ហេឞ្រើ 13 - Nau Brah Ndu Ngơi 2023

Nau rêh maak nuih n'hâm Brah Ndu

¹ Ăn djôt prăp mro nau rŏng ndrăng oh nâu.

² Lơi chuêl mpơl nuih n'hâm gĭt rom bu năch, yorlah dôl ƀư nau nây, geh ƀaƀă rom jêh tông mpăr ƀiălah mâu gĭt năl khân păng ôh.

³ Kah gĭt hom ma phung bu krŭng tâm ban ma khân may nơm bu krŭng ndrel ma khân păng; jêh ri kah gĭt hom ma phung bu ƀư mhĭk, yorlah khân may nơm geh đŏng săk jăn tâm ban ma khân păng.

⁴ Ăn lĕ rngôch bunuyh yơk ma nau tâm gŭ ur sai, lơi ƀư ƀơ̆ ƀơch ma sưng bê̆ch ur sai; yorlah Brah Ndu mra tâm rmal phung tâm lâm jêh ri phung văng tĭr.

⁵ Lơi kơnh ir ma prăk ôh, maak hom nuih n'hâm ma drăp ndơ khân may geh jêh, yorlah Brah Ndu nơm lah jêh: “Gâp mâu mra lơi may ôh, mâu lah dun may ôh.”

⁶ Pôri, he dơi janh lah: “Kôranh Brah kơl gâp, gâp mâu mra klach ôh. Moh bunuyh dơi ƀư ma gâp.”

⁷ Kah gĭt hom ma phung gai khân may, jêng phung mbơh nkoch jêh nau ngơi Brah Ndu ma khân may. Sek uănh hom nau tât ma nau rêh khân păng jêh ri kơt nau chroh khân păng.

⁸ Brah Yêsu Krist nđaơ, nar aơ, jêh ri kŏ tât n'ho ro mâu blau rgâl ôh.

⁹ Lơi ăn lĕ nau nti êng leo khân may; yorlah nuih n'hâm tă bơh nau yô̆ geh nau nâp ktang jêng ueh, mâu di tă bơh lĕ ma ndơ sông sa ôh, nau nây mâu jêng khlay ôh ma phung bunuyh djôt prăp lĕ nau nây.

¹⁰ He geh du nơng ƀư brah, phung pah kan tâm ngih bok mâu dơi vay sa ta nây ôh.

¹¹ Yor mham mpô mpa kôranh ƀư brah toyh lơn djôt leo ta Ntŭk Dŭt Kloh Ueh gay ƀư ndơ nhhơr chuai nau tih, bi săk jăn mpô mpa bu gŭch padih pôih tahan.

¹² Yor nau nây, Brah Yêsu dơn nau rêh ni padih mpông ƀon gay sŏk mham Păng nơm ƀư kloh ueh ma phung ƀon lan.

¹³ Yor ri he hăn luh hom ndrel ma Păng ta padih pôih tahan, gay sŏk dơn nau bêk prêng ndrel ma Păng.

¹⁴ Yorlah ta aơ, he mâu geh ƀon gŭ ƀaƀơ n'ho ro ôh, ƀiălah he dôl joi du ƀon mra tât ma nar kăndơ̆.

¹⁵ Pôri, yor ma Brah Yêsu, he nhhơr mpa ƀư brah ƀaƀơ ma nau tâm rnê ma Brah Ndu, nâm bu ntĭt kao play bơh trôm mbung he mbơh amoh Păng.

¹⁶ Lơi chuêl ôh ƀư nau ueh jêh ri tâm pă ma bunuyh êng, yorlah lĕ ndơ ƀư brah tâm ban pônây ƀư maak nuih n'hâm Brah Ndu.

¹⁷ Tông hom ma phung kôranh chiă uănh khân may jêh ri blau tông ma khân păng, yorlah khân păng mât mray huêng khân may nâm bu ăn phung mra mbơh nkoch rah vah. Kơl hom ma khân păng geh nau maak gay ƀư lôch nau kan jêh ri mâu geh nau njang bâr, yorlah nau nây mâu ăn ueh ôh ma khân may.

¹⁸ Mbơh sơm hom ma hên ƀă, yorlah hên gĭt năl n'hêl nanê̆ hê nơm geh nuih n'hâm sŏng ueh, ŭch gŭ ngao nau ueh rah vah tâm lĕ ntil ndơ.

¹⁹ Gâp vơh dăn ma khân may mbơh sơm ăn gâp gay ma gâp dơi gơnh plơ̆ tay ma khân may.

²⁰ Dăn Brah Ndu nau đăp mpăn, jêng Nơm bơh mham nau tâm rnglăp n'ho ro jêh ri djôt leo Nơm Rmăk Biăp Toyh jêng Brah Yêsu, Kôranh Brah he, luh tă bơh nau khĭt,

²¹ ăn ma khân may lĕ nau ueh gay tĭng nau Păng ŭch, jêh ri ƀư nau ueh nuih n'hâm Păng ma he tâm Brah Yêsu Krist. Ăn nau chrêk rmah jêng ndơ Păng n'ho ro ƀaƀơ! Amen.

²² Hơi phung oh nâu, ăn nuih n'hâm khân may maak sŏk dơn lĕ nau ntĭnh nkah aơ, yor gâp nchih ma khân may knŏng trăch dơm.

²³ Gâp ŭch ma khân may gĭt ma nâu he jêng Y-Timôthê, bu mƀơk dơi jêng kon me jêh. Tơlah păng văch gơnh, gâp mra hăn khâl khân may ndrel ma păng.

²⁴ Mbah ma lĕ rngôch phung chiă uănh khân may jêh ri lĕ rngôch phung kloh ueh. Phung kloh ueh ta n'gor Italy njuăl nau mbah jô̆ khâl ma khân may.

²⁵ Ăn nau yô̆ gŭ ndrel ma lĕ rngôch khân may! Amen.