Habakuk 3 - Nau Brah Ndu Ngơi 2023

Nau Y-Habakuk mbơh sơm

¹ Nau nơm mbơh lor Y-Habakuk mbơh sơm tĭng nâm nau mprĭng.

² Ơ Brah Yêhôva! Gâp tăng jêh nau bu nkoch lư n'găr amoh May, Yor ri gâp klach yơk ma May. Ơ Brah Yêhôva! Ta nklang năm khay mro mrăng, Dăn Kôranh Brah ăn njêng mhe tay nau kan May, jêh ri tâm mpơl ma lĕ rngôch bunuyh gĭt. Tâm nau ji nuih, dăn Kôranh Brah kah gĭt ma nau yô̆ nđach!

³ Brah Ndu văch tă bơh bri Têman Nơm Kloh Ueh văch tă bơh yôk Paran. Nau chrêk ma lơp Păng nkŭm lĕ ndâr trôk, Nau tâm rnê Păng nter huy lam neh ntu. (Sêla)

⁴ Nau nchrat Păng nâm bu nau ang; Lĕ nau nchrat luh bơh ti Păng, Nây jêng ntŭk pôn nau brah Păng.

⁵ Nau ji tưp hăn panăp Păng, Nau mhĭk tât tĭng êp jâng Păng chuat.

⁶ Păng dâk, ƀư n'găr n'gơ rplay neh; Păng uănh, ƀư ma phung mpôl băl bunuyh râm sâr; Phung yôk ntơm bơh rnôk saơm chah rai da dê, Lĕ gôl yôk gŭ lĕ jŏ rnôk rlâm da dê. Trong Păng hôm tâm ban kăl e.

⁷ Gâp saơ lĕ ngih bok phung Kusan geh nau rêh ni, Lĕ bok nching bri Madian n'găr n'gơ.

⁸ Ơ Brah Yêhôva, di lĕ May ji nuih đah lĕ dak krong? Di lĕ nau May ji nuih tâm rdâng đah lĕ dak n'hor? Geh lĕ nau May hao nuih tâm rdâng đah dak mƀŭt, Lah May ncho seh ndrel ndeh seh gay tâm rklaih lĕ?

⁹ Na May hŏ tŏk lơi jêh luh tă bơh ndrom, Nau tâm ton ma lĕ mpôl bunuyh jêng n'hêl nanê̆. (Sêla) May chor neh ƀư ăn dak krong hoch.

¹⁰ Lĕ rngôch yôk saơ Păng klach krit da dê; Lĕ n'hor dak hoch thăng ngăn Hoch rbuh mro mrăng, Brŏng jru nteh n'gôr dak, jêh ri yơr ti leo klơ.

¹¹ Nar, khay gŭ gâng du ntŭk, Yor nau nchrat ang bơh chiông hăr May, Yor nau lơp bơh chiông tak May sol ang.

¹² Tâm nau ji nuih, Kôranh Brah nsong ta klơ neh ntu, Tâm nau ji nuih, May jot plên phung ƀon lan.

¹³ Kôranh Brah luh du gay tâm rklaih phung ƀon lan May, Gay tâm rklaih bunuyh dơi tŏ dak ƀâu kah May. May dong sôt jru bôk nơm mhĭk, Ƀư rai ngih păng, gŭ săk hưl ntơm bơh mbon tât ta trô ko. (Sêla)

¹⁴ May sŏk tak păng ntâp ta bôk phung tahan păng; Khân păng văch tât nâm bu sial vănh blông gay ƀư gâp pru pra, Khân păng hâk răm lah sa rvăn phung o ach tâm ntŭk du krap.

¹⁵ May ncho seh hăn klơ dak mƀŭt, Ta klơ dak toyh dôl luh mpŭnh.

¹⁶ Tăng lĕ nau aơ, lam săk jăn gâp râm sâr, Toh yoi gâp mprâm ngăn, Nting gâp nâm bu bơi rmuk ôm, Jêh ri jâng gâp chuat ndĭt ndiu. Gâp mra gŭ rklăk gay kâp nar rêh ni, Jêng nar geh phung ƀon lan văch lơh hên.

Rnơm nsing jêh ri răm maak ta nklang nau mhĭk tât

¹⁷ Nđâp lah tơm play rvi mâu mra chăt nkŭr đŏng ôh, Đang krăk ƀâu rlu luh play, Tơm ôlive mâu đŏng geh play, Mir ba mâu geh ôh luh ndơ sông sa, Phung biăp roh êng tă bơh ndrung, Jêh ri phung ndrôk mâu geh đŏng ôh tâm trôm ndrung,

¹⁸ Gâp hôm răm maak tâm Brah Yêhôva; Gâp hôm hâk răm tâm Brah Ndu ma nau tâm rklaih gâp.

¹⁹ Kôranh Brah Yêhôva jêng nau dăng gâp, Păng ƀư ma jâng gâp nâm bu jâng jun, Kơl gâp chuat hăn ta klơ yôk prêh. (Nchih ma bunuyh gai phung mprơ jêh ri phung kreh gong rêng)