ហេឞ្រើ 11 - Nau Brah Ndu Ngơi 2023

Nau dơi tâm nau chroh

¹ Nau chroh jêng nau mbơh nkoch ma lĕ ndơ he dôl kâp gân, jêng nau mbơh ma lĕ nau he mâu blau saơ ôh.

² N'hêl nanê̆ ngăn, ma nau chroh phung bunuyh kăl e geh nau mbơh ueh.

³ Yor ma nau chroh, he gĭt rbăng Brah Ndu rhăk njêng neh ntu aơ ma nau Păng ngơi, kŏ tât lĕ ndơ bu saơ hŏ njêng jêh bơh lĕ ndơ bu mâu saơ.

⁴ Yor ma nau chroh, Y-Abel nhhơr jêh ma Brah Ndu du mpa ƀư brah ueh lơn ma Y-Kain, jêh ri păng geh nau mbơh jêng sŏng srăng nôk Brah Ndu dơn jêh ndơ nhhơr nây. Tă bơh nĕ đŏng, nđâp tơlah khĭt jêh, păng ăt hôm ngơi.

⁵ Yor ma nau chroh, Y-Ênŏk hao klơ jêh ri mâu mâp nau khĭt; bu mâu hôm saơ păng đŏng ôh, yorlah Brah Ndu vơt chông păng. Êlor Y-Ênŏk hao klơ, păng geh nau mbơh jêng gŭ rêh maak nuih n'hâm Brah Ndu.

⁶ Mâu geh nau chroh, mâu dơi ƀư maak nuih n'hâm Brah Ndu; yorlah mbu nơm ŭch hăn dăch ta Brah Ndu, ăn păng chroh geh Brah Ndu ngăn, jêh ri Păng jêng Nơm ăn nau nkhôm ma mbu nơm joi Păng.

⁷ Yor ma nau chroh, Brah Ndu mbơh lor ma Y-Nôê ma lĕ ndơ ê hŏ saơ ôh, jêh ri păng klach yơk ma nau nanê̆ ngăn, ndâk du mlâm kumpăn gay ma tâm rklaih rnăk vâl păng nơm. Bơh nau nây, păng dơi rmal neh ntu jêh ri jêng nơm dơn nau sŏng srăng tât bơh nau chroh.

⁸ Yor ma nau chroh, Y-Abraham tông bâr Brah Ndu kuăl, hăn tât ta n'gor êng păng nơm mra dơn jêng drăp ndơn; păng hăn ƀiălah mâu gĭt ôh mbah ntŭk păng mra hăn.

⁹ Yor ma nau chroh, păng gŭ tâm neh ton tâm ban ma ta klơ neh phung bu năch, gŭ tâm lĕ vâl bok ndrel ma Y-Isăk jêh ri Y-Yakôp, jêng phung dơn ndrel nau ton tâm ban ma păng.

¹⁰ Yorlah păng gŭ kâp du ƀon geh mbon nâp bơh Brah Ndu nơm hŏ nkra jêh ri rdâk njêng.

¹¹ Yor ma nau chroh, yơh H'Sara dơi deh kon, nđâp tơlah mâu bă kon jêh ri hŏ ranh kđôi lĕ, yorlah păng chroh ma Nơm ton jêh ma păng nơm jêng nau răp jăp.

¹² Yor nây, tă bơh du huê bunuyh uănh nâm bu khĭt jêh, ƀiălah dơi geh âk ngăn kon sau, âk nâm bu mănh klơ trôk, nâm bu choih rgŏ kơh dak mƀŭt, mâu blau kơp.

¹³ Lĕ rngôch phung bunuyh nây khĭt da dê jêh tâm nau chroh, ê hŏ sŏk dơn ôh lĕ nau Brah Ndu ton ma khân păng; knŏng uănh saơ jêh ri mbah lĕ nau nây ntơm bơh ngai, kơp săk khân păng nơm jêng bunuyh bu năch jêh ri bunuyh gŭ jăng jai ta neh ntu.

¹⁴ Yorlah phung bunuyh lah pônây, tâm mpơl ma khân păng dôl hăn joi du ƀon tơm.

¹⁵ Tơlah khân păng hôm mĭn ma ƀon tơm khân păng tă bơh nây hăn du luh, khân păng geh đŏng mông găl plơ̆ sĭt.

¹⁶ Ƀiălah khân păng ŭch geh du ƀon tơm ueh lơn, nây jêng ƀon tơm ta klơ trôk, pôri Brah Ndu mâu bêk prêng ôh gay mbơh Păng nơm jêng Brah Ndu khân păng, yorlah Păng ndrăp lor du ƀon ma khân păng.

¹⁷ Yor ma nau chroh Y-Abraham nhhơr Y-Isăk dôl geh nau rlong uănh. Păng rơm ndrăp nhhơr kon dul hŏ dơn jêh tĭng nau ton,

¹⁸ jêng kon Brah Ndu lah pô aơ: “Tâm Y-Isăk yơh, may mra geh du noi deh dơi tĭng amoh săk may.”

