Êsther 5 - Nau Brah Ndu Ngơi 2023

H'Êsther nkra nau sông sa nhhơr ma hađăch

¹ Ta nar tal pe, H'Êsther nsoh ao hađăch bu ur păng jêh ri păng dâk tâm trôm nhuang ngih hađăch. Hađăch dôl gŭ ta sưng hađăch tra ntŭk lăp jrô toyh hađăch.

² Tơlah hađăch saơ hađăch bu ur H'Êsther gŭ tâm trôm nhuang, păng geh nau yô̆ tanăp măt hađăch. Hađăch yơr mâng jra ma mah tâm ti hađăch nơm tât mpeh ma H'Êsther. H'Êsther hăn dăch jêh ri pah ta chiông mâng jra hađăch.

³ Hađăch ngơi ma păng: “Moh nau tât, hơi hađăch bu ur H'Êsther? Moh nau ay ŭch dăn? Nđâp tơlah ay dăn kŏ tât du n'gul ƀon bri hađăch gâp, gâp mra ăn đŏng.”

⁴ H'Êsther lah: “Tơlah di nau hađăch mĭn, dăn hađăch jêh ri Y-Haman văch nar aơ ma nau sông sa gâp nkra jêh ma hađăch.”

⁵ Hađăch lah: “Jă hom Y-Haman hăn tât gơnh, tĭng nâm nau hađăch bu ur hŏ lah.” Pôri hađăch jêh ri Y-Haman hăn ma nau sông sa H'Êsther nkra jêh.

⁶ Dôl khân păng râng nau sông sa nhêt ndrănh, hađăch lah ma H'Êsther: “Moh ndơ ay ŭch dăn? Gâp mra ăn ma ay! Moh nau ay ŭch? Nđâp tơlah du n'gul ƀon bri hađăch gâp, gâp mra ăn đŏng!”

⁷ H'Êsther lah: “Aơ jêng ndơ gâp dăn jêh ri nau gâp ŭch:

⁸ Tơlah gâp geh jêh nau yô̆ tanăp măt hađăch, jêh ri tơlah hađăch maak nuih n'hâm ăn ndơ gâp dăn jêh ri ndơ gâp ŭch, ăn hađăch jêh ri Y-Haman văch râng nau sông sa gâp mra nkra ta nar ôi taơ, jêh nây gâp mra ƀư tĭng nâm nau hađăch lah.”

Y-Haman nkra tơm si yông trô ko gay nkhĭt Y-Môrdêkai

⁹ Tâm nar nây, Y-Haman hăn luh, hâk maak jêh ri rhơn răm ngăn. Ƀiălah tơlah Y-Haman saơ Y-Môrdêkai gŭ tâm mpông pêr ngih hađăch mâu ŭch dâk, mâu lĕ ŭch râm nsâr tanăp păng, păng bêng ma nau ji nuih ma Y-Môrdêkai.

¹⁰ Ƀiălah, Y-Haman nkân nau ji nuih jêh ri hăn sĭt ta ngih păng nơm. Păng prơh bunuyh kuăl phung mĭt jiăng jêh ri H'Sêres jêng ur păng văch.

¹¹ Y-Haman nkoch bri đŏng ma khân păng nau ndrŏng kuăng păng jêh ri âk kon bu klâu păng. Păng tâm mpơl đŏng lĕ rngôch nau hađăch ƀư ma păng, dơi geh bu yơk, jêh ri hađăch n'hao păng hao lơn ma phung kôranh jêh ri phung oh mon hađăch.

¹² Y-Haman lah đŏng: “Hađăch bu ur H'Êsther jă knŏng êng gâp ndrel ma hađăch tât râng nau sông sa păng hŏ nkra jêh. Ôi taơ gâp dơi jă văch râng nau sông sa ndrel hađăch đŏng.

¹³ Ƀiălah, lĕ rngôch nau nây mâu geh khlay ma gâp ôh, tơlah gâp hôm saơ Y-Môrdêkai, bunuyh Yuđa, hôm gŭ ta mpông pêr ngih hađăch.”

¹⁴ Ur păng jêng H'Sêres jêh ri phung mĭt jiăng păng lah ma păng: “Ăn bu ƀư tơm si yông trô ko prêh bar jât ma prăm met, jêh ri ôi taơ, dăn hom hađăch ăn yông trô ko Y-Môrdêkai ta nây. Jêh nây may răm maak hăn râng nau sông sa ndrel hađăch.” Nau nchră nây ƀư maak ma Y-Haman, jêh ri păng ăn bu ƀư tơm si yông trô ko.