Êsther 6 - Nau Brah Ndu Ngơi 2023

Y-Haman bêk prêng tanăp măt Y-Môrdêkai

¹ Măng nây, hađăch mâu hăk bê̆ch ôh. Hađăch ntĭnh bu njŭn tâm ndrom samƀŭt nau rêh jêng ma phung hađăch rŏ ma hađăch tăng.

² Tâm ndrom samƀŭt geh bu nchih nau Y-Môrdêkai gĭt nau tâm nchră Y-Bikthan jêh ri Y-Têres jêng bar hê kôranh bu char hađăch geh nau kan gak njrăng mpông pêr, ŭch nkhĭt hađăch Y-Asuêrus.

³ Hađăch lah: “Yor nau kan nây, Y-Môrdêkai dơi geh nau chrêk rmah jêh ri ăn nau nkhôm ma păng lĕ?” Phung oh mon hađăch plơ̆ lah: “Bu mâu mâp ƀư ma păng du ntil nau ôh.”

⁴ Hađăch ôp: “Mbu nơm gŭ padih tâm nkual nhuang?” Rnôk nây, Y-Haman mhe hăn lăp tâm nkual nhuang, jêng tâm nkual padih ngih hađăch, gay dăn hađăch ntrŭnh nau yông trô ko Y-Môrdêkai ta n'gâng yông trô ko păng nkra jêh ma Y-Môrdêkai.

⁵ Phung oh mon hađăch mbơh: “Ri, Y-Haman dâk ta nkual nhuang nây.” Hađăch lah: “Ăn păng lăp.”

⁶ Y-Haman hăn lăp, hađăch ôp ma păng pô aơ: “Mâm bu mra ƀư ma bunuyh nơm hađăch ŭch yơk?” Y-Haman mĭn tâm nuih n'hâm păng: “Ma mbu nơm hađăch ŭch yơk, rlau lơn ma gâp lĕ?”

⁷ Pôri Y-Haman lah ma hađăch: “Ma bunuyh nơm hađăch ŭch yơk

⁸ ăn păng nsoh ao hađăch, ao hađăch vay nsoh, ncho seh hađăch ncho, jêh ri geh đon hađăch ndô ta klơ bôk bunuyh nây.

⁹ Ao hađăch jêh ri seh jao hom tâm ti kôranh toyh hađăch gay nsoh ma nơm hađăch ŭch yơk, jêh nây njŭn leo nơm nây ncho seh nsong jŭm nkual toyh tâm ƀon jêh ri mbơh pô aơ: ‘Bu mra ƀư tâm ban pônây ma bunuyh hađăch ŭch yơk.’”

¹⁰ Hađăch lah ma Y-Haman: “Gơnh ndal hom djôt leo ao hađăch jêh ri seh, nâm bu nau may lah jêh, jêh ri ƀư pônây ma Y-Môrdêkai, bunuyh Yuđa, dôl gŭ ta mpông pêr ngih hađăch, lơi chalơi du ntil lĕ rngôch nau may hŏ lah.”

¹¹ Y-Haman njŭn leo seh jêh ri sŏk ao hađăch nsoh an ma Y-Môrdêkai, jêh nây leo păng ncho seh nsong jŭm nkual toyh tâm ƀon, jêh ri nter lah tanăp măt păng pô aơ: “Bu mra ƀư tâm ban pônây ma bunuyh hađăch ŭch yơk!”

¹² Jêh nau nây, Y-Môrdêkai plơ̆ sĭt ta ntŭk mpông pêr ngih hađăch. Bi ma Y-Haman hăn sĭt ndal leo ta ngih păng nơm, rngot rvê jêh ri nkŭm bôk păng.

¹³ Y-Haman nkoch bri ma ur păng jêng H'Sêres jêh ri ma lĕ rngôch phung mĭt jiăng păng ăp ntil nau tât jêh ma păng. Nôk nây phung blau mĭn păng jêh ri H'Sêres, ur păng lah ma păng: “May ntơm tŭp jêh tanăp măt Y-Môrdêkai; tơlah păng jêng tâm mpôl phung Yuđa, pôri may mâu mra dơi ôh, ƀiălah n'hêl nanê̆ mra cha lôt tanăp păng.”

¹⁴ Tơlah khân păng hôm e dôl nkoch bri đah Y-Haman, phung kôranh bu char hađăch tât ndal, jêh ri leo Y-Haman hăn tât ma nau sông sa H'Êsther nkra jêh.