Êsther 4 - Nau Brah Ndu Ngơi 2023

Y-Môrdêkai dăn H'Êsther kâp kơl

¹ Tơlah Y-Môrdêkai gĭt jêh ma lĕ nau tât nây, păng nkhêk ao păng, nsoh kho ao ƀau jêh ri sui buh klơ bôk jêh ri luh hăn ta nklang ƀon, nter huy nhĭm rngot ngăn.

² Păng hăn tât ta ntŭk lăp mpông pêr ngih hađăch; nđâp lah mâu geh mbu nsoh kho ao ƀau dơi vay lăp ta nây.

³ Tâm ăp n'gor, ta ntŭk nau hađăch ntrŭnh jêh ri samƀŭt nau ntrŭnh lĕ tât jêh, pôri tâm phung Yuđa geh nau nhĭm nhhiăng rngot ngăn, ver ât sông sa, nhhiăng nhĭm, rngot rvê, jêh ri geh đŏng âk phung nsoh kho ao ƀau bê̆ch klơ buh.

⁴ Phung oh mon bu ur H'Êsther jêh ri phung kôranh oh mon char păng văch nkoch lĕ nau nây ma păng; păng rngot rvê ngăn. Păng njuăl bok ao ma Y-Môrdêkai gay ma păng nsoh ntrok ma ao ƀau, ƀiălah păng mâu dơn ôh ao nây.

⁵ Rnôk nây H'Êsther kuăl Y-Hathach, du kôranh bu char hađăch, nơm bu dơm jêh ăn kơl kan păng, văch tât Y-Môrdêkai gay gĭt moh nau hŏ tât geh, jêh ri mâm dĭng geh nau nây.

⁶ Y-Hathach hăn tâm mâp đah Y-Môrdêkai ta ntŭk nkual toyh tâm ƀon tanăp mpông pêr ngih hađăch.

⁷ Y-Môrdêkai nkoch tay ma păng lĕ rngôch nau tât ma păng jêh ri lĕ rnoh prăk Y-Haman hŏ ton chê̆ tâm jay hađăch gay dơi vay ƀư rai phung Yuđa.

⁸ Tâm ban lĕ Y-Môrdêkai ăn ma kôranh bu char du pŏk samƀŭt kơt nchih samƀŭt nau ntrŭnh hŏ ntăm ta ƀon Susa gay ƀư rai lơi lĕ phung Yuđa, gay kôranh bu char mbơh samƀŭt nây ma H'Êsther jêh ri rblang samƀŭt nây ma păng, jêh ri ntrôl păng hăn lăp tanăp hađăch, vơh vơl ma hađăch yô̆ nđach ma phung ƀon lan păng nơm.

⁹ Y-Hathach plơ̆ sĭt nkoch đŏng ma H'Êsther lĕ rngôch nau Y-Môrdêkai lah jêh.

¹⁰ Rnôk nây H'Êsther prơh Y-Hathach hăn gay mbơh đŏng ma Y-Môrdêkai pô aơ:

¹¹ “Lĕ rngôch phung oh mon jêh ri phung ƀon lan tâm bri hađăch dơi gĭt da dê pô aơ ăp nơm, mâu gĭt bu ur mâu lah bu klâu, hăn lăp tâm nkual tâm trôm ngih hađăch mâu geh ôh nau jă kuăl, tĭng nâm nau vay hŏ ntrŭnh, bu mra nkhĭt lĕ rngôch, knŏng tơlah hađăch yơr mâng jra hađăch ma mah, nơm nây dơi hôm rêh. Ƀiălah hŏ geh pe jât nar ma aơ gâp mâu dơi ăn lăp tâm trôm nkual ngih hađăch.”

¹² Bu nkoch tay ma Y-Môrdêkai lĕ nau H'Êsther ngơi jêh.

¹³ Y-Môrdêkai ntĭnh ma khân păng plơ̆ sĭt lah ma H'Êsther pô aơ: “Lơi ay mĭn ôh gŭ tâm ngih hađăch ay mra klaih bơh nau mhĭk tât ma lĕ rngôch phung Yuđa êng.

¹⁴ Tơlah ay gŭ rklăk tâm nôk aơ, nanê̆ phung Yuđa mra dơi geh nau kơl jêh ri nau tâm rklaih tă bơh ntŭk êng, ƀiălah ay jêh ri ngih mbơ̆ ay mra rai lôch lĕ. Ƀiălah mbu gĭt pô aơ yorlah mông kơt aơ ay dơi jêng hađăch bu ur lĕ?”

¹⁵ H'Êsther prơh bunuyh hăn plơ̆ lah ma Y-Môrdêkai pô aơ:

¹⁶ “Kuăl rgum hom lĕ rngôch phung Yuđa gŭ ta ƀon Susa, jêh ri yor ma gâp tâm ban lĕ, ât sông sa pe măng pe nar, mâu dơi sông sa mâu lah dơi nhêt. Gâp jêh ri phung oh mon bu ur gâp mra ver ât sông sa đŏng. Jêh nau nây, gâp mra lăp tanăp hađăch jêng nau mâu di nau vay; ƀiălah tơlah gâp khĭt ăn gâp khĭt yơh.”

¹⁷ Y-Môrdêkai hăn luh jêh ri ƀư tĭng kơt lĕ nau H'Êsther ntĭnh jêh ma păng.