Galati 3 - Nau Brah Ndu Ngơi 2023

Nau vay jêh ri nau chroh ( 3:1 – 5:12 ) Nau kơp sŏng srăng bơh nau chroh

¹ Hơi phung Galati rluk mâl! Mbu moh nkơnh khân may jêng phung bunuyh, rup Brah Yêsu Krist bu pâng kđĭn ta klơ si tâm rkăng dơi tâm mpơl tanăp măt?

² Gâp knŏng ŭch khân may ăn ma gâp gĭt nau aơ: Khân may sŏk dơn jêh Brah Huêng Ueh jêng tă bơh kan nau vay hĕ mâu lah tă bơh nau tăng jêh ri chroh?

³ Mâm ƀư khân may jêng rluk mâl hâu ir kơt nây? Khân may tă bơh Brah Huêng Ueh, mâm ƀư aƀaơ aơ khân may rdŭt ma nglay săk?

⁴ Khân may dơn âk ngăn nau rêh ni gay geh nau dơm dam hĕ? Tơlah kơt nây jêng mâu khlay!

⁵ Nơm ăn Brah Huêng Ueh jêh ri ƀư âk nau mbên khlay ta nklang khân may, jêng yor ma khân may ƀư tĭng nau vay, mâu lah yor ma nau tăng jêh ri chroh?

⁶ Nâm bu Y-Abraham: “chroh ma Brah Ndu, jêh ri păng dơi kơp jêng sŏng srăng.”

⁷ Pôri, khân may gĭt năl hom phung geh nau chroh jêng kon sau Y-Abraham.

⁸ Nau Brah Ndu Ngơi hŏ saơ lor pô aơ Brah Ndu mra kơp phung bu năch jêng sŏng srăng yor ma nau chroh, pôri hŏ nkoch mbơh lor jêh ma Y-Abraham Nau Mhe Mhan Ueh aơ: “Lĕ rngôch mpôl băl bunuyh mra geh nau ueh uĭn tă bơh may.”

⁹ Yor nây, mbu nơm chroh geh nau ueh uĭn ndrel ma Y-Abraham jêng bunuyh geh nuih n'hâm chroh.

¹⁰ Bi lĕ rngôch bunuyh rnơm ma kan nau vay mra geh nau rtăp rak; yorlah geh nau nchih: “Khư ma rak rtăp ngăn ma mbu nơm mâu nâp djôt prăp lĕ ntil hŏ nchih tâm ndrom samƀŭt nau vay!”

¹¹ Nanê̆ ngăn rah vah, mâu mâp geh du huê bunuyh tă bơh nau vay dơi kơp sŏng srăng tanăp măt Brah Ndu, yorlah: “bunuyh sŏng srăng mra gŭ rêh yor nau chroh.”

¹² Nau vay mâu jêng nâm bu nau chroh ôh; ƀiălah geh nchih: “Mbu nơm ƀư tĭng nau vay mra geh nau rêh tă bơh nĕ.”

¹³ Brah Krist tâm chuai jêh he bơh nau rtăp rak bơh nau vay, nôk Păng geh nau rak rtăp ntrok ma he — yorlah geh nau nchih: “Khư ma rak rtăp ngăn ma nơm bu yông klơ tơm si” —

¹⁴ gay tâm Yêsu Krist ma nau ueh lăng prăp ma Y-Abraham tât ma phung bu năch, jêh ri ma nau chroh he dơi sŏk dơn nau ton ma Brah Huêng Ueh.

Nau vay jêh ri nau ton

¹⁵ Hơi phung oh nâu, gâp ngơi nâm kon bunuyh: Tơlah du nau tâm rnglăp hŏ ƀư, nđâp tơlah tă bơh kon bunuyh, pô ri mâu geh du huê bunuyh geh nau dơi chalơi mâu lah ntop n'hŭch lĕ.

¹⁶ Ma lĕ nau ton hŏ ntăm jêh ma Y-Abraham jêh ri ma noi deh păng, Nau Brah Ndu Ngơi mâu lah ôh: “Jêh ri ma lĕ noi deh” tâm ban prăp ma âk bunuyh, ƀiălah lah: “Jêh ri ma noi deh may,” tâm ban knŏng ma du huê bunuyh, nâm bu ntĭt Brah Krist.

¹⁷ Gâp ŭch lah pô aơ: Nau vay, jêng nau văch pakơi nau tâm rnglăp puăn rhiăng pe jât năm, mâu dơi chalơi nau tâm rnglăp Brah Ndu ƀư jêh bơh lor, tâm ban đŏng ƀư roh nau brah nau ton.

¹⁸ Yorlah tơlah bơh nau vay dơi dơn drăp ndơn, pô ri mâu hôm jêng di tă bơh nau ton ôh. Ƀiălah Brah Ndu hŏ dŏng nau ton gay ăn nau yô̆ ma Y-Abraham.

¹⁹ Pôri, mâm ƀư geh nau vay? Bu ntop jêh nau vay yor lĕ nau ƀư tih, jêh ri hôm e tât ma nar bunuyh noi deh tât, nâm bu ntĭt Nơm geh nau ton bơh lor. Nau vay nây mbơh ma bu bơh phung tông mpăr jêh ri bơh bâr mbung du huê nơm tâm nklang.

²⁰ Nơm tâm nklang mâu ntang ma du đah ôh, ƀiălah Brah Ndu knŏng nguay.

Nau vay njŭn leo tât Brah Krist

²¹ Kơt nây nau vay tâm rdâng đah nau Brah Ndu ton lĕ ƀơh? Mâu di ôh! Yorlah tơlah nau vay dơi mbơh djôt leo ăn nau rêh, nanê̆ nau sŏng luh tă bơh nau vay nây.

²² Ƀiălah Nau Brah Ndu Ngơi mbơh da dê lĕ ntil ndơ gŭ tâm dâng nau dơi ktang nau tih, gay ma nau chroh tâm Brah Yêsu Krist, nau ton dơi ăn ma phung chroh.

²³ Lor ma nau chroh tât, bu krŭng he jêh ri gak njrăng he tâm dâng nau vay kŏ tât nôk nau chroh dơi tâm mpơl.

²⁴ Kơt nĕ, nau vay jêng nâm bu nơm njŭn leo he ma tât Brah Krist gay tă bơh nau chroh he dơi kơp sŏng srăng.

²⁵ Ƀiălah tơlah nau chroh tât jêh, he mâu hôm gŭ tâm dâng nau dơi ma nơm ntĭm nây đŏng.

²⁶ Yorlah tă bơh nau chroh tâm Brah Yêsu Krist, lĕ rngôch khân may jêng kon Brah Ndu.

²⁷ Mbu nơm tâm khân may hŏ dơn jêh nau ƀaptem gay jêng phung Brah Krist jêng nsoh Brah Krist yơh.

²⁸ Ta aơ mâu geh kơp rnglah êng phung Yuđa mâu lah phung Grek ôh, phung dĭk mâu lah phung kon me, phung bu klâu mâu lah phung bu ur ôh, yorlah lĕ rngôch khân may jêng nguay tâm Brah Yêsu Krist.

²⁹ Tơlah khân may jêng phung Brah Krist khân may jêng ndŭl mpôl Y-Abraham tâm ban lĕ, jêng phung dơi ndơn drăp tĭng nâm nau ton jêh.