ហេឞ្រើ 7 - Nau Brah Ndu Ngơi 2023

Brah Yêsu jêh ri Y-Mêlkisedek

¹ Y-Mêlkisedek jêng hađăch ƀon Salem, kôranh ƀư brah ma Brah Ndu Dŭt Prêh, hŏ ran tâm mâp jêh ri ăn nau ueh uĭn ma Y-Abraham, tơlah păng sĭt tă bơh nau dơi tâm lơh đah phung hađăch.

² Y-Abraham sŏk jêh du kô̆ tâm jât bơh lĕ rngôch drăp ndơ păng nơm geh gay nhhơr ma hađăch. Amoh hađăch nây, lor lơn geh ntĭt jêng “hađăch nau sŏng srăng”, jêh ri ăt jêng hađăch ma ƀon Salem, nâm bu ntĭt “hađăch nau đăp mpăn”.

³ Păng mâu geh mbơ̆, mâu geh mê̆, mâu geh noi deh, mâu geh nar deh, mâu đŏng geh nar khĭt, ƀiălah nâm bu Kon Brah Ndu, jêng kôranh ƀư brah n'ho ro.

⁴ Rlong uănh hom, chô yau Y-Abraham yơh sŏk jêh du kô̆ tâm jât ndơ păng pit sŏk tă bơh tâm lơh gay nhhơr ăn ma hađăch, pôri hađăch nây dŭt toyh ngăn!

⁵ Tĭng du nau đă tâm nau vay, phung kon sau Y-Lêvi jêng phung kôranh ƀư brah dơi sŏk dơn du kô̆ tâm jât bơh phung ƀon lan, nâm bu ntĭt bơh phung oh nâu khân păng, nđâp tơlah khân păng nơm ăt luh tă bơh Y-Abraham da dê.

⁶ Ƀiălah Y-Mêlkisedek mâu luh bơh noi deh Y-Lêvi ôh, sŏk dơn du kô̆ tâm jât bơh Y-Abraham jêh ri ăn nau ueh uĭn ma păng jêng nơm geh jêh nau ton.

⁷ Nơm toyh lơn ăn nau ueh uĭn ma nơm jê̆, nây jêng nau mâu hôm geh nau tâm rlăch ôh.

⁸ Tâm nau geh aơ, phung bunuyh sŏk dơn du kô̆ tâm jât jêng bunuyh nglay săk blau khĭt; tâm nau geh nây, bu mbơh bunuyh nây hôm rêh.

⁹ Bu dơi lah ma Y-Lêvi jêng nơm sŏk dơn du kô̆ tâm jât, ăt nhhơr đŏng du kô̆ tâm jât tâm Y-Abraham,

¹⁰ yorlah tơlah Y-Mêlkisedek hăn tâm mâp đah Y-Abraham, Y-Lêvi ăt hôm gŭ tâm nuih n'hâm chô yau păng.

Nau pah kan kôranh ƀư brah Brah Yêsu Krist toyh lơn ma Y-Arôn

¹¹ Tơlah nau pah kan kôranh ƀư brah ma phung Lêvi năng ai dơi geh nau rah vah ngăn (yorlah bơh nau nây phung ƀon lan sŏk dơn jêh nau vay), mâm ƀư hôm ŭch njêng du huê kôranh ƀư brah êng, tĭng mpôl Mêlkisedek, mâu di tĭng mpôl Y-Arôn?

¹² Nau pah kan kôranh ƀư brah tâm rgâl jêh, pôri nau vay ŭch geh nau tâm rgâl đŏng.

¹³ Yorlah lĕ nau Nơm nây nkoch bri jêng bơh du ndŭl mpôl êng, jêh ri tâm ndŭl mpôl nây ê hŏ geh du huê ôh pah kan ma nơng ƀư brah.

¹⁴ Yorlah nanê̆ Kôranh Brah he luh tă bơh ndŭl mpôl Yuđa, du ndŭl mpôl Y-Môis mâu mâp ngơi ma nau pah kan kôranh ƀư brah ôh.

¹⁵ Nau aơ lơ hô rah vah lơn, tơlah he saơ bu ndâk du huê kôranh ƀư brah êng, tâm ban ma Mêlkisedek,

¹⁶ jêng kôranh ƀư brah mâu di tĭng nâm nau vay bơh kon bunuyh ôh, ƀiălah tĭng nâm nau brah bơh nau rêh mâu blau khĭt.

¹⁷ Yorlah geh nau mbơh nkoch jêh ma Păng pô aơ: “May jêng kôranh ƀư brah n'ho ro, Tĭng mpôl Mêlkisedek.”

¹⁸ Tâm ban pônây, du trong nau vay ntăm ơm bu dơm du đah, yorlah rdja jêh ri mâu khlay ôh

¹⁹ (yor nau vay mâu dơi ƀư ăn moh nau rah vah ôh); lah êng đŏng, geh du nau vay kâp gân ueh lơn, đah nau bu ăn, gay tâm nau nây he dơi hăn dăch Brah Ndu.

²⁰ Nau nây hŏ ƀư nâp jêh ma du nau ton. Phung kôranh ƀư brah êng ndâk jêh ƀiălah mâu geh ma nau ton,

²¹ ƀiălah Brah Yêsu jêng kôranh ƀư brah ndâk jêh ma nau ton, nôk Brah Ndu lah jêh ma Păng pô aơ: “Kôranh Brah ton jêh, jêh ri mâu mra tâm rgâl nau mĭn ôh; May jêng kôranh ƀư brah n'ho ro.”

²² Yorlah tă bơh nau ton nây, Brah Yêsu jêng Nơm mât mray ma du nau tâm rnglăp ueh lơn.

²³ Kăl e phung kôranh ƀư brah âk ngăn, yorlah khân păng blau khĭt, mâu dơi gŭ pah kan mro.

²⁴ Ƀiălah Brah Yêsu djôt prăp nau pah kan kôranh ƀư brah n'ho ro, yorlah Păng gŭ rêh ƀaƀơ n'ho ro.

²⁵ Yor nây lĕ, Păng dơi tâm rklaih ma nau rah vah phung rnơm ma Păng gay hăn dăch Brah Ndu, yorlah Păng gŭ rêh mro mrăng gay mbơh sơm kơl an ma phung nây.

²⁶ N'hêl nanê̆ ngăn, Păng jêng kôranh ƀư brah toyh jêng Nơm he ŭch: kloh ueh, mâu geh nau tih, mâu geh nau ƀơ̆, tâm nkhah jêh đah phung tih, geh nau n'hao prêh rlau lơn ma lĕ ndâr trôk.

²⁷ Păng mâu tâm ban ma phung kôranh ƀư brah toyh êng, Păng mâu hôm nhhơr mpa ƀư brah ăp nar, lor lơn ma nau tih khân păng nơm, jêh ri ma nau tih phung ƀon lan. Păng nhhơr Păng nơm jêng mpa ƀư brah knŏng du tơ̆ rĭng jêh.

²⁸ Yorlah nau vay njêng phung bunuyh rdja jêng kôranh ƀư brah toyh; ƀiălah nau ton geh jêh pakơi ma nau vay njêng Kon, jêng Nơm geh nau rah vah n'ho ro.