Galati 2 - Nau Brah Ndu Ngơi 2023

Phung Ngih Brah Ndu ta ƀon Yêrusalem dơn Y-Pôl jêng kôranh oh mon

¹ Jât ma puăn năm jêh ma nây, gâp hăn tay ta ƀon Yêrusalem ndrel ma Y-Ƀarnaƀas, djôt leo Y-Tit hăn ndrel đŏng.

² Tĭng nâm nau tâm mpơl, gâp hăn ta nây gay nkoch mbơh ma phung oh nâu gĭt Nau Mhe Mhan Ueh gâp mbơh nkoch ta nklang phung bu năch, ƀiălah knŏng nkoch mbơh ma phung geh nau yơk, klach lah nau gâp nchuăt jêh jêh ri dôl nchuăt mâu geh nau khlay.

³ Nđâp ma Y-Tit, nơm hăn ndrel ma gâp, nđâp tơlah phung Grek, bu mâu nchâp păng koh ntâu ôh.

⁴ Hên hŏ ƀư tâm ban lĕ yorlah geh ƀaƀă phung nklă jêng oh nâu, khân păng mŭt ntŭng tâm nklang hên, kâp uănh nau kon me hên geh jêh tâm Brah Yêsu Krist gay nhŭp hên ƀư dĭk.

⁵ Hên mâu ăn nuih n'hâm ma khân păng du ƀât lât, gay ma nau ngăn bơh Nau Mhe Mhan Ueh gŭ nâp ngăn ngên tâm khân may.

⁶ Bi ma phung dơi uănh jêng yơk (kăl e ri khân păng jêng mbu nơm kđôi lĕ, mâu đŏng geh nau tât ma gâp ôh; Brah Ndu mâu gŭ du ding ôh) ri mơ khân păng mâu đŏng ăn ntop ndơ ma gâp.

⁷ Pô ri, tơlah khân păng saơ nau mbơh nkoch Nau Mhe Mhan Ueh ma phung mâu koh ntâu jao jêh ma gâp, nâm bu nau mbơh nkoch jêh Nau Mhe Mhan Ueh ma phung koh ntâu jao jêh ma Y-Pêtrôs —

⁸ yorlah Brah Ndu, Nơm pah kan tâm Y-Pêtrôs gay njuăl păng ƀư kôranh oh mon ma phung koh ntâu, Nơm nây pah kan tâm gâp gay njuăl gâp ƀư kôranh oh mon ma phung bu năch —

⁹ jêh ri tơlah gĭt năl jêh nau yô̆ ăn jêh ma gâp, Y-Yakơ, Y-Sêphas jêh ri Y-Yôhan, phung bu yơk jêng meh n'gâng, khân păng jao ti pa ma tâm nkol ma Y-Ƀarnaƀas jêh ri ma gâp gay hên hăn tât ta phung bu năch, bi khân păng hăn tât ta phung koh ntâu.

¹⁰ Knŏng khân păng rkê̆ch tay hên du ntil kan jêng kah gĭt ma phung o ach, jêng nau gâp hŏ nđơr ƀư ngăn.

Y-Pôl Nduyh Y-Pêtrôs

¹¹ Ƀiălah dôl Y-Sêphas tât ta ƀon Antiôs, gâp mpơl lĕ tâm rdâng đah păng yorlah păng khư nduyh.

¹² Êlor phung bơh Y-Yakơ tât, păng ăt sông sa ndrel ma phung bu năch. Ƀiălah tơlah khân păng tât, păng rŭch plơ̆ jêh ri du gŭ êng, yorlah klach ma phung koh ntâu.

¹³ Phung Yuđa êng ƀư đŏng pưt nau ngăn tâm ban păng, kŏ tât Y-Ƀarnaƀas nơm ƀư đŏng tĭng nau nuih n'hâm nklă khân păng.

¹⁴ Dôl saơ khân păng mâu hăn sŏng tĭng nau ngăn bơh Nau Mhe Mhan Ueh, gâp lah ma Y-Sêphas tanăp lĕ rngôch bunuyh pô aơ: “Tơlah may jêng bunuyh Yuđa, ƀiălah gŭ rêh tĭng nau phung bu năch, mâu kơt nâm bu phung Yuđa ôh, mâm ƀư may nchâp phung bu năch gŭ rêh tĭng nâm nau phung Yuđa?”

Phung Yuđa jêh ri phung bu năch geh nau tâm rklaih tă bơh nau chroh

¹⁵ Hên jêng phung Yuđa bơh ndŭl mê̆ hên, mâu di jêng phung geh nau tih tă bơh phung bu năch ôh.

¹⁶ Ƀiălah hên gĭt du huê dơi kơp sŏng srăng mâu di yor lĕ kan bơh nau vay ôh, ƀiălah ma nau chroh tâm Brah Yêsu Krist, yor nây hên chroh jêh ma Brah Krist gay dơi kơp sŏng srăng yor ma nau chroh tâm Brah Krist, mâu di yor ma kan bơh nau vay ôh; yorlah mâu du huê dơi kơp sŏng srăng tă bơh kan bơh nau vay ôh.

¹⁷ Ƀiălah tơlah dôl hên joi nau gay dơi kơp sŏng srăng tâm Brah Krist, ƀiălah bu uănh hên jêng bunuyh geh tih, pôri di lĕ Brah Krist jêng bunuyh pah kan ma nau tih? Mâu di ôh!

¹⁸ N'hêl nanê̆ yơh, tơlah gâp rdâk tay lĕ nau gâp nơm hŏ ƀư rai jêh, gâp tâm mpơl ma gâp nơm jêng du huê nơm ƀư tih.

¹⁹ Yorlah ma nau vay yơh, gâp khĭt jêh ma nau vay nây gay gŭ rêh ma Brah Ndu.

²⁰ Bu pâng kđĭn jêh gâp ta si tâm rkăng ndrel ma Brah Krist, jêh ri gâp gŭ rêh, mâu di gâp gŭ rêh đŏng, ƀiălah Brah Krist gŭ rêh tâm gâp. Aƀaơ aơ gâp gŭ rêh tâm nglay săk, nâm bu ntĭt gâp gŭ rêh tâm nau chroh ma Kon Brah Ndu, jêng Nơm rŏng jêh ma gâp jêh ri jao jêh Păng nơm yor gâp.

²¹ Gâp mâu ŭch ôh ƀư nau Brah Ndu yô̆ jêng dơm dam; yorlah tơlah bu dơi geh nau kơp sŏng srăng tă bơh nau vay, nau Brah Krist khĭt jêng dơm dam yơh.