Êsther 1 - Nau Brah Ndu Ngơi 2023

Hađăch Asuêrus nkra nau nhêt sông toyh

¹ Aơ jêng nau tât geh tâm rnôk Y-Asuêrus jêng hađăch, nơm chiă uănh du rhiăng bar jât ma pơh n'gor ntơm bơh bri India tât ma bri Êthiôpi.

² Tâm rnôk nây tơlah hađăch Asuêrus gŭ ta klơ sưng hađăch păng tâm ƀon Susa, ƀon tơm păng.

³ Tâm năm rơh pe păng chiă uănh, păng nkra du nau nhêt sông toyh ma lĕ rngôch kôranh chiă uănh păng jêh ri phung oh mon păng. Phung kôranh tahan n'gor bri Persi jêh ri n'gor Mêdơ, phung ndrŏng nđâp ma phung kôranh chiă uănh n'gor gŭ panăp păng da dê.

⁴ Tâm du rhiăng pham jât nar, hađăch mpơl nau ndrŏng chrêk lơp ƀon bri hađăch păng jêh ri nau lit rnam jêh ri nau lơp rmal păng.

⁵ Tơlah lĕ nar nây lôch jêh, hađăch nkra nau sông sa toyh ma lĕ rngôch phung ƀon lan gŭ ta nây tâm ƀon Susa, ntơm bơh bunuyh toyh lư tât ma bunuyh jê̆, tâm pơh nar ta ntŭk n'gar kao ngih hađăch.

⁶ Lam n'gar kao, bu yông bok tôk nching ƀư ma dêh, bok ĭr; kât ma rse mhay rhên nglang jêh ri bok rvanh chăng ndor prăk jêh ri n'gâng lŭ marbrơ. Geh tâm ban lĕ sưng bê̆ch ƀư ma mah jêh ri prăk, dơm ta klơ gre ƀư ma lĕ ntil lŭ marbrơ, chăng, nglang, êr, jêh ri krăk

⁷ Bu ndrăp ndrănh ma kachok mah, âk ntil kachok êng êng. Hađăch ndrăp âk ngăn ntil ndrănh, tĭng nâm nau lŏng hađăch.

⁸ Lĕ rngôch bunuyh nhêt ndrănh tĭng nau ŭch, ƀiălah mâu nchâp ôh; yorlah hađăch ntĭnh jêh ma lĕ rngôch phung pah kan njŭn ndơ sa tâm ngih hađăch ăn pah kan ueh ma phung bu năch tĭng nâm nau ŭch ăp nơm.

Bu n'glưh sưng hađăch tă bơh hađăch bu ur H'Vasti

⁹ Tâm nôk nây, hađăch bu ur H'Vasti nkra du nau nhêt sông toyh ma phung bu ur tâm ngih hađăch Y-Asuêrus.

¹⁰ Ta nar tal pơh, tơlah nuih n'hâm hađăch maak jêh ma ndrănh, hađăch ntĭnh ma Y-Mêhuman, Y-Bistha, Y-Harbôna, Y-Biktha, Y-Abaktha, Y-Sêthar jêh ri Y-Karkas, jêng pơh kôranh bu char pah kan tanăp hađăch Y-Asuêrus,

¹¹ leo hađăch bu ur H'Vasti hăn tât tanăp hađăch, ndô đon hađăch păng gay tâm mpơl nau ueh păng ma phung ƀon lan jêh ri ma phung kôranh chiă uănh yorlah păng ueh ngăn.

¹² Ƀiălah hađăch bu ur H'Vasti dun hăn tĭng nâm hađăch ntĭnh ma kôranh bu char. Yor nây, hađăch hao ji nuih ngăn.

¹³ Hađăch lah ma phung njêh vay gĭt rbăng nau mbên trôk nar rnôk êng êng; yorlah tĭng nâm nau vay, tơlah geh moh nau tât hađăch mơng vay ôp nau mĭn ma lĕ rngôch phung blau nau vay,

¹⁴ jêng phung dăch ma hađăch geh Y-Karsêna, Y-Sêthar, Y-Atmatha, Y-Tarsis, Y-Mêres, Y-Marsêna, jêh ri Y-Mêmukan, ăt jêng pơh kôranh chiă uănh n'gor bri Persi jêh ri Mêdơ vay tâm mâp đah hađăch jêh ri gŭ ntŭk mrô nguay tâm ƀon bri hađăch.

¹⁵ Nôk nây, hađăch Asuêrus ôp ma khân păng: “Hađăch bu ur H'Vasti mâu ƀư ôh nau hađăch Asuêrus ntĭnh ma kôranh bu char. Pôri tĭng nâm nau vay moh nau he mra ƀư ma păng?”

¹⁶ Y-Mêmukan lah tanăp hađăch jêh ri phung kôranh chiă uănh pô aơ: “Hađăch bu ur H'Vasti mâu knŏng geh nau tih ma hađăch ôh, ƀiălah tâm ban lĕ geh nau tih ma lĕ rngôch phung kôranh chiă uănh, jêh ri lĕ rngôch phung ƀon lan gŭ tâm lĕ rngôch n'gor bri hađăch Asuêrus đŏng.

¹⁷ Nau nây mra mbơh ma lĕ rngôch phung bu ur gĭt, jêh ri khân păng tâm rmot sai khân păng, yorlah phung sai nơm nkoch tay pô aơ ‘hađăch Asuêrus ntĭnh ma hađăch bu ur H'Vasti ăn bu njŭn păng tanăp hađăch, ƀiălah păng mâu ŭch văch ôh.’

¹⁸ Nar aơ, phung ur kôranh gŭ ta n'gor bri Persi jêh ri Mêdơ tăng jêh lĕ nau hađăch bu ur ƀư jêh, khân păng mra ƀư tĭng nâm nau nây gay gŭ ngao ma phung sai khân păng jêng phung kôranh tâm dâng hađăch, nanê̆ mra geh nau mưch rmot jêh ri ji nuih.

¹⁹ Yor ri, tơlah hađăch maak nuih n'hâm, ăn hađăch njuăl samƀŭt ntrŭnh nau ăn ma bu nchih tâm ndrom samƀŭt nau vay n'gor bri Persi jêh ri Mêdơ gay lơi ăn bu rgâl ôh, ma H'Vasti mâu mra dơi văch đŏng tanăp hađăch Asuêrus ôh. Ăn hađăch jao nau păng jêng hađăch bu ur ma nơm êng ueh lơn ma păng.

²⁰ Tơlah hađăch njuăl samƀŭt ntrŭnh nau ăn ma bu mbơh jêh lam ƀon bri hađăch toyh păng, lĕ rngôch bu ur mra yơk ma sai khân păng, ntơm bơh bunuyh toyh lư tât ma bunuyh jê̆ rhên.”

²¹ Nau aơ ueh nau mĭn hađăch jêh ri nđâp phung kôranh chiă uănh; hađăch ƀư tĭng nâm nau Y-Mêmukan nchră.

²² Hađăch njuăl samƀŭt ntrŭnh nau ăn ma lĕ rngôch n'gor bri hađăch, tĭng nâm rplay samƀŭt nchih jêh ri nau ngơi tâm ăp n'gor jêh ri ăp ntil mpôl bunuyh, jêh ri lah ma ăp nơm bu klâu jêng kôranh tâm ngih vâl păng nơm jêh ri ntăm nti tĭng nâm nau ngơi me deh.