ហេឞ្រើ 10 - Nau Brah Ndu Ngơi 2023

Kranh Brah Yêsu jêng tơm nau tâm rklaih

¹ Yorlah nau vay geh knŏng gui n'hâm ma lĕ nau ueh tât pakơi, mâu di jêng rup ngăn ma ndơ ƀư brah; yor nây, phung bunuyh văch dăch Brah Ndu mâu geh nau dŭt ueh ôh bơh mpa ƀư brah bu nhhơr ƀaƀơ ăp năm.

² Tơlah geh pônây khân păng rlu jêh nhhơr mpa ƀư brah, yorlah phung yơk mbah geh nau ƀư kloh du tơ̆ rĭng jêh; khân păng mâu hôm kah gĭt ma nau tih khân păng đŏng ôh?

³ Ƀiălah lĕ mpa ƀư brah nây jêng gay nkah ăn gĭt ăp năm ma nau tih.

⁴ Yorlah mham ndrôk nkuăng jêh ri be nkuăng mâu dơi sŏk lơi nau tih.

⁵ Yor nây, tơlah Brah Krist lăp tâm neh ntu, Păng lah pô aơ: “Kôranh Brah mâu ŭch ôh mpa ƀư brah, mâu đŏng ŭch ndơ nhhơr, Ƀiălah Kôranh Brah ndrăp lor jêh du săk jăn ma gâp.

⁶ Kôranh Brah mâu maak nuih n'hâm ôh ma ndơ ƀư brah gŭch Jêh ri ndơ ƀư brah chuai nau tih.

⁷ Nôk nây, gâp lah: ‘Ơ Brah Ndu, aơ gâp văch, Tâm ndrom samƀŭt geh nchih ma gâp. Gâp văch gay ƀư tĭng nâm nau Kôranh Brah ŭch.’ ”

⁸ Tơlah Păng lah jêh lor: “Kôranh Brah mâu ŭch, mâu maak đŏng ôh ma lĕ mpa ƀư brah, ndơ nhhơr, ndơ ƀư brah gŭch jêh ri ndơ ƀư brah chuai nau tih” (nây jêng lĕ ndơ nhhơr tĭng nâm nau vay), jêh nây lah tay: “Aơ, gâp văch gay ƀư tĭng nau Kôranh Brah ŭch.”

⁹ Pôri, Kôranh Brah chalơi jêh nau lor gay ma njêng nau pakơi.

¹⁰ Tĭng nau ŭch mĭn nây, he geh nau kloh ueh ma nau nhhơr săk jăn Brah Yêsu Krist du tơ̆ nây dơm rĭng jêh.

¹¹ Ăp nơm kôranh ƀư brah tâm ăp nar gŭ pah kan jêh ri nhhơr ƀaƀơ mpa ƀư brah tâm ban, jêng nau nây mâu dơi sŏk lơi nau tih ôh.

¹² Ƀiălah Brah Krist yor nau tih nhhơr jêh ƀư brah chuai nau tih knŏng du tơ̆ jêh ri n'ho ro, jêh nây gŭ mpeh pa ma Brah Ndu;

¹³ jêh ri bơh nĕ, Păng gŭ kâp kŏ tât phung rlăng đah Păng mra jêng rnơl chrong jâng ma Păng.

¹⁴ Yorlah bơh du mpa ƀư brah knŏng nguay, Păng ƀư ma phung bunuyh geh nau kloh ueh jêng dŭt ueh ngăn mro mrăng.

¹⁵ Brah Huêng Ueh mbơh lĕ ma he tâm ban pônây; yorlah jêh păng lah:

¹⁶ Kôranh Brah lah: “Aơ jêng nau tâm rnglăp Gâp mra ƀư ma khân păng: Pakơi lĕ nar nây, Gâp mra dơm nau vay Gâp tâm nuih n'hâm khân păng Jêh ri nchih prăp tâm nau mĭn khân păng.”

¹⁷ Păng lah tay: “Gâp mâu hôm kah gĭt ma nau tih jêh ri nau djơh mhĭk khân păng đŏng ôh.”

¹⁸ Ta ntŭk geh nau yô̆ an, mâu hôm nhhơr ndơ ƀư brah yor nau tih đŏng ôh.

