Galati 5 - Nau Brah Ndu Ngơi 2023

Nau kon me tâm Brah Krist

¹ Brah Krist hŏ tâm rklaih jêh gay he geh nau kon me. Pôri dâk nâp hom, lơi dơm khân may nơm tâm dâng mbăk jêng dĭk du tơ̆ tay đŏng.

² Gâp, Y-Pôl, lah ma khân may pô aơ, tơlah khân may tuy dơn nau koh ntâu, pôri Brah Krist mâu jêng khlay ma khân may ôh.

³ Gâp mbơh tay ma lĕ rngôch bunuyh tuy dơn nau koh ntâu pô aơ khân păng nchâp djôt prăp lĕ rngôch nau vay.

⁴ Khân may ŭch dơi kơp sŏng srăng tă bơh nau vay khân may tâm nkhah jêh đah Brah Krist, ƀư roh nau yô̆ jêh.

⁵ Ƀiălah tă bơh nau chroh jêh ri tă bơh tâm Brah Huêng Ueh, hên gŭ kâp nau kâp gân ma nau kơp sŏng srăng.

⁶ Yorlah tâm Brah Yêsu Krist, nau geh nau khlay mâu di ƀư koh ntâu mâu lah mâu koh ntâu, ƀiălah jêng nau chroh tâm mpơl tâm nau rŏng.

⁷ Khân may dôl blau nchuăt tâm ban pônây mbu nơm nkân khân may tông bâr nau ngăn?

⁸ Nau nsŭk nsôr nây mâu geh luh tă bơh Nơm kuăl khân may ôh.

⁹ Ndrui djê̆ lê̆ dơi ƀư ră lĕ mbŭch rnih.

¹⁰ Tâm Kôranh Brah, gâp mĭn n'hêl nanê̆ khân may mâu mra mĭn rvê êng đah gâp; ƀiălah nơm ƀư rsuak khân may, moh ndơ păng jêng kđôi lĕ, mra dơn nau tâm rmal.

¹¹ Hơi phung oh nâu, bi gâp, tơlah gâp hôm mbơh nkoch nau koh ntâu, mâm ƀư bu ăt ƀư mhĭk ma gâp? Tơlah di nâm pônây, si tâm rkăng mâu di jêng nau khan king ôh.

¹² Ŭch ngăn ma phung ƀư rŭng ma khân may, koh char êng săk khân păng nơm jêng lơn!

Nau nkah nti ( 5:13 – 6:18 ) Nau kan bơh nglay săk jêh ri kao play bơh Brah Huêng Ueh

¹³ Hơi phung oh nâu, bu kuăl jêh khân may gay dơn nau kon me; ƀiălah lơi dŏng nau kon me nây tâm ban du mông găl gay gŭ rêh ma nglay săk, ƀiălah sŏk hom nuih n'hâm rŏng gay pah kan ndrăng khân may nơm.

¹⁴ Yorlah lĕ rngôch nau vay dơi trăch tâm du nau ngơi aơ: “May rŏng hom ma phung chiau meng tâm ban ma may nơm.”

¹⁵ Ƀiălah tơlah khân may kăp rvăn ndrăng khân may mro, pôri njrăng hom, klach lah khân may ƀư rai băl ndrăng khân may nơm.

¹⁶ Pôri gâp lah, nhuat hăn hom tĭng nâm Brah Huêng Ueh, lơi mpay lĕ nau nglay săk ŭch.

¹⁷ Yorlah nglay săk geh lĕ nau ŭch êng đah nau Brah Huêng Ueh, jêh ri Brah Huêng Ueh geh lĕ nau ŭch êng đah nglay săk; bar đah tâm rdâng kơt nây, pôri khân may mâu dơi ƀư nau khân may ŭch.

¹⁸ Ƀiălah tơlah Brah Huêng Ueh njŭn leo khân may, khân may mâu gŭ tâm dâng nau vay ôh.

¹⁹ Nau kan bơh nglay săk rah vah jêh, nây jêng nau văng tĭr, nau ƀơ̆ ƀơch, nau blă blơ,

²⁰ mbah rup brah, gŭn rƀên, tâm rlăng, tâm djrel, tâm rmot, ji nuih hâu ngăn, mbeh, mâu maak, tâm nkhah pă mpôl,

²¹ keh nach, nhŭl ndrănh, nhêt sa blă blơ, jêh ri lĕ nau êng tâm ban kơt nây. Gâp mbơh lor ma khân may, tâm ban gâp hŏ tă mbơh lor: Mbu nơm ƀư tih pônây mâu mra dơi dơn ƀon bri hađăch Brah Ndu.

²² Ƀiălah play bơh Brah Huêng Ueh jêng: Nau rŏng, nau maak, nau đăp mpăn, nau srôih, nau ueh, nau blau ƀư ueh, nau răp jăp, nau rdơ̆ rbăn, nau di keh.

²³ Mâu mâp geh nau vay dơi buay lĕ nau nây.

²⁴ Pônây phung jêng bunuyh Brah Yêsu Krist bu pâng kđĭn jêh nglay săk ndrel ma lĕ nau kơnh hâu ir jêh ri nau kơnh ŭch khân păng nơm ta si tâm rkăng jêh.

²⁵ Tơlah he gŭ rêh tă bơh Brah Huêng Ueh, hăn tĭng hom Brah Huêng Ueh.

²⁶ Lơi joi nau lư n'găr mâu nanê̆ gay nsônh jêh ri tâm nuih ndrăng nơm ôh.