Habakuk 2 - Nau Brah Ndu Ngơi 2023

¹ Gâp mra dâk ta ntŭk kâp gak, Gŭ chăm ta ntŭk pêr pôih, Lŏng uănh moh ntil nau Păng đă gâp ƀư, Jêh ri gâp mra geh nau plơ̆ lah ma yor nau gâp mâu hŏ vât.

Brah Yêhôva plơ̆ lah ma Y-Habakuk

² Brah Yêhôva plơ̆ lah jêh ri đă gâp: “Nchih hom nau tâm saơ; Jêh ri nchih păng ntoh rah vah ta du plơp kađar, Gay bunuyh dôl nchuăt dơi rŏ săr lah.

³ Yorlah nau tâm saơ hôm e kâp rnôk tât geh nau tâm di; Păng văch gơnh hăn tât ntŭk nglĕ dŭt, mâu mƀruh ôh. Tơlah păng băt tât, ăn gŭ kâp ƀât; N'hêl nanê̆ păng mra tât, mâu mbrĕ mbrơi ôh.

⁴ Uănh hom, phung sưr rlau Mâu geh ôh nuih n'hâm sŏng; Ƀiălah bunuyh sŏng srăng mra gŭ rêh yor nau chroh păng nơm.

⁵ N'hêl nanê̆, păng geh ndrănh mƀruh, Păng sưr jêh ri mâu geh ôh nau gŭ đăp mpăn. Nuih n'hâm ŭch kơnh păng pơk huy nâm bu ƀon phung khĭt, Nâm bu nau khĭt, păng mâu blau mpay ôh; Păng tâm rgum lĕ rngôch bri dak Jêh ri sŏk lĕ rngôch phung ƀon lan sĭt ma păng nơm.”

Nau rêh ni ma phung mhĭk

⁶ Ƀiălah mâm mâu di lĕ rngôch phung mpôl băl bunuyh nây treo nau bu ntêh rmot, jêh ri sŏk nau hôr gơm mưch ma păng? Khân păng lah: “Rêh ni ngăn ma nơm prăp bun drăp ndơ mâu di ôh ndơ păng nơm! Ndah jŏ nau păng prăp bun mro ma păng nơm drăp ndơ bu nchăm?

⁷ Mâm mâu di phung rnon đah may mra dâk ƀât lât dơm; Khân păng mra du dâk jêh ri ƀư ăn may râm sâr? May mra jêng ndơ ma khân păng pit in.

⁸ Yorlah may hŏ pit in jêh ndô ndơ âk bri dak ƀaƀă Yor ri lĕ rngôch bơh phung ƀon lan hôm e mra pit in ndơ may, Yorlah may hŏ ƀư pling jêh mham bunuyh, Jêh ri yor nau may ƀư mhĭk hŏ ƀư jêh ma bri neh, Ma ƀon toyh jêh ri ma lĕ rngôch phung gŭ tâm păng.

⁹ Rêh ni ngăn ma nơm joi sa kao mâu tâm di nsĭt ma ngih vâl păng, Gay ƀư ntŭk gŭ ma păng nơm ta ntŭk prêh klơ, Ŭch ma klaih bơh ti phung mhĭk.

¹⁰ Nau may ndrăp ƀư ƀai âk băl mpôl bunuyh Knŏng djôt leo nau bêk prêng ma ngih vâl may nơm; Jêh ri ƀư rai ma may nơm.

¹¹ Yorlah lŭ tâm mpir mra nter, Jêh ri rda ƀư ma si klơ chor jay mra plơ̆ lah.

¹² Rêh ni ma nơm sŏk mham ndâk ƀon, Jêh ri sŏk nau djơh mhĭk ndâk njêng ƀon toyh!

¹³ Nĕ, mâm mâu di jêng tă bơh Brah Yêhôva ma phung tahan Dĭng phung ƀon lan pah kan hŏt rơah gay ƀư ndơ prăp ma ŭnh sa, Jêh ri lĕ bri dak hŏt rgănh ma nau dơm dam lĕ?

¹⁴ Yorlah gĭt năl nau chrêk rmah Brah Yêhôva Mra bêng ler lam neh ntu Nâm bu dak nkŭm bêng dak mƀŭt.

¹⁵ Rêh ni ngăn ma nơm n'hơk ndrănh ma phung chiau meng păng N'hơk kachok nau ji nuih kŏ tât khân păng nhŭl ndrănh, Gay uănh nau rhôk khân păng!

¹⁶ May mra bêng ma nau prêng yor ntrok ma nau chrêk rmah. Nhêt hom may nơm jêh ri gay mpơl nau ê hŏ ŭch koh ntâu. Kachok Brah Yêhôva djôt tâm ti ma Mra tât ăn ma may, Jêh ri nau bêk prêng mra ntrok nau chrêk ma lơp may.

¹⁷ Nau may ƀư djơh ma bri Liban mra nkŭm brôi may; Jêh ri nau may ƀư rai lĕ mpô mpa mra ƀư ma may klach krit, Yorlah may hŏ ƀư pling jêh mham bunuyh, Jêh ri yorlah nau may hŏ ƀư djơh ma bri neh, Ma ƀon toyh jêh ri ma lĕ rngôch phung gŭ tâm nây.

¹⁸ Rup trah nơm rhăk hŏ trah mon jêh Geh ndơ khlay lĕ? Rup tŏ chiăr jêng nơm nti mƀruh, Mâm bunuyh rhăk rup mlo nây Rnơm nsing nkhơng ma kan ti păng nơm ƀư?

¹⁹ Rêh ni ngăn ma nơm ngơi đah tơm si pô aơ: ‘Kah rngăl hom!’ Jêh ri ngơi đah lŭ mlo pô aơ: ‘Dâk hom may!’ Păng dơi ntĭm nti đŏng? Aơ, păng dơi mblum ma mah jêh ri prăk, Ƀiălah tâm păng mâu geh djê̆ ro n'hâm nsôr.

²⁰ Ƀiălah Brah Yêhôva gŭ tâm ngih brah kloh ueh păng; Tanăp Păng, gŭ rklăk hom lĕ rngôch bunuyh klơ neh ntu!”