Êsther 2 - Nau Brah Ndu Ngơi 2023

Hađăch Asuêrus săch H'Êsther jêng hađăch bu ur

¹ Jêh nau nây, tơlah nau hađăch Asuêrus ji nuih lĕ aih jêh, hađăch kah gĭt tay ma H'Vasti, ma nau kan păng hŏ ƀư jêh ri ma nau păng ntrŭnh gay sŏk sưng hađăch bu ur tă bơh H'Vasti.

² Phung oh mon hađăch lah: “Joi hom ma hađăch bu ur druh ueh

³ jêh ri dăn hađăch prơh phung kôranh tâm lam lĕ rngôch n'gor tâm ƀon bri hađăch, hăn tâm rgum lĕ rngôch phung bu ur druh ueh, văch tât ta nkual ngih hađăch bu ur tâm ƀon bri hađăch Susa. Jao hom ma Y-Hêgai, kôranh bu char, mât uănh ma phung bu ur, mât njrăng khân păng jêh ri tâm pă dak kôlônh gay jut lơi nau ƀơ̆ ma khân păng.

⁴ Mbu moh bu ur druh ƀư ăn ma hađăch maak nuih n'hâm, mra ƀư hađăch bu ur ntrok ma H'Vasti.” Nau nây maak nuih n'hâm ma hađăch, jêh ri păng ƀư pônây ro.

⁵ Tâm ƀon bri hađăch Susa, geh du huê bunuyh Yuđa, amoh Y-Môrdêkai, kon bu klâu Y-Jar, sau Y-Simei, se Y-Kis, bunuyh Benjamin.

⁶ Păng jêng bunuyh bu veng ndrel tă bơh Yêrusalem hăn ƀư bu nă du rơh ndrel Y-Jêkônia, hađăch Yuđa, nơm Y-Nêbukatnetsar, hađăch Babilôn hŏ nhŭp jêh khân păng ƀư dĭk.

⁷ Y-Môrdêkai hŏ siăm rong jêh kon bu ur kônh păng, bu ur druh nây amoh H'Hadasa jêng H'Êsther, yorlah H'Êsther mâu geh mê̆ mbơ̆. Bu ur druh nây ueh jêh ri ray ngăn. Tơlah mê̆ mbơ̆ păng hŏ khĭt jêh, Y-Môrdêkai dơn păng jêng kon bu ur păng nơm.

⁸ Tơlah nau ntrŭnh jêh ri nau ntĭnh bơh hađăch mbơh jêh, geh âk bu ur druh hŏ rgum ta ƀon Susa, jao ma Y-Hêgai mât mray. Bu djôt leo H'Êsther tâm ban lĕ, rlet ma ngih hađăch jêh ri jao păng ma Y-Hêgai jêng kôranh bu char mât uănh phung bu ur.

⁹ Bu ur druh nây ƀư maak ma nuih n'hâm Y-Hêgai jêh ri geh nau yô̆ tanăp măt păng. Păng ăn gơnh ro ma păng dak kôlônh gay jut lơi nau ƀơ̆ jêh ri ndơ sông sa êng ngăn ma păng, nđâp pơh oh mon bu ur dơi săch jêh tâm ngih hađăch, jêh nây Y-Hêgai ăn păng ndrel phung oh mon bu ur trơn lăp tâm du jrô dŭt ueh tâm ngih phung bu ur.

¹⁰ H'Êsther mâu ăn bu gĭt ôh phung ƀon lan mâu lah ndŭl mpôl păng; yorlah Y-Môrdêkai hŏ ntĭnh jêh ma păng lơi nkoch ăn bu gĭt.

¹¹ Ăp nar, Y-Môrdêkai hăn rsong pâl tâm nkual ngih phung bu ur, gay ŭch gĭt H'Êsther geh nau gŭ mpăn lĕ, mâu lah moh nau tât ma păng.