¹⁹ Păng mĭn ma Brah Ndu geh nau dơi ƀư ăn bunuyh hŏ khĭt jêh dơi dâk rêh tay, ngơi tĭng tâm nau hôr, păng dơn tay kon păng nơm tă bơh nau khĭt.

²⁰ Yor ma nau chroh, Y-Isăk ăn nau ueh uĭn ma Y-Yakôp jêh ri ma Y-Êsau ma lĕ nau tâm nar kăndơ̆.

²¹ Yor ma nau chroh, Y-Yakôp nôk dăch khĭt ăn nau ueh uĭn jêh ma bar hê kon Y-Yôsep, jêh ri yơk mbah Brah Ndu dôl păng kuăn rdâng mâng jra păng nơm.

²² Yor ma nau chroh, Y-Yôsep dôl dăch khĭt hŏ lah ma nau phung Israel mra luh bơh êjipt jêh ri ntĭnh ma phung nây yor nting păng nơm.

²³ Yor ma nau chroh, nôk bu mhe deh ma Y-Môis, mê̆ mbơ̆ păng pôn păng tâm pe khay, yor ma saơ kon nây ueh, mâu klach ôh ma samƀŭt nau ntrŭnh bơh hađăch.

²⁴ Yor ma nau chroh, Y-Môis hŏ nôk văch ma toyh, chalơi amoh păng nơm jêng kon bu klâu ma kon bu ur hađăch Pharaôn,

²⁵ ueh lơn jêng phung ƀon lan Brah Ndu dơn nau bu tŭn jot rlau lơn đah nau gŭ maak ƀât lât tâm nau tih.

²⁶ Păng kơp nau bêk prêng yor ma Brah Krist jêng khlay rlau lơn drăp ndơ khlay ta n'gor Êjipt, yorlah păng kâp gân ma nau nkhôm.

²⁷ Yor ma nau chroh, păng du tă bơh n'gor Êjipt mâu klach ma nau hađăch ji nuih ôh; yorlah păng srôih nâm bu păng hŏ saơ jêh Nơm bu mâu blau saơ.

²⁸ Yor ma nau chroh, păng djôt nkra rƀŭn Nau Găn jêh ri mhĭng mham, gay ma tông mpăr ƀư rai mâu pah tât ta kon bôk rah phung Israel.

²⁹ Yor ma nau chroh, phung Israel rgăn Dak Mƀŭt Chăng nâm bu hăn ta ntŭk neh sơh, bi phung Êjipt srôih hăn rgăn, lĕ rngôch khân păng ngâm tâm dak da dê.

³⁰ Yor ma nau chroh, lĕ mpêr ƀon Yêrikô rlâm jêh dôl phung Israel hăn ndăch dăr jŭm tâm pơh nar.

³¹ Yor ma nau chroh, bu ur văng tĭr H'Rahap mâu khĭt ôh ndrel phung mâu chroh, yorlah păng vơt rom jêh phung uănh n'hut ma nau đăp mpăn.

³² Moh gâp hôm lah? Yorlah tơlah gâp ŭch ngơi ma Y-Gidêôn, ma Y-Barak, ma Y-Samsôn, ma Y-Jêptê, ma Y-Đavit, ma Y-Samuel jêh ri ma phung mbơh lor, mâu tŏng mông nar.

³³ Yor ma nau chroh phung bunuyh nây dơi jêh đah ƀon bri hađăch, ƀư nau di, sŏk dơn jêh lĕ nau ton, rdêp trôm mbung yau mŭr,

³⁴ nhhât lơi jêh ŭnh hit, klaih bơh mpiăt đao, dơi đah nau ji, jêng janh ktang tâm nau tâm lơh, ƀư ăn phung tahan rlăng nchuăt du.

³⁵ Geh phung bu ur sŏk dơn tay phung oh nâu khân păng nơm dâk rêh tay tă bơh nau khĭt; geh ƀaƀă dơn nau bu ƀư rêh ni jêh ri mâu ŭch tâm rklaih gay dơi geh nau dâk rêh tay ueh lơn.

³⁶ Ƀaƀă êng dơn nau bu mưch rmot, nau bu dong mbang, nau bu nkông ma rse rvăk jêh ri nau bu krŭng.

³⁷ Khân păng dơn nau bu klŭp ma lŭ, ot ma ndruih jêng bar buh, nkhĭt ma đao gưm; nsong mblêng ta aơ ta ri, nsoh ma ntâu biăp, ntâu be, pưt kƀah, bu tŭn jot jêh ri ƀư nau mhĭk.

³⁸ Neh ntu mâu khư ma khân păng gŭ ôh. Khân păng nsong mblêng tâm bri rdah, ta klơ yôk prêh, tâm lĕ trôm lŭ, tâm lĕ ntu brŏng trôm neh.

³⁹ Lĕ rngôch phung nây nđâp tơlah geh nau mbơh ueh yor nau chroh khân păng, ƀiălah ê hŏ sŏk dơn ôh nau Brah Ndu ton jêh ma khân păng.

⁴⁰ Yorlah Brah Ndu ăn jêh nau ueh lơn ma he, gay ma khân păng mâu dơi tât ma nau ueh rah vah ôh lor ma he.