Galati 1 - Nau Brah Ndu Ngơi 2023

Nau mbah jô̆ khâl

¹ Y-Pôl, jêng kôranh oh mon mâu di bơh phung bunuyh mâu lah bơh du huê bunuyh, ƀiălah bơh Brah Yêsu Krist jêh ri Brah Ndu jêng Mbơ̆, Nơm ƀư ăn Păng dâk rêh tay tă bơh nau khĭt,

² ndrel ma lĕ rngôch phung oh nâu dôl gŭ ndrel gâp, njuăl ma Phung Ngih Brah Ndu ta n'gor Galati.

³ Mbơh sơm dăn Brah Ndu, Mbơ̆ he, jêh ri Kôranh Brah jêng Brah Yêsu Krist ăn ma nau yô̆ jêh ri nau đăp mpăn ma khân may.

⁴ Brah Yêsu Krist hŏ sân săk Păng nơm yor nau tih he gay ma tâm rklaih he bơh rnôk rô̆ djơh mhĭk aơ, tĭng di nâm nau mĭn Brah Ndu ŭch, Mbơ̆ he.

⁵ Dăn Păng dơi geh nau chrêk rmah n'ho ro mâu blau lôch! Amen.

Nau Y-Pôl pah kan jêng kôranh oh mon ( 1:6 – 2:21 ) Mâu geh Nau Mhe Mhan Ueh êng

⁶ Gâp hih rhâl ngăn dôl saơ khân may gơnh chalơi Nơm hŏ kuăl khân may tâm nau yô̆ bơh Brah Krist gay tĭng nau mhe mhan ueh êng.

⁷ Mâu geh nau mhe mhan ueh êng ôh, ƀiălah geh knŏng ƀaƀă bunuyh ƀư rsuak khân may jêh ri ŭch nsak nkhăng Nau Mhe Mhan Ueh Brah Krist.

⁸ Ƀiălah tơlah geh nơm, nđâp tơlah hên nơm mâu lah tông mpăr tă bơh trôk kđôi lĕ, ntăm ma khân may du ntil nau mhe mhan ueh êng đah Nau Mhe Mhan Ueh hên mbơh jêh ma khân may, păng nây khư geh anathem!

⁹ Nâm bu hên lah jêh ma khân may bơh lor, aƀaơ aơ gâp rkê̆ch tay, tơlah geh du huê bunuyh ntăm ma khân may du nau mhe mhan ueh êng đah Nau Mhe Mhan Ueh khân may dơn jêh, nơm nây khư geh nau rak rtăp.

¹⁰ Bi aƀaơ aơ, gâp ŭch sŏk nuih n'hâm kon bunuyh mâu lah Brah Ndu? Di lĕ gâp ŭch ƀư maak nuih n'hâm ma bunuyh? Tơlah gâp ăt srôih ƀư maak nuih n'hâm ma kon bunuyh, gâp mâu di jêng oh mon ma Brah Krist ôh.

Nau kuăl Y-Pôl jêng kôranh oh mon

¹¹ Hơi phung oh nâu, gâp ŭch ăn khân may gĭt pô aơ Nau Mhe Mhan Ueh gâp mbơh jêh mâu luh bơh kon bunuyh ôh;

¹² yorlah gâp mâu mâp dơn jêh ri mâu lĕ mâp nti Nau Mhe Mhan Ueh nây tă bơh du huê bunuyh, ƀiălah tă bơh nau Yêsu Krist tâm mpơl.

¹³ Na nê̆ khân may tăng jêh ma nau gâp rêh rnôk kăl e dôl gâp hôm tĭng nau phung Yuđa chroh jêng mâm nau. Gâp ƀư mhĭk hâu ngăn jêh ri ŭch ƀư rai Phung Ngih Brah Ndu.

¹⁴ Tâm nau phung Yuđa chroh, gâp rlau lơn ma âk phung Yuđa rnôk ndrel ma gâp, yorlah gâp duh nđơr rlau keh đah lĕ nau vay ơm phung chô yau gâp nơm.

¹⁵ Ƀiălah tơlah Brah Ndu, Nơm prăp êng gâp bơh tâm ndŭl mê̆ jêh ri kuăl gâp ma nau yô̆,

¹⁶ maak nuih n'hâm mpơl Kon Păng ma gâp, gay gâp nkoch mbơh Nau Mhe Mhan Ueh ma Kon Păng ta nklang phung bu năch, pôri ƀât lât gâp mâu hôm tâm nchră đah kon bunuyh ôh.

¹⁷ Gâp mâu đŏng hăn ta ƀon Yêrusalem gay ma tâm mâp đah phung kôranh oh mon lor lơn ma gâp, ƀiălah gâp hăn tât ta n'gor Arabi, pakơi nây gâp plơ̆ sĭt ta ƀon Đamas.

¹⁸ Pe năm pakơi, gâp hăn ta ƀon Yêrusalem gay ƀư bên đah Y-Sêphas jêh ri gŭ ndrel ma păng jât ma prăm nar;

¹⁹ ƀiălah gâp mâu mâp du huê kôranh oh mon êng ôh, knŏng mâp Y-Yakơ jêng oh Kôranh Brah.

²⁰ Nanê̆ ngăn, tanăp Kôranh Brah gâp mâu ngơi mƀruh ma lĕ nau gâp nchih ma khân may.

²¹ Pakơi nây, gâp hăn rgăn lĕ nkual tâm n'gor Siri jêh ri Silisi.

²² Rnôk nây, lĕ Phung Ngih Brah Ndu Brah Krist tâm n'gor Yuđa ê hŏ gĭt năl muh măt gâp ôh.

²³ Knŏng khân păng tăng ngơi pô aơ: “Nơm ƀư mhĭk ma he kăl e, aƀaơ păng mbơh nkoch nau chroh, rnôk lor ri păng hŏ tă ŭch ƀư rai.”

²⁴ Pôri, khân păng tâm rnê Brah Ndu yor gâp.