II. Nau chroh jêh ri nau rêh phung chroh ( 10:19 – 13:25 ) Trong mhe jêh ri rêh lăp ntŭk dŭt kloh ueh

¹⁹ Pôri, ơ phung oh nâu, yorlah ma mham Brah Yêsu he dơi lăp Ntŭk Dŭt Kloh Ueh,

²⁰ ma trong mhe jêh ri rêh Păng pơk jêh ma he rgăn bok nching, nâm bu ntĭt rgăn nglay săk Păng nơm;

²¹ jêh ri yorlah he geh du huê kôranh ƀư brah dŭt toyh chiă uănh tâm ngih Brah Ndu,

²² pôri ăn he sŏk hom nuih n'hâm nanê̆ ngăn ndrel ma nau chroh nâp, nuih n'hâm ăn dơi kloh jêh tă bơh nuih n'hâm djơh mhĭk, săk jăn rao kloh ma dak rsang văch dăch Brah Ndu.

²³ He djôt nâp hom nau mbơh nkoch ma nau he kâp gân mâu mpât n'gơ, yorlah Nơm ton jêh ma he, Păng jêng nau răp jăp.

²⁴ Ăn he mĭn rvê tâm n'hao nuih ndrăng he nơm ma nau rŏng jêh ri lĕ nau kan ueh.

²⁵ Lơi ta chalơi ôh nau tâm rƀŭn nâm bu phung ƀaƀă vay ƀư, ƀiălah ăn he nsŭk nsôr ndrăng nơm; tơlah khân may saơ nar Kôranh Brah dăch văch, lơ hô ƀư kơt nây âk lơn đŏng.

²⁶ Yorlah tơlah he gĭt năl nau ngăn jêh, ƀiălah hôm mĭn ŭch ƀư tih, mâu hôm geh mpa ƀư brah ma nau chuai nau tih đŏng ôh,

²⁷ ƀiălah klach ngăn gŭ kâp ma nau phat dôih jêh ri ŭnh hit ngăn mra sa phung tâm rdâng.

²⁸ Mbu nơm ƀư tih đah nau vay Y-Môis, tơlah geh bar pe bunuyh mbơh gĭt nanê̆, khĭt mâu dơi geh nau yô̆ ôh.

²⁹ Rlau lơn ma phung jot plên Kon Brah Ndu, mưch rmot mham nau tâm rnglăp, nâm bu ntĭt mham ƀư kloh ueh jêh khân păng nơm, jêh ri hôm ngơi djơh ma Brah Huêng Ueh nau yô̆, pôri khân may mĭn bunuyh nây mâu khư geh nau rmal jâk jêr rlau lơn lĕ ƀơh?

³⁰ Yorlah he gĭt năl jêh Nơm lah jêh: “nau plơng bôk jêng ndơ Gâp, Gâp mra plơng bôk.” Jêh ri lah đŏng: “Kôranh Brah mra phat dôih ƀon lan păng nơm.”

³¹ Tŭp tâm ti Brah Ndu rêh jêng nau klach krit ngăn.

³² Ƀiălah kah gĭt tay hom ma lĕ nar lor, tơlah jêh geh nau sol ang, khân may sŏk dơn jêh nau tâm lơh toyh đah âk nau hŏt rgănh:

³³ Geh tơ̆ khân may mpơl lĕ dơn nau bêk prêng jêh ri tâm mâp nau rêh ni; geh tơ̆ khân may tâm pă lĕ nau rêh ni đah phung geh nau ƀư nau mhĭk tâm ban pô aơ.

³⁴ Yorlah khân may geh jêh nau yô̆ nđach ma phung bu nă, jêh ri maak nuih n'hâm dơn ma nau bu sŏk pit in drăp ndơ khân may nơm, yorlah khân may gĭt khân may nơm geh drăp ndơ khlay lơn jêh ri hôm e n'ho ro.

³⁵ Pôri, Lơi chalơi ôh nau chroh nanê̆ khân may nơm, yorlah păng mra djôt tay nau nkhôm toyh.

³⁶ Ăn khân may srôih gay ƀư tĭng nau Brah Ndu ŭch, khân may mra dơn nau Păng ton jêh ma khân may.

³⁷ Yorlah “Hôm knŏng ƀât lât đŏng Nơm dôl văch mra văch; Păng mâu mbrĕ mbrơi ôh.

³⁸ Nơm sŏng srăng gâp mra gŭ rêh yor nau chroh, Ƀiălah tơlah plơ̆ rŭch Huêng gâp mâu hôm maak ôh.”

³⁹ Ƀiălah he mâu di jêng phung plơ̆ rŭch hăn tâm nau roh rai ôh, ƀiălah jêng phung bunuyh djôt prăp nau chroh gay ma huêng geh nau tâm rklaih.