Galati 4 - Nau Brah Ndu Ngơi 2023

Kon bunuyh gŭ tâm nau vay mâu lah nau yô̆

¹ Gâp ŭch lah, dôl bunuyh ndơn drăp hôm kon se, nđâp tơlah păng jêng kôranh ma lĕ rngôch drăp ndơ, păng mâu đŏng êng êng đah dĭk ôh.

² Păng hôm gŭ tâm dâng phung nai nti jêh ri bunuyh mât uănh ngih kŏ tât nar mbơ̆ păng tâm nal jêh.

³ He jêng nâm bu pônây lĕ, dôl he hôm kon se, he ƀư dĭk ma lĕ brah êng êng tâm neh ntu.

⁴ Ƀiălah tơlah tât nar tâm nal, Brah Ndu njuăl Kon Păng tât, tă bơh ma du huê bu ur deh, deh luh tâm dâng nau vay,

⁵ gay ma tâm chuai lĕ phung gŭ tâm dâng nau vay, jêh ri tă bơh nĕ he dơi dơn jêng kon rong Păng.

⁶ Yorlah khân may jêng kon, pôri Brah Ndu hŏ njuăl Brah Huêng Ueh Kon Păng gŭ tâm nuih n'hâm he, kuăl: “Aƀa! Mbơ̆!”

⁷ Pônây bơh nau yô̆ Brah Ndu, khân may mâu hôm jêng dĭk ôh, ƀiălah jêng kon; jêh ri tơlah khân may jêng kon, khân may ăt jêng phung dơi ndơn drăp.

Nau Y-Pôl rvê klach

⁸ Kăl e, ê hŏ gĭt năl Brah Ndu, khân may jêng dĭk ma lĕ brah mâu di jêng brah.

⁹ Ƀiălah aƀaơ khân may gĭt năl jêh Brah Ndu, mâu lah di lơn jêng Brah Ndu gĭt năl jêh khân may, mâm ƀư khân may ŭch plơ̆ sĭt ma lĕ ntil brah huêng rdja, o ach nây? Mâm ƀư khân may ŭch plơ̆ tay ƀư dĭk?

¹⁰ Khân may hôm djôt nar, djôt khay, djôt yan, djôt năm!

¹¹ Gâp rvê klach ma khân may, klach lah gâp pah kan jâk jêr dơm dam jêh ma khân may.

¹² Hơi oh nâu, gâp dăn ma khân may plơ̆ jêng hom nâm bu gâp, yorlah gâp jêng nâm bu khân may. Khân may mâu ƀư mhĭk ma gâp ôh.

¹³ Khân may gĭt jêh tơ̆ lor lơn gâp tât mbơh nkoch Nau Mhe Mhan Ueh ma khân may đah du Nglay săk ji kuet;

¹⁴ nđâp tơlah nglay săk gâp jêng du nau rlong uănh ma khân may, khân may mâu đŏng mưch rmot mâu lah dun gâp ôh, ƀiălah khân may vơt rom gâp nâm bu du tông mpăr Brah Ndu, nâm bu vơt rom Brah Yêsu Krist nơm.

¹⁵ Pônây mbah ntŭk nau ueh maak khân may geh? Yorlah gâp mbơh nkoch ma khân may pô aơ, tơlah dơi, khân may rvek găr măt khân may nơm ăn ma gâp.

¹⁶ Pônây gâp plơ̆ jêng nơm rlăng đah khân may yorlah ngơi nau ngăn ma khân may lĕ ƀơh?

¹⁷ Phung nây geh nau duh nđơr ma khân may mâu di yor ma geh nuih n'hâm ueh ôh, ƀiălah khân păng ŭch tâm nkhah tâm pă khân may đah hên gay khân may duh nđơr đah khân păng.

¹⁸ Geh nuih n'hâm duh nđơr ma nau ueh ri mơ nau ueh n'hêl nanê̆ ngăn, mâu di knŏng nôk gâp geh măt ta nklang khân may dơm.

¹⁹ Hơi phung kon gâp, yor phung khân may gâp tuy dơn nau nđêh nji tâm ban ma nau ji deh kon kŏ tât nôk Brah Krist jêng tâm khân may!

²⁰ Gâp ŭch gŭ ndrel ma khân may jêh ri tâm nôk aơ jêh ri săch nau ngơi tâm di, yorlah gâp rŭng răng ngăn yor khân may.

Bar nau tâm rnglăp: H'Agar jêh ri H'Sara

²¹ Lah hom ăn ma gâp gĭt: Jêng phung bunuyh ŭch gŭ tâm dâng nau vay, khân may mâu mâp tăng moh nau vay ngơi nau hĕ?

²² Yorlah geh nau nchih jêh ma Y-Abraham geh bar hê kon bu klâu: du huê jêng kon bu ur dĭk bu, du huê jêng kon bu ur kon me.

²³ Ƀiălah kon bu ur dĭk bu deh tĭng nâm nglay săk, ƀiălah kon bu ur kon me deh tĭng nâm nau ton jêh.

²⁴ Nau aơ tâm ntĭt lĕ bar hê nây jêng bar nau tâm rnglăp. Du nau tâm rnglăp ta yôk Sinai, deh ma kon ăn jêng dĭk, nây jêng H'Agar.

²⁵ H'Agar nâm bu ntĭt yôk Sinai tâm n'gor Arabi, nâm bu ƀon Yêrusalem aƀaơ aơ, yorlah ƀon nây ndrel ma phung kon jêng dĭk da dê.

²⁶ Ƀiălah ƀon Yêrusalem ta klơ trôk jêng kon me; nây jêng me he.

²⁷ Yorlah geh nau nchih: “Hơi bu ur ndrô gâng, mâu deh kon, maak hom! Hơi bu ur mâu mâp ji yorlah deh kon, troh nau hâk răm hom! Yorlah phung kon tă bơh bu ur bu chalơi jêng âk lơn ma kon tă bơh bu ur geh sai.”

²⁸ Hơi oh nâu, tâm ban ma Y-Isăk, khân may jêng kon bơh nau ton.

²⁹ Ƀiălah tâm ban ma rnôk nây, nơm bu deh tĭng nâm nglay săk ƀư mhĭk ma nơm bu deh tĭng nâm Brah Huêng Ueh, aƀaơ ăt tâm ban pônây lĕ.

³⁰ Ƀiălah moh nau nchih tâm Nau Brah Ndu Ngơi? “Mprơh hom bu ur dĭk bu jêh ri kon bu klâu păng, yorlah kon bu klâu bu ur dĭk bu mâu mra dơi dơn drăp ndơ ndrel ma kon bu klâu bu ur kon me ôh.”

³¹ Pôri, hơi phung oh nâu, he mâu di jêng kon bu ur dĭk bu ôh, ƀiălah jêng kon bu ur kon me.