Êsther 9 - Nau Brah Ndu Ngơi 2023

Phung Yuđa dơi đah phung rlăng khân păng

¹ Tâm khay jât ma bar jêng khay Ađar, ta nar jât ma pe khay nây, tơlah nau ntăm jêh ri samƀŭt nau ntrŭnh bơh hađăch dăch tât nar năng dơi ƀư, jêng nar phung rlăng tâm nal tŭn jot phung ƀon lan Yuđa, ƀiălah nau nây jêng tâm rgâl lơi, phung Yuđa geh nau dơi tŭn jot phung rlăng khân păng nơm.

² Phung Yuđa tâm rgum tâm lĕ ƀon khân păng lam lĕ n'gor hađăch Asuêrus, gay yơr ti rduh lơh ma phung ŭch ƀư roh lơi ma khân păng. Mâu geh bunuyh dơi tâm rdâng đah khân păng yorlah lĕ ntil mpôl bunuyh klach ngăn ma phung Yuđa.

³ Lĕ rngôch phung kôranh n'gor, kôranh kuăn bôk, kôranh chiă uănh, jêh ri kôranh chiă uănh phung ta ngih hađăch, kâp kơl phung Yuđa da dê, yorlah khân păng klach yơk Y-Môrdêkai.

⁴ Y-Môrdêkai geh nau dơi toyh tâm ngih hađăch, nau lư n'găr păng hăn lam lĕ rngôch n'gor; nau dơi Y-Môrdêkai lơ nar lơ hao toyh.

⁵ Phung Yuđa sŏk đao lơh nkhĭt phung rlăng khân păng, nkhĭt lơi jêh ri ƀư rai lơi khân păng. Khân păng ƀư ma phung rmot khân păng tĭng nau mĭn khân păng ŭch.

⁶ Ta ƀon Susa, phung Yuđa lơh nkhĭt prăm rhiăng nuyh.

⁷ Khân păng lơh nkhĭt tâm ban lĕ Y-Parsandatha, Y-Dalphôn, Y-Aspatha,

⁸ Y-Pôratha, Y-Adalia, Y-Aridatha,

⁹ Y-Parmasta, Y-Arisai, Y-Aridai, jêh ri Y-Vaisatha,

¹⁰ jêng phung jât nuyh kon bu klâu Y-Haman, sau Y-Hamêdatha, jêng phung rlăng đah phung Yuđa. Ƀiălah khân păng mâu pit in drăp ndơ ôh.

¹¹ Tâm nar nây, bu mbơh ma hađăch gĭt rnoh bunuyh bu nkhĭt tâm ƀon Susa.

¹² Hađăch ngơi lah ma hađăch bu ur H'Êsther pô aơ: “Phung Yuđa hŏ lơh nkhĭt prăm rhiăng nuyh tâm ƀon Susa, jêh ri jât nuyh kon bu klâu Y-Haman. Moh nau khân păng ƀư jêh tâm lĕ rngôch n'gor hađăch? Aƀaơ moh nau ay ŭch dăn, gâp mra ăn. Moh nau ay hôm dăn đŏng, gâp mra ăn!”

¹³ H'Êsther lah: “Tơlah di nau hađăch mĭn, tâm nar ôi taơ ăn hom ma phung Yuđa gŭ tâm ƀon Susa dơi ƀư tâm ban lĕ tĭng nâm nau ntrŭnh nar aơ; ƀiălah ăn yông trô ko jât nuyh kon bu klâu Y-Haman.”

¹⁴ Hađăch ntrŭnh nau ntăm ăn bu ƀư nau nây, jêh ri bu ăn du nau ntrŭnh tâm ƀon Susa. Bu yông trô ko phung jât nuyh kon bu klâu Y-Haman.

¹⁵ Phung Yuđa gŭ tâm ƀon Susa tâm rgum tâm ban lĕ ta nar jât ma puăn, khay Adar, jêh ri lơh nkhĭt tay pe rhiăng nuyh ƀon Susa; ƀiălah khân păng mâu pit in ôh drăp ndơ.

¹⁶ Phung Yuđa êng gŭ tâm lĕ n'gor hađăch tâm rgum tâm ban lĕ ŭch king n'gang nau rêh khân păng, tâm lơh đah phung rlăng khân păng, jêh ri nkhĭt pơh rmưn prăm rbăn nuyh phung tâm rmot ma khân păng. Ƀiălah khân păng mâu pit in ôh drăp ndơ.

¹⁷ Bu ƀư nau nây ta nar jât ma pe khay Adar. Tât nar jât ma puăn khay nây khân păng gŭ rlu jêh ri njêng jêng du nar sông sa răm maak.

Nau rƀŭn Purim

¹⁸ Ƀiălah phung Yuđa gŭ ta ƀon Susa tâm rgum tâm nar jât ma pe jêh ri jât ma puăn khay nây; jêh ri nar jât ma prăm khay nây khân păng gŭ rlu njêng jêng du nar sông sa răm maak.

