Êsther 7 - Nau Brah Ndu Ngơi 2023

Nau bu yông trô ko Y-Haman

¹ Pôri, hađăch jêh ri Y-Haman tât râng nau sông sa ndrel hađăch bu ur H'Êsther.

² Nar tal bar, dôl râng nhêt ndrănh, hađăch lah đŏng ma H'Êsther: “Hơi hađăch bu ur H'Êsther, moh nau ay ŭch dăn, gâp mra ăn nau nây ma ay. Moh nau ay ŭch, nđâp lah kŏ tât n'gul ƀon bri hađăch gâp, gâp mra ăn đŏng.”

³ Hađăch bu ur H'Êsther plơ̆ lah: “Hơi hađăch, tơlah gâp geh nau yô̆ tanăp may jêh ri tơlah di nau hađăch mĭn, dăn may rklaih nau rêh gâp jêh ri nau rêh phung ƀon lan gâp.

⁴ Yorlah bu tăch jêh gâp jêh ri phung ƀon lan gâp, ŭch ƀư rai lơi, nkhĭt lơi, jêh ri ƀư rai lôch lơi. Tơlah tăch hên gay ăn ƀư dĭk, gâp hŏ gŭ rklăk, yorlah nau rêh ni phung ƀon lan gâp mâu dơi tâm ntĭt ôh nau uh ah hađăch.”

⁵ Hađăch Y-Asuêrus ngơi đah hađăch bu ur H'Êsther: “Mbu moh nây? Ta ntŭk păng gŭ, nơm janh ƀư nau aơ?”

⁶ H'Êsther plơ̆ lah: “Du huê rlăng jêh ri mhĭk jêng Y-Haman djơh aơ yơh!” Rnôk nây, Y-Haman klach ngăn tanăp hađăch jêh ri hađăch bu ur.

⁷ Hađăch hao ji nuih, dâk tă bơh sưng sông sa, hăn lăp tâm n'gar kao ngih hađăch. Bi Y-Haman, yorlah păng saơ jêh hađăch hŏ tâm nal jêh ƀư mhĭk ma păng, pôri păng gŭ gay vơl dăn hađăch bu ur H'Êsther gay rklaih nau rêh păng nơm.

⁸ Tơlah hađăch tă bơh n'gar kao ngih hađăch plơ̆ sĭt lăp ma ntŭk sông sa, Y-Haman dôl chon mon ta sưng bê̆ch ntŭk H'Êsther dôl gŭ. Hađăch lah: “Tâm ngih hađăch tanăp măt gâp, mâm dĭng păng hôm janh ƀư bêk hađăch bu ur?” Nau ngơi mhe luh bơh trôm mbung hađăch, bu nkŭm muh măt Y-Haman.

⁹ Y-Harbôna, du huê kôranh bu char dăch hađăch lah: “Ri, tơm si yông trô ko, prêh bar jât ma prăm met, Y-Haman hŏ ndâk rơm ndrăp tâm ngih păng nơm gay yông Y-Môrdêkai, jêng bunuyh hŏ mbơh gay rklaih nau rêh hađăch.” Hađăch lah: “Yông hom păng ta nây!”

¹⁰ Pônây, bu yông trô ko Y-Haman ta tơm si yông trô ko păng nơm hŏ ndâk jêh ma Y-Môrdêkai. Jêh nây nau hađăch ji nuih aih jêh.