Êsther 8 - Nau Brah Ndu Ngơi 2023

Hađăch ăn samƀŭt nau ntrŭnh gay rklaih phung Yuđa tă bơh nau ƀư rai

¹ Tâm nar nây, hađăch Y-Asuêrus ăn ma hađăch bu ur H'Êsther ngih Y-Haman, jêng nơm rlăng đah phung Yuđa. Bi ma Y-Môrdêkai văch tanăp hađăch, yorlah H'Êsther mbơh păng jêng dăch deh đah păng nơm.

² Hađăch doh lơi rgên ti păng hŏ ăn jêh bơh Y-Haman jêh ri ăn ma Y-Môrdêkai. H'Êsther dơm ma Y-Môrdêkai mât uănh ngih Y-Haman.

³ H'Êsther ngơi đŏng ma hađăch, păng chon mon ta jâng hađăch nhhiăng nhĭm jêh ri vơh vơl ma hađăch nkân lơi nau nchră nau mhĭk ƀai Y-Haman, bunuyh Agak, nau păng hŏ ŭch mĭn tâm rdâng đah phung Yuđa.

⁴ Hađăch yơr mâng jra mah ma H'Êsther jêh ri păng dâk panăp hađăch.

⁵ Păng lah: “Tơlah di nau hađăch mĭn, tơlah gâp geh nau yô̆ tanăp măt hađăch, jêh ri tơlah hađăch saơ nau aơ jêng di jêh ri tơlah gâp ƀư ueh ma măt hađăch, dăn ma hađăch ntrŭnh gay chalơi lĕ samƀŭt Y-Haman, kon bu klâu Y-Hamêdatha, bunuyh Agak, hŏ nchră nchih njuăl jêh gay ƀư rai lơi phung Yuđa gŭ tâm lĕ rngôch n'gor bri hađăch.

⁶ Yorlah mâm gâp uănh saơ nau mhĭk tât ma phung ƀon lan gâp? Mâu lah mâm gâp saơ nau ƀư rai phung ndŭl mpôl gâp?”

⁷ Hađăch Y-Asuêrus lah ma hađăch bu ur H'Êsther jêh ri ma Y-Môrdêkai, phung Yuđa, pô aơ: “Aơ, gâp ăn jêh ma H'Êsther ngih Y-Haman, jêh ri bu yông trô ko păng yorlah păng hŏ yơr ti ƀư mhĭk ma phung Yuđa.

⁸ Pôri khân ay may sŏk hom amoh gâp nchih moh nau di khân ay may nơm mĭn ma phung Yuđa, jêh nây sŏk rgên ti gâp tâp pŏng. Yorlah samƀŭt nau ntrŭnh nây hŏ nchih tâm amoh gâp jêh ri tâp pŏng ma rgên ti gâp, bu mâu dơi chalơi ôh.”

⁹ Nar nây, tâm khay pe, jêng khay Sivan, ta nar bar jât ma pe, bu kuăl rgum phung kôranh nchih samƀŭt ma hađăch. Tĭng nâm nau Y-Môrdêkai ntĭnh, khân păng nchih samƀŭt tât ma phung Yuđa, jêh nây njuăl ma phung kôranh kuăn bôk, kôranh chiă uănh jêh ri phung kôranh bôk n'gor, ntơm bơh India tât ma Êthiôpi, jêng du rhiăng bar jât ma pơh n'gor. Lĕ n'gor tĭng nâm rplay samƀŭt nchih n'gor nây, ăp ntil mpôl bunuyh tĭng nâm nau khân păng ngơi, jêh ri nchih đŏng ma phung Yuđa tĭng nâm rplay samƀŭt jêh ri nau ngơi khân păng.

¹⁰ Y-Môrdêkai sŏk amoh hađăch Asuêrus gay nchih samƀŭt jêh ri tâp pŏng ma rgên ti hađăch jêh ri păng prơh phung djôt leo samƀŭt hăn; khân păng ncho seh prăl, jêng mpôl seh êng ngăn bu prăp ma phung ta ngih hađăch.

¹¹ Tâm samƀŭt nây, hađăch ăn nau dơi ma phung Yuđa gŭ tâm ăp n'gor, ăp ƀon hađăch Y-Asuêrus tâm rƀŭn gay king n'gang nau rêh khân păng nơm, ƀư rai, nkhĭt lơi, rai yot lĕ phung djôt ndơ tâm lơh rduh lơh khân păng, mâu kơp moh phung ƀon lan, moh n'gor, bu ur mâu lah phung kon se jê̆ jêh ri sŏk pit drăp ndơ khân păng.

¹² Nau ntrŭnh nây dơi ƀư knŏng tâm du nar jêng nar jât ma pe khay jât ma bar, jêng khay Adar.

¹³ Du pŏk samƀŭt kơt nchih nau ntrŭnh bu ăn du luh jêng du nau vay jêh ri bu mbơh tâm ăp n'gor ma lĕ rngôch phung ƀon lan, jêh ri phung Yuđa dơi nkra ta nar nây gay plơng bôk ma phung rlăng khân păng nơm.

¹⁴ Pôri phung djôt leo samƀŭt ncho seh prăl, jêng seh mpôl êng ngăn bu prăp ta ngih hađăch. Bu mbơh đŏng nau vay nây ta ƀon Susa.

¹⁵ Y-Môrdêkai hăn luh bơh ngih hađăch, nsoh ao hađăch ĭr jêh ri nglang, ndô du mlâm đon hađăch toyh ma mah jêh ri nsoh du ao jong ma bok mhay rhên chăng krăk. Phung ƀon lan ƀon Susa troh nter jêh ri răm rhơn.

¹⁶ Ma phung Yuđa, aơ jêng nar nau ang, răm maak, nau hâk răm ngăn jêh ri nau chrêk rmah.

¹⁷ Tâm ăp n'gor, tâm ăp rplay ƀon, ta ntŭk geh jêh nau ntăm jêh ri samƀŭt nau ntrŭnh bơh hađăch lĕ tât, pôri phung Yuđa răm maak jêh ri hâk răm ngăn, du nau nhêt sông toyh jêh ri sông sa tâm nau răm maak. Geh âk bunuyh tâm phung ntil mpôl bunuyh êng tâm n'gor chroh đŏng tĭng nâm phung Yuđa, yorlah khân păng klach krit ngăn ma phung Yuđa.