¹² Ăp bu ur druh tĭng tâm nal ăn ƀư nau ueh ma tâm jât ma bar khay: Prao khay dŏng dak si tăng kôlônh-mir, prao khay dŏng dak si ƀâu kah ndrel ma dak kôlônh gay jut lơi nau ƀơ̆ ma phung bu ur. Măng nar lôch jêh, ăp bu ur druh tĭng nau dăp gay hăn văch tât ta hađăch Asuêrus.

¹³ Tơlah bu ur druh lăp tanăp hađăch, păng dơi vay djôt leo ăp moh ndơ păng ŭch tă bơh ngih hađăch bu ur tât ma ngih hađăch.

¹⁴ Ta măng păng hăn tât, kêng ôi păng plơ̆ sĭt ta ngih hađăch bu ur tal bar tâm dâng nau chiă uănh Y-Sasgas jêng kôranh bu char ma hađăch, nơm mât uănh ur yông. Bu ur nây mâu dơi lăp tâm ngih hađăch ôh, knŏng tơlah hađăch ŭch păng jêh ri dơi kuăl amoh nơm nây.

¹⁵ Tơlah H'Êsther, kon bu ur Y-Abihai kônh păng Y-Môrdêkai, jêng bunuyh hŏ dơn păng ƀư jêng kon bu ur, hŏ tât nau dăp gay hăn lăp tanăp hađăch, H'Êsther mâu dăn du ntil ndơ ôh knŏng ndơ Y-Hêgai, kôranh bu char hađăch, jêng nơm mât uănh phung bu ur, hŏ veh jêh ma păng. H'Êsther dơi geh nau yô̆ tanăp măt lĕ rngôch bunuyh uănh saơ păng.

¹⁶ Bu njŭn H'Êsther lăp tât ta ngih hađăch gay gŭ tanăp hađăch Asuêrus, tâm khay jât (jêng khay Têbet), tâm năm rơh pơh nau chiă uănh hađăch.

¹⁷ Hađăch rŏng kơnh ma H'Êsther âk lơn ma lĕ rngôch phung bu ur druh êng jêh ri păng geh nau yô̆ tanăp măt hađăch rlau lơn ma lĕ rngôch phung bu ur êng. Pôri hađăch ndô đon hađăch ta klơ bôk păng, njêng păng jêng hađăch bu ur ntrok ma H'Vasti.

¹⁸ Jêh nây hađăch nkra du nau nhêt sông toyh ma lĕ rngôch phung kôranh chiă uănh jêh ri ma phung oh mon păng, rnha jêng nau nhêt sông toyh H'Êsther. Tâm ban lĕ hađăch mâu sŏk pi tâm lĕ rngôch n'gor jêh ri ăn nau nkhôm lŏng, khư đah hađăch.

Y-Môrdêkai gĭt nau nchră ŭch ƀư nkhĭt hađăch Y-Asuêrus

¹⁹ Tơlah phung bu ur druh tâm rgum băl tal bar, Y-Môrdêkai gŭ ta mpông pêr ngih hađăch.

²⁰ H'Êsther ƀư di tĭng nau Y-Môrdêkai hŏ ntĭnh păng, mâu ăn bu gĭt phung ƀon lan păng mâu lah phung mpôl băl păng nơm; yorlah H'Êsther tông bâr ma Y-Môrdêkai ntĭnh păng, nâm bu rnôk păng siăm rong tâm ngih păng.

²¹ Tâm lĕ nar nây, Y-Môrdêkai dôl gŭ ta mpông pêr ngih hađăch. Geh bar hê kôranh bu char gak njrăng mpông pêr ma hađăch jêng Y-Bikthan jêh ri Y-Têres, yorlah ji nuih ma hađăch Asuêrus jêh ri joi nau chră ŭch nkhĭt hađăch.

²² Y-Môrdêkai gĭt nau nây jêh ri păng mbơh ma hađăch bu ur H'Êsther gĭt jêh ri H'Êsther nkoch bri ma hađăch tâm amoh Y-Môrdêkai.

²³ Bu ôp sek nau nây jêh ri saơ jêng ngăn, pôri bu yông trô ko lĕ bar kôranh bu char nây. Bu nchih nau nây tâm ndrom samƀŭt nau rêh jêng hađăch tanăp măt hađăch.