ហេឞ្រើ 4 - Nau Brah Ndu Ngơi 2023

Nau ton ma nau rlu

¹ Pôri, dôl geh nau ton ăn lăp tâm nau rlu Kôranh Brah ăt hôm nây, ăn he klach hom gay lơi geh du huê tâm phung he mâu geh nau di.

² Yorlah Nau Mhe Mhan Ueh mbơh nkoch ma he jêh, tâm ban ma khân păng lĕ; ƀiălah nau ngơi khân păng tăng jêh mâu geh nau khlay ma khân păng ôh, yorlah tâm nôk gŭ iăt nau nây, khân păng mâu dơn nau nây nđâp ma nau chroh.

³ Bi ma he jêng phung bunuyh chroh jêh, he hăn lăp tâm nau rlu, nâm bu Brah Ndu hŏ lah jêh: “Nâm bu nau Gâp sơm ton jêh tâm nau ji nuih: ‘Khân păng mâu mra hăn lăp tâm nau rlu Gâp ôh!’ ” Nđâp tơlah nau kan Păng hŏ lôch jêh ntơm bơh rhăk njêng neh ntu.

⁴ Yorlah tâm du ntŭk Păng ngơi jêh ma nar rơh pơh, “Nar tal pơh, Brah Ndu rlu lĕ nau kan Păng.”

⁵ Ma nau aơ, Păng lah đŏng: “Khân păng mâu mra hăn lăp tâm nau Gâp rlu ôh.”

⁶ Tâm ban pônây, ăt hôm bunuyh ƀaƀă mra dơi lăp nau rlu nây. Bi phung bunuyh bơh lor hŏ tăng jêh Nau Mhe Mhan Ueh, ƀiălah mâu dơi lăp ta nây yor nau mâu tông bâr.

⁷ Rlau lơn ma nĕ, jêh nau nây jŏ ngăn, tâm du Nau Mprơ Ơm Y-Đavit, Kôranh Brah tâm nal đŏng du nar kuăl jêng “nar aơ,” nâm bu nau nchih lor jêh: “Nar aơ tơlah khân may tăng bâr Păng, Lơi ƀư dăng nuih n'hâm ôh.”

⁸ Yorlah tơlah Y-Yôsuê ăn jêh ma khân păng nau rlu, Brah Ndu mâu hôm ngơi ôh ma nar êng đŏng.

⁹ Pôri ăt hôm du nau rlu nar Saƀat ma phung mpôl băl Brah Ndu.

¹⁰ Yorlah mbu nơm hăn lăp tâm nau rlu Brah Ndu, păng rlu bơh kan păng nơm, nâm bu Brah Ndu rlu jêh bơh kan Păng.

¹¹ Yor nây, ăn he nsrôih hăn lăp tâm nau rlu aơ, gay mâu geh du huê tâm he tŭp yor tĭng nơm leo trong mâu tông bâr.

¹² Yorlah nau ngơi Brah Ndu jêng nau ngơi rêh jêh ri geh nau dơi, hơr lơn ma đao bar măt, lăp băm kŏ tât tâm nglah nuih n'hâm đah huêng, ntŭk nting tâm ntrŭp đah glo, phat dôih lĕ nau mĭn jêh ri nau ŭch tâm nuih n'hâm.

¹³ Mâu geh du ntil ndơ rhăk njêng jêh dơi gŭ ndâp tanăp măt Kôranh Brah, ƀiălah lĕ rngôch ndơ gŭ săk hưl da dê jêh ri tâm mpơl jêh tra năp măt Nơm he mra mbơh nkoch rah vah.

Yêsu Krist jêng kôranh ƀư brah toyh tâm nau tâm rnglăp mhe

¹⁴ Yor nây, yorlah he geh du huê kôranh ƀư brah toyh lơn găn jêh lĕ ndâr trôk jêng Brah Yêsu, Kon Brah Ndu, pôri djôt nâp hom lĕ nau he mbơh.

¹⁵ Yorlah he mâu geh du huê kôranh ƀư brah toyh lơn mâu dơi yô̆ ma nau rdja he, ƀiălah geh jêh du huê kôranh ƀư brah geh nau ndơm tâm lĕ rngôch nau nâm bu he, ƀiălah Păng mâu ƀư tih ôh.

¹⁶ Pôri, ăn he nâp nuih n'hâm hăn dăch ta sưng hađăch nau yô̆, gay ma dơi sŏk dơn nau yô̆ nđach jêh ri saơ nau yô̆ kơl he dôl he geh nau pưt.