Êsther 3 - Nau Brah Ndu Ngơi 2023

Y-Haman tâm nchră ƀư rai phung Yuđa

¹ Jêh lĕ nau nây, hađăch Asuêrus n'hao pah kan ma Y-Haman, kon bu klâu Y-Hamêdatha, jêng bunuyh Agak, jêh ri n'hao păng jêh ri ăn ma păng ntŭk prêh lơn phung kôranh chiă uănh tâm ngih hađăch.

² Lĕ rngôch phung oh mon ta mpông pêr ngih hađăch chon mon mbah da dê gay yơk Y-Haman tĭng nau hađăch ntrŭnh jêh. Ƀiălah Y-Môrdêkai mâu ŭch kŭnh mbah jêh ri mâu đŏng chon mbah păng.

³ Lĕ rngôch phung oh mon gŭ ta mpông pêr ngih hađăch lah ma Y-Môrdêkai: “Mâm ƀư may mâu djôt prăp nau hađăch ntrŭnh?”

⁴ Nar nây tât nar ri, khân păng ăt lah pônây ma păng, ƀiălah păng mâu ŭch iăt ôh ma khân păng. Yor ri, khân păng mbơh ma Y-Haman gay rlong nâl gĭt lah nau Y-Môrdêkai ngơi mra dơi dơn mâu lah mâu, yorlah Y-Môrdêkai hŏ nkoch ma khân păng gĭt păng jêng du huê bunuyh Yuđa.

⁵ Tơlah Y-Haman saơ Y-Môrdêkai mâu ŭch chon mon jêh ri mâu đŏng ŭch chon mbah ôh ma păng, pôri Y-Haman hao ji nuih ngăn.

⁶ Ƀiălah Y-Haman mĭn yơr ti ƀư rai du huê Y-Môrdêkai knŏng jêng nau jê̆. Yor ri, tơlah Y-Haman gĭt Y-Môrdêkai jêng bunuyh Yuđa, păng joi nau mĭn plĕch nkhĭt lĕ rngôch phung Yuđa jêng ndŭl deh Y-Môrdêkai, gŭ tâm lam ƀon bri hađăch Asuêrus.

⁷ Ta khay tal nguay jêng khay Nisan, tâm năm rơh jât ma bar tâm rnôk hađăch Asuêrus chiă uănh, bu nchroh Pur, nâm bu ntĭt nchroh n'hôr tĭng ăp nar ăp khay, tanăp măt Y-Haman. Chroh n'hôr di tâm khay jât ma bar, jêng khay Adar.

⁸ Y-Haman lah ma hađăch Y-Asuêrus pô aơ: “Geh du phung ƀon lan chah rai, gŭ lam ta nklang phung mpôl băl tâm lĕ ƀon bri hađăch; nau vay khân păng êng đah nau vay phung mpôl băl êng, jêh ri khân păng mâu djôt prăp ôh nau vay hađăch. Yor ri, ăn nau yô̆ ma khân păng mâu jêng ueh ôh ma hađăch.

⁹ Tơlah nau aơ di nau hađăch mĭn, dăn hađăch ăn bu nchih samƀŭt nau ntrŭnh ƀư rai lơi khân păng, jêh ri gâp mra chê̆ pe rhiăng prăm jât rbăn tân prăk tâm ti phung kôranh tâm ngih hađăch gay khân păng djôt leo tâm jay prăp hađăch.”

¹⁰ Hađăch tŏk rgên bơh ti păng ro jêh ri ăn ma Y-Haman, kon bu klâu Y-Hamêdatha, phung Agak, nơm rlăng đah phung Yuđa.

¹¹ Hađăch lah ma Y-Haman: “Gâp jao prăk nây nđâp phung ƀon lan nây ma may, tĭng nau mĭn may ŭch ƀư đah phung khân păng.”

¹² Tâm khay nguay, nar jât ma pe, bu kuăl rgum phung kôranh nchih samƀŭt hađăch văch tât. Tĭng nâm lĕ rngôch nau Y-Haman hŏ ntĭnh jêh, bu sŏk amoh hađăch Y-Asuêrus nchih samƀŭt nau ntrŭnh ăn ma phung kôranh oh mon hađăch, phung kôranh chiă uănh ăp n'gor jêh ri phung kôranh chiă uănh ma ăp ntil mpôl bunuyh, tĭng nâm nau ngơi ma ăp ntil mpôl bunuyh. Jêh nây khân păng tâp pŏng ma rgên hađăch.

¹³ Khân păng njuăl samƀŭt ma phung njŭn ma lĕ rngôch n'gor bri hađăch, ntăm gay ŭch ƀư rai, nkhĭt lơi, jêh ri ƀư roh lĕ rngôch phung Yuđa mâu gĭt bu ranh, mom ndăm, bu ur nđâp kon se, tâm du nar nây, jêng nar jât ma pe, khay jât ma bar jêng khay Adar jêh ri pit in lĕ ndô ndơ khân păng.

¹⁴ Du pŏk samƀŭt tĭng kơt nchih samƀŭt nau ntĭnh nây bu njuăl ma ăp n'gor jêng nau tơih mbơh ma lĕ rngôch phung ƀon lan ăn bu rơm ndrăp jêh ma nar nây.

¹⁵ Phung djôt leo samƀŭt hăn ma nau ndal tĭng nâm nau hađăch ntĭnh. Samƀŭt nau ntrŭnh nây bu njuăl đŏng ma ƀon bri hađăch Susa. Jêh nau nây, hađăch jêh ri Y-Haman gŭ nhêt ndrănh tâm nôk ƀon Susa geh nau uh ah rŭng răng.