Galati 6 - Nau Brah Ndu Ngơi 2023

Tâm mbăk jâk ndrăng nơm

¹ Hơi oh nâu, tơlah geh du huê rhuh tâm nau tih, khân may jêng phung hăn tĭng nâm Brah Huêng Ueh, sŏk hom nuih n'hâm rdơ̆ rbăn gay nkra khân păng. Ăn khân may nơm blau njrăng, klach lah geh nau ndơm tât ma khân may tâm ban lĕ.

² Kơl tâm anh hom nau jâk jêr ndrăng khân may; khân may mra ƀư lôch nau vay Brah Krist.

³ Yorlah tơlah du huê bunuyh mĭn păng nơm geh nau khlay, tâm nôk păng nơm mâu geh nau khlay, pôri, păng ndơm păng nơm yơh.

⁴ Ăp nơm sek uănh hom ma kan păng nơm, jêh mra saơ nau gay rnê êng mâu jêng nsing păng nơm, mâu di tâm rđĭl đah bu êng ôh.

⁵ Yorlah ăp nơm mra anh nau jâk jêr păng nơm.

Srih jêh ri rek

⁶ Mbu nơm tăng bu nti nau chroh, tâm pă hom lĕ rngôch ndơ ueh ăn ma nơm nti lah ma khân păng.

⁷ Lơi ta ndơm êng khân may nơm ôh; Brah Ndu mâu dơn nau bu mưch ôh; yorlah moh ntil găr bu srih jêh, bu mra rek ntil găr nây.

⁸ Mbu nơm srih ma nglay săk mra bơh nglay săk rek nau rai yot; ƀiălah mbu nơm srih ma Brah Huêng Ueh mra bơh Brah Huêng Ueh rek nau rêh ƀaƀơ n'ho ro.

⁹ Lơi rgănh dôl ƀư kan ueh, yorlah tơlah he mâu rdja nuih n'hâm ôh, he mra rek tât ta yan rek.

¹⁰ Pôri, dôl geh mông găl, he ƀư hom nau ueh ma lĕ rngôch bunuyh, lor lơn jêng ma phung oh nâu tâm nau chroh.

¹¹ Uănh hom, lĕ rplay samƀŭt dŭt toyh, bơh ti gâp nơm nchih ma khân may.

Nau nkah ăn gĭt nglĕ dŭt samƀŭt njuăl

¹² Lĕ bunuyh ŭch ƀư maak tĭng nâm nglay săk, srôih nchâp khân may dơn nau koh ntâu. Khân păng ƀư kơt nây gay ma khân păng mâu dơn nau bu ƀư mhĭk yor si tâm rkăng Brah Krist yơh.

¹³ Yorlah phung nây dơn nau koh ntâu jêh ƀiălah mâu djôt prăp nau vay ôh, ƀiălah khân păng ŭch ma khân may dơn nau koh ntâu gay ngơi hưn ma tâm nglay săk khân may.

¹⁴ Bi ma gâp, gâp mâu ngơi ntưih ma moh ntil êng ôh, knŏng si tâm rkăng Kôranh Brah he jêng Brah Yêsu Krist. Yor si tâm rkăng nây, ma gâp neh ntu geh nau pâng kđĭn, jêh ri ma neh ntu gâp tâm ban lĕ.

¹⁵ Yorlah nau khlay mâu di jêng nau koh ntâu mâu lah mâu koh ntâu, ƀiălah nau plơ̆ jêng bunuyh mhe.

¹⁶ Dăn nau đăp mpăn jêh ri nau yô̆ nđach jŭr ma lĕ rngôch mbu nơm ƀư tĭng nau vay nây, jêh ri ta phung Israel Brah Ndu đŏng!

¹⁷ Ŭch ngăn ntơm bơh aƀaơ tât kăndơ̆, mâu geh mbu nơm ƀư rsuak gâp đŏng, yorlah gâp djôt lĕ têl Brah Yêsu ta klơ săk jăn gâp.

¹⁸ Hơi phung oh nâu, dăn nau yô̆ bơh Kôranh Brah he jêng Brah Yêsu Krist gŭ ndrel ma huêng nuih n'hâm khân may! Amen.