ហេឞ្រើ 1 - Nau Brah Ndu Ngơi 2023

I. Nau rlau lơn ma nau tâm rnglăp mhe tâm Brah Yêsu Krist ( 1:1 – 10:18 ) Brah Yêsu Krist toyh rlau lơn phung tông mpăr ueh

¹ Rnôk rô̆ kăl e, Brah Ndu hŏ dŏng phung mbơh lor ntĭm nti ma phung chô yau he âk tơ̆, âk trong.

² Ƀiălah tâm lĕ nar dăch dŭt aơ, Păng ntĭm nti jêh ma he bơh Kon Păng Nơm, jêng Kon Păng hŏ rdâk jêh jêng Nơm dơn lĕ rngôch ndơ; tâm Kon nây đŏng, Păng rhăk njêng jêh trôk neh ntu.

³ Kon jêng chrat ang nau chrêk rmah Brah Ndu jêh ri jêng rup di ngăn ma Brah Ndu nơm. Păng sŏk nau brah Păng gay ma kơl lĕ rngôch ndơ. Jêh Păng ƀư kloh nau tih, Păng gŭ mpeh pa ma Nơm Dŭt Prêh ta klơ trôk.

⁴ Păng dơi n'hao prêh lơn ndah âk ma phung tông mpăr pôri amoh Păng jêng toyh rlau lơn ma amoh phung tông mpăr ndah âk.

⁵ Yorlah ndah jŏ Brah Ndu hŏ lah jêh ma du huê tông mpăr pô aơ: “May jêng Kon Gâp, Gâp hŏ deh jêh ma may tâm nar aơ”? Mâu lah ndah jŏ geh lah: “Gâp mra jêng Mbơ̆ păng, Păng mra jêng Kon Gâp?”

⁶ Ƀiălah dôl njŭn leo Kon bôk rah lăp tâm neh ntu, Păng lah: “Ăn lĕ rngôch phung tông mpăr Brah Ndu yơk mbah ma Păng.”

⁷ Păng lah ma phung tông mpăr: “Brah Ndu ƀư ma phung tông mpăr tâm ban ma sial, Jêh ri ma phung oh mon Păng tâm ban ma mpiăt ŭnh.”

⁸ Ƀiălah lah ma Kon geh nau lah: “Ơ Brah Ndu, sưng hađăch May hôm ƀaƀơ n'ho ro, Nau dơi ƀon bri hađăch Kôranh Brah jêng nau dơi sŏng.

⁹ May rŏng nau sŏng srăng, tâm rmot nau djơh mhĭk; Yor nây, Brah Ndu jêng Brah Ndu May, hŏ tŏ dak ngi nau maak ma May, Ƀư ăn May rmeh rlau lơn ma phung băl May nơm.”

¹⁰ Geh đŏng nau lah: “Ơ Kôranh Brah, ntơm saơm Kôranh Brah rhăk njêng mbon rplay neh, Jêh ri lĕ ndâr trôk jêng kan bơh ti Kôranh Brah.

¹¹ Trôk neh mra rai lôch, ƀiălah Kôranh Brah ăt hôm n'ho ro; Trôk neh mra mŭnh sat nâm bu kho ao.

¹² May mra klôn khân păng nâm bu ao mbâl, Jêh ri khân păng mra tâm rgâl nâm bu kho ao. Ƀiălah Kôranh Brah ăt hôm kơt ơm, Jêh ri lĕ năm Kôranh Brah mâu mra rlau lôch ôh.”

¹³ Jêh ri ndah jŏ Brah Ndu mâp lah ma phung tông mpăr pô aơ: “Gŭ hom pa ma Gâp, Kŏ tât nôk Gâp dơm phung rlăng jêng rnơl chrong jâng may”?

¹⁴ Mâu di hĕ lĕ rngôch phung tông mpăr jêng phung huêng brah pah kan, Brah Ndu njuăl hăn pah kan ma phung bunuyh dơn nau tâm rklaih hĕ?