ហេឞ្រើ 3 - Nau Brah Ndu Ngơi 2023

Brah Yêsu jêng toyh lơn ma Y-Môis

¹ Yor nây, hơi phung oh nâu kloh ueh, jêng phung bunuyh dơn nau kuăl tă bơh trôk, mĭn rvê hom ma phung mbơh jêh ri kôranh ƀư brah toyh he mbơh jêng Brah Yêsu.

² Păng gŭ răp jăp jêh đah Nơm hŏ ndâk jêh Păng, nâm bu Y-Môis răp jăp tâm ngih Brah Ndu.

³ Ƀiălah Brah Yêsu khư geh nau chrêk rmah lơn ma Y-Môis âk tơ̆, nâm bu nơm ƀư ngih geh nau yơk rlau lơn ngih păng ƀư.

⁴ N'hêl nanê̆ ngăn, ăp ngih geh nơm ndâk njêng păng, ƀiălah Brah Ndu jêng Nơm rhăk njêng lĕ rngôch ndơ.

⁵ Y-Môis gŭ răp jăp jêh tâm ngih Brah Ndu nâm bu du huê oh mon, gay mbơh nkoch ma lĕ nau mra dơi mbơh.

⁶ Ƀiălah Brah Krist gŭ răp jăp tâm ban ma kon bu klâu mât uănh ma ngih Brah Ndu. He jêng ngih ma Păng, knŏng tơlah he djôt nâp nau rnơm nsing jêh ri tâm rnê êng tâm nau he kâp gân kŏ tât nglĕ dŭt.

Nau rlu ma phung ƀon lan Kôranh Brah

⁷ Yor nây, nâm bu Brah Huêng Ueh lah: “Nar aơ tơlah khân may tăng bâr Păng,

⁸ Lơi ăn dăng ôh nuih n'hâm khân may nâm bu nôk tâm rdâng, Tâm nar rlong uănh tâm ntŭk bri rdah,

⁹ Ta ntŭk phung chô yau khân may saơ jêh kan Gâp ƀư tâm puăn jât năm, Hôm ma rlong uănh Gâp!

¹⁰ Pôri, Gâp ji nuih jêh ma phung rnôk nĕ, Jêh ri lah: ‘Nuih n'hâm khân păng vĭ nhhơt mro, Mâu gĭt trong Gâp ôh.’

¹¹ Pôri Gâp sơm ton jêh tâm nau ji nuih: ‘Khân păng mâu mra hăn lăp tâm nau Gâp rlu ôh!’ ”

¹² Hơi phung oh nâu, njrăng hom, klach lah geh nơm tâm phung khân may geh nuih n'hâm mhĭk jêh ri mâu chroh kŏ tât chalơi Brah Ndu rêh.

¹³ Ƀiălah ăn khân may nti nkah hom ndrăng khân may tâm ăp nar, bu dơi lah jêng “nar aơ,” gay mâu geh du huê tâm phung khân may yor nau tih ndơm jêh ri dăng nuih n'hâm.

¹⁴ Yorlah tơlah nuih n'hâm he djôt nâp nau he chroh tâm ntơm saơm kŏ tât nglĕ dŭt, he geh du kô̆ ndrel ma Brah Krist,

¹⁵ tâm ban geh nchih pô aơ: “Nar aơ tơlah khân may tăng bâr Păng, Lơi ăn dăng nuih n'hâm khân may ôh, nâm bu nôk tâm rdâng.”

¹⁶ Mbu nơm jêng phung tăng jêh bâr Păng, ƀư nau tâm rdâng? Mâu di hĕ jêng phung bunuyh Y-Môis njŭn leo luh bơh n'gor Êjipt?

¹⁷ Mbu nơm Brah Ndu ji nuih dôl tâm puăn jât năm? Mâu di hĕ ma phung ƀư tih jêh, jêh ri săk jăn khĭt khân păng prah jêh tâm ntŭk bri rdah?

¹⁸ Mbu đah Păng sơm ton jêh pô aơ khân păng mâu dơi lăp ôh tâm nau rlu Păng? Mâu di hĕ ma phung mâu tông bâr Păng?

¹⁹ Pôri, he saơ khân păng mâu dơi lăp ta nây ôh yor nau mâu chroh.