ហេឞ្រើ 6 - Nau Brah Ndu Ngơi 2023

Play mhĭk ma nau chalơi chroh

¹ Pôri, ăn he lơi lĕ nau nti nơih ma nau chroh bơh Brah Krist, gay hăn tât nau văch ma toyh; lơi hôm dơm lĕ nau mbon đŏng: nau tâm rmal ma lĕ nau kan khĭt, nau chroh ma Brah Ndu,

² nau ntĭm nti ma lĕ nau ƀư ƀaptem, nau pah ti, nau dâk rêh tay tă bơh nau khĭt jêh ri nau phat dôih n'ho ro.

³ Tơlah Brah Ndu ăn nau dơi, he mra ƀư nau nây.

⁴ Yorlah phung bunuyh geh jêh nau sol ang du tơ̆, mâp chiăm nau ăn tă bơh trôk, geh du kô̆ ma Brah Huêng Ueh,

⁵ mâp chiăm jêh nau ueh tâm nau ngơi Brah Ndu, jêh ri nau brah ma rnôk rô̆ mra tât;

⁶ tơlah khân păng chêh prah jêh, mâu hôm dơi njêng tay gay rmal nau tih, yorlah khân păng pâng kđĭn Kon Brah Ndu du tơ̆ tay đŏng, jêh ri mpơl ƀư bêk prêng Păng.

⁷ Yorlah ntŭk neh bĕ jêh ma dak mih jêh ri geh play do, geh khlay ma nơm jik kai, neh nây dơn nau ueh lăng bơh Brah Ndu.

⁸ Ƀiălah tơlah ntŭk neh knŏng hon lok jêh ri gơ̆ mhĭk, păng mâu geh nau khlay ôh jêh ri geh nau rtăp rak, tât nglĕ dŭt bu su păng tâm ŭnh.

⁹ Ơ phung oh nâu hên rŏng ngăn ngên, nđâp tơlah hên ngơi pônây, ƀiălah hên gĭt nanê̆ ma lĕ nau kan ueh lơn bơh phung oh nâu, jêng lĕ ndơ ndrel ma nau tâm rklaih.

¹⁰ Yorlah Brah Ndu mâu di jêng kue ôh, gay ƀư chuêl nau kan jêh ri nau rŏng khân may tâm mpơl jêh yor ma amoh Păng, nôk pah kan ma phung kloh ueh, jêh ri ăt hôm pah kan đŏng.

¹¹ Ƀiălah hên ŭch ngăn ma ăp nơm khân may tâm mpơl nuih n'hâm duh nđơr tâm ban pônây gay djôt nâp nau kâp gân tât nglĕ dŭt;

¹² kŏ tât khân may mâu ƀlao ôh, ƀiălah tĭng kơt phung yor nau chroh jêh ri ma nuih n'hâm srôih dơn nau ton.

Nau Brah Ndu ton

¹³ Tơlah Brah Ndu ton ma Y-Abraham, Păng mâu dơi ntĭm ma nơm toyh lơn, pôri Păng ntĭm ma Păng sơm ton đah Y-Abraham pô aơ:

¹⁴ “Nanê̆ Gâp mra ăn nau ueh uĭn ma may jêh ri ƀư ma noi deh may bĭk rơ̆ âk râk.”

¹⁵ Y-Abraham srôih gŭ kâp tâm ban pônây, pôri păng sŏk dơn nau Brah Ndu ton jêh.

¹⁶ N'hêl nanê̆ ngăn, phung bunuyh vay sŏk amoh du huê nơm toyh lơn ma khân păng nơm gay ma sân săk, jêh ri lĕ rngôch nau tâm rlăch nglĕ dŭt ma du nau ton gay ma nanê̆ lơn.

¹⁷ Pônây lĕ, Brah Ndu ŭch tâm mpơl rah vah lơn ma phung bunuyh dơn nau ton dơi gĭt nau ŭch mâu geh rgâl ôh bơh Păng, pôri Păng ƀư nâp ma nau ton;

¹⁸ gay ma bar nau nây mâu blau rgâl — bar nau nây Brah Ndu mâu dơi ngơi mƀruh ôh — ma phung he jêng phung bunuyh nchuăt du krap ta Păng, geh nau bonh leng toyh jêh ri djôt nâp nau kâp gân hŏ dơm tanăp măt he nơm.

¹⁹ He djôt prăp nau kâp gân nây nâm bu glo loih nkân ma huêng, dơi nâp, nanê̆ ngăn jêh ri lăp tâm trôm bok nching,

²⁰ jêng ntŭk Brah Yêsu, Nơm Lor Pa Năp, hăn lăp yor ma he, jêh ri jêng kôranh ƀư brah toyh lơn n'ho ro tĭng mpôl Mêlkisedek.