¹⁹ Yor nây, phung Yuđa, gŭ tâm lĕ rngôch ƀon jê̆, prăp nar jât ma puăn, khay Adar jêng du nar răm maak, jêh ri nhêt sông, du năng nar tâm njŭn ndơ sông sa ma ndrăng khân păng.

²⁰ Y-Môrdêkai nchih prăp lĕ nau nây jêh ri njuăl samƀŭt ma lĕ rngôch phung Yuđa gŭ tâm lĕ rngôch n'gor tâm bri Hađăch Asuêrus, dăch mâu lah ngai,

²¹ gay ntĭnh khân păng djôt prăp nar jât ma puăn jêh ri nar jât ma prăm, khay Adar ăp năm.

²² Yorlah tâm nar jêh ri khay nây, phung Yuđa hŏ dơi rklaih jêh tă bơh phung rlăng khân păng; tâm nau rêh ni plăch jêng nau răm rhơn jêh ri nar rngot klâng plăch jêng nar nau sông sa. Păng lah ma khân păng njêng nar nau sông sa jêh ri hâk răm; ăp nơm njŭn ndơ sa ndrăng khân păng, jêh ri ndơ nhhơr kơl ma phung o ach.

²³ Phung Yuđa thoi đŏng djôt prăp nau rƀŭn nây jêh ri ƀư tĭng nâm nau Y-Môrdêkai nchih njuăl jêh ma khân păng.

²⁴ Yorlah Y-Haman, kon bu klâu Y-Hamêdatha, bunuyh Agak, nơm rlăng ma lĕ rngôch phung Yuđa, hŏ tâm nchră jêh ŭch ƀư rai phung ƀon lan Yuđa jêh ri ƀư nau nchroh Pur, nâm bu ntĭt nchroh n'hôr, gay ngluh lơi jêh ri ƀư rai lĕ khân păng.

²⁵ Ƀiălah tơlah nau nây tât tôr hađăch, hađăch ăn samƀŭt nau ntrŭnh pô aơ lĕ nau nchră djơh mhĭk bơh Y-Haman mĭn ŭch ƀư mhĭk ma phung Yuđa mra mplơ̆ sĭt ma bôk păng nơm. Bu yông trô ko păng nđâp ma phung kon bu klâu păng ta tơm si yông trô ko.

²⁶ Yor nây, bu ntơ nar nây Purim tĭng nâm nau ngơi Pur. Yor lĕ rngôch nau nchih jêh tâm samƀŭt nây jêh ri lĕ nau khân păng saơ tâm nau lĕ nau tât jêh ma khân păng

²⁷ pôri phung Yuđa njêng ma khân păng nơm, ma phung kon sau khân păng jêh ri ma lĕ rngôch phung tâm rnglăp ndrel ma khân păng jêng du nau vay: Ăp năm djôt prăp bar nar di tĭng nâm samƀŭt, tâm mông hŏ nal jêh ăp năm, mâu dơi chalơi ôh.

²⁸ Ăn kah gĭt jêh ri prăp bar nar nây tâm ăp ndŭl mpôl, tâm ăp n'gor, tâm lĕ rngôch rô̆. Lĕ nar Purim aơ mâu mra dơi roh tâm phung Yuđa jêh ri nau rƀŭn ndray nây mâu roh ôh tâm phung kon sau khân păng.

²⁹ Hađăch bu ur H'Êsther, kon bu ur Y-Abihai, jêh ri Y-Môrdêkai, phung Yuđa, nchih samƀŭt rơh bar ma lĕ nau dơi nanê̆ ngăn gay ntĭm phung Yuđa djôt mray nar nau rƀŭn Purim.

³⁰ Bu njuăl lĕ samƀŭt ma lĕ rngôch phung Yuđa tâm du rhiăng bar jât ma pơh n'gor tâm ƀon bri hađăch Asuêrus ma nau ngơi đăp mpăn jêh ri nau ngăn.

³¹ Lĕ samƀŭt nây gay ƀư n'hêl nê̆ ma lĕ nar Purim nây bu mra djôt prăp ta năng nar hŏ tâm nal jêh, di nâm Y-Môrdêkai, phung Yuđa, jêh ri hađăch bu ur H'Êsther ntĭnh jêh. Phung Israel ƀư di tĭng nâm Y-Môrdêkai jêh ri H'Êsther hŏ njêng ma khân păng jêh ri ma phung kon sau khân păng, ma nau ât sông sa jêh ri nau nhĭm nhhiăng.

³² Pônây, nau hađăch bu ur H'Êsther ntăm ăn nanê̆ nar rƀŭn Purim bu nchih jêh tâm ndrom samƀŭt nây.