ហេឞ្រើ 2 - Nau Brah Ndu Ngơi 2023

¹ Yor nây, ăn he rkêng tôr ueh lơn ma nau he tăng jêh, klach lah he mra roh nau nây.

² Yorlah tơlah nau ngơi tông mpăr mbơh nkoch jêng nau nanê̆, jêh ri lĕ nau ƀư tih mâu lah nau mâu tông bâr geh jêh nau plơng bôk di ngăn,

³ mâm ƀư he dơi klaih đah nau tâm rmal tơlah he uănh mâu khlay ma nau tâm rklaih toyh ngăn? Nây jêng nau tâm rklaih Kôranh Brah mbơh jêh ntơm saơm, jêh phung bunuyh tăng jêh mbơh nau nây jêng ngăn ma he.

⁴ Brah Ndu mbơh nkoch đŏng ma nau mbên khlay, nau khlay jêh ri lĕ nau brah nđâp ma lĕ nau dơi ăn bơh Brah Huêng Ueh, pă jêh tĭng nâm Păng ŭch.

Nau tâm rklaih tâm Brah Yêsu Krist

⁵ Ngăn, Brah Ndu mâu dơm neh ntu tâm nar kăndơ̆ dôl he ngơi nây gŭ tâm dâng nau dơi phung tông mpăr.

⁶ Ƀiălah geh du ntŭk tâm Nau Brah Ndu Ngơi mbơh nkoch jêh pô aơ: “Mâm kon bunuyh jêng, kŏ Kôranh Brah kah gĭt ma khân păng? Mâm kon bunuyh jêng, kŏ Kôranh Brah mĭn rvê khân păng?

⁷ Kôranh Brah hŏ dơm Păng dêh lơn phung tông mpăr tâm ƀât lât; Kôranh Brah ndô jêh Păng đon hađăch nau chrêk rmah jêh ri nau yơk,

⁸ Dơm jêh lĕ rngôch ndơ tâm dâng jâng Păng.” Tơlah dơm lĕ rngôch ndơ tâm dâng Brah Yêsu tâm ban pônây, Brah Ndu mâu ăn ôh du ntil ndơ tâm dâng Păng. Ƀiălah, aƀaơ aơ he ê hŏ saơ ôh lĕ rngôch ndơ tâm dâng Păng.

⁹ Ƀiălah he saơ Brah Yêsu, Brah Ndu dơm Păng dêh lơn phung tông mpăr tâm ƀât lât, aƀaơ aơ ndô jêh đon hađăch nau chrêk rmah jêh ri nau yơk yor nau khĭt, Păng dơn jêh, yor ma nau yô̆ bơh Brah Ndu, Păng dơi dơn nau khĭt yor ma lĕ rngôch bunuyh.

¹⁰ Yorlah lĕ rngôch ndơ tâm mpơl jêng bơh Brah Ndu jêh ri yor ma Brah Ndu, tơlah Păng ŭch njŭn leo âk kon sau tât ma nau chrêk rmah, Păng ƀư ăn Nơm jêng tơm nau yô̆ tâm rklaih khân păng tâm nau rêh ni gay ma dơn nau ueh rah vah ngăn jêng nau tâm di.

¹¹ Yorlah Nơm ƀư kloh ueh jêh ri phung jêng kloh ueh jêh luh tă bơh du huê Mbơ̆. Yor nau nây, Brah Yêsu mâu bêk prêng ôh kuăl khân păng jêng phung oh nâu,

¹² tơlah Păng lah: “Gâp mra mbơh nkoch amoh Kôranh Brah ma oh nâu Gâp; Jêh ri tâm rnê ma May tâm nklang phung tâm rƀŭn.”

¹³ Păng lah đŏng: “Gâp mra rnơm nsing ma Kôranh Brah.” Jêh Păng lah đŏng: “Ta aơ, Gâp ndrel ma phung kon Brah Ndu ăn jêh ma Gâp.”

¹⁴ Yorlah phung kon geh mham jêh ri nglay săk ndrel, pôri Brah Yêsu yơh geh mham jêh ri nglay săk ndrel tâm ban ma khân păng, gay ma tâm nau khĭt, Păng ƀư rai nơm chiă uănh nau khĭt jêng phung brah mhĭk,

¹⁵ jêh ri tâm rklaih lĕ rngôch bunuyh, yorlah klach khĭt pôri du bông nau rêh gŭ tâm nau jêng dĭk.

¹⁶ Yorlah nanê̆, mâu di Păng kơl an ma phung tông mpăr, ƀiălah kơl an ma noi deh Y-Abraham.

¹⁷ Pôri, Păng jêng tâm ban ma phung oh nâu Păng tâm lĕ rngôch ndơ, gay ma jêng kôranh ƀư brah toyh nuih n'hâm bêng ma nau yô̆ nđach jêh ri răp jăp tâm nau pah kan ma Brah Ndu, gay tâm chuai nau tih ma lĕ rngôch bunuyh.

¹⁸ Yorlah Păng yơh dơn jêh nau rêh ni tâm nôk geh nau ndơm, pôri Păng kơl an phung geh nau ndơm.