ហេឞ្រើ 5 - Nau Brah Ndu Ngơi 2023

¹ Ăp nơm kôranh ƀư brah toyh geh nau săch jêh bơh kon bunuyh jêh ri geh sâm dơm gay ntrok an ma kon bunuyh pah kan ma Brah Ndu, gay nhhơr ndơ bu nhhơr jêh ri mpa ƀư brah yor nau tih.

² Yorlah păng nơm ăt geh tâm nau rdja nchueng jŭm, yor ri dơi geh nau yô̆ ma phung ngo mbâl, vĭ nhhơt.

³ Yor nau nây, ăn păng nhhơr mpa ƀư brah ma nau tih păng nơm, nâm bu yor nau tih phung ƀon lan lĕ.

⁴ Mâu geh du huê săch êng ma păng nơm kan khlay nây ôh, ƀiălah geh nau kuăl tă bơh Brah Ndu, nâm bu Y-Arôn.

⁵ Pônây lĕ, Brah Krist mâu n'hao êng Păng nơm ôh jêng kôranh ƀư brah toyh, ƀiălah bơh Nơm lah ma Păng pô aơ: “May jêng Kon Gâp, Nar aơ Gâp hŏ deh jêh May.”

⁶ Tâm ntŭk êng, Păng ngơi đŏng, “May jêng du huê kôranh ƀư brah n'ho ro Tĭng mpôl Mêlkisedek.”

⁷ Dôl hôm gŭ rêh tâm nglay săk, Brah Yêsu nter ktang tâm nau mbơh sơm jêh ri vơh vơl bêng dak măt, ma Nơm geh nau dơi tâm rklaih Păng nơm bơh nau khĭt; jêh ri yor nau Păng blau klach yơk, Păng geh nau bu dơn.

⁸ Nđâp tơlah Păng jêng Kon, Păng nti jêh nau tông bâr ma lĕ nau rêh ni Păng dơn jêh;

⁹ jêh ri nôk hŏ lôch jêh, Păng jêng tơm tâm rklaih n'ho ro ma lĕ rngôch bunuyh tông bâr ma Păng,

¹⁰ jêh ri Brah Ndu ăn jêh ma Păng jêng Kôranh ƀư brah toyh tĭng mpôl Mêlkisedek.

Mbơh lor phung ƀlao ma nau chroh

¹¹ Hên geh âk nau ŭch lah ma nau nây, ƀiălah jêr rblang ngăn, yorlah khân may jêng phung băt gĭt rbăng.

¹² Di lah, aƀaơ aơ khân may dơi jêng phung nti jêh, ƀiălah khân may ŭch bu nti ma khân may nau nơih tâm nau ngơi Brah Ndu ma khân may. Khân may ăt hôm nhêt dak toh ntrok ma ndơ sông sa dăng.

¹³ Mbu nơm knŏng nhêt dak toh ê hŏ gĭt rbăng nau ngơi sŏng srăng, yorlah hôm jêng kon se.

¹⁴ Ƀiălah ndơ sông sa dăng prăp ma phung văch ma toyh, jêng ma phung bunuyh bơh nsrôih ƀư tĭng ma nau blau nti ngăn dơi rnglah êng nau ueh jêh ri nau mhĭk.