh nau tâm rnglăp nây ndâk jêh ta klơ nau ton ueh lơn.

⁷ Yorlah tơlah nau tâm rnglăp tal nguay ueh ngăn ngên, pôri mâu hôm ŭch geh nau tâm rnglăp tal bar.

⁸ Ƀiălah Kôranh Brah nduyh ma phung Israel nôk Păng lah: “Aơ, lĕ nar mra tât, Nôk Gâp mra ƀư nau tâm rnglăp mhe đah ngih Israel jêh ri đah ngih Yuđa,

⁹ Mâu di nâm bu nau tâm rnglăp Gâp ƀư jêh đah phung chô yau khân păng ôh, Tâm nar Gâp kuăn ti khân păng têk njŭn du luh tă bơh n'gor Êjipt. Yorlah khân păng mâu răp jăp djôt prăp nau tâm rnglăp Gâp, Pôri Gâp chalơi khân păng,” Kôranh Brah lah pônây:

¹⁰ Kôranh Brah lah: “Aơ jêng nau tâm rnglăp Gâp mra ƀư ma ngih Israel: Pakơi lĕ nar nây, Gâp mra dơm nau vay Gâp tâm nau mĭn khân păng, Jêh ri nchih prăp tâm nuih n'hâm khân păng. Gâp mra jêng Brah Ndu khân păng, Jêh ri khân păng mra jêng phung ƀon lan Gâp.

¹¹ Khân păng mâu mra sâm nti ôh ma bunuyh chiau meng Jêh ri phung oh nâu khân păng nơm pô aơ: ‘Gĭt năl hom Kôranh Brah.’ Yorlah lĕ rngôch mra gĭt năl Gâp da dê, Ntơm bơh nơm jê̆ lơn tât ma nơm toyh lơn.

¹² Yorlah Gâp mra mpơl nuih n'hâm yô̆ nđach đah nau djơh mhĭk khân păng, Jêh ri Gâp mâu hôm kah gĭt ôh ma nau tih khân păng đŏng.”

¹³ Dôl ngơi jêng nau tâm rnglăp mhe, Păng kơp jêh nau tâm rnglăp lor jêng ơm; moh ndơ jêng ơm jêh, ranh jêh mra rai yot yơh.