Êsra 9 - Nau Brah Ndu Ngơi 2023

Y-Êsra buay phung ƀon lan Israel tâm nsông đah phung bu năch

¹ Tơlah lĕ kan nây hŏ lôch jêh, phung kôranh chiă uănh văch tât ma gâp jêh ri lah: “Phung ƀon lan Israel, nđâp ma phung kôranh ƀư brah, jêh ri phung Lêvi mâu geh rêh nkhah ôh đah phung ntil mpôl bunuyh gŭ tâm n'gor, ƀiălah khân păng kơt tĭng lĕ nau vay ƀơ̆ ƀơch bơh phung Kanaan, phung Hitit, phung Pêrisit, phung Jêbusit, phung Ammôn, phung Môap, phung Êjipt, jêh ri phung Amôrit.

² Khân păng jêh ri phung kon bu klâu khân păng hŏ sŏk jêh phung kon bu ur phung nây, ăn jêng ur ma khân păng nơm, ƀư ma noi deh kloh ueh hŏ tâm pot đah phung ntil mpôl bunuyh gŭ tâm n'gor aơ. Nanê̆, phung kôranh jêh ri phung kôranh chiă uănh jêng phung ƀư tih jâk lơn.”

³ Tơlah tăng nau nây jêh, gâp nkhêk lơi ao tâm dâng gâp, ao jong gâp, tôch têp, rôk sŏk ta klơ bôk jêh ri gâp gŭ rngot.

⁴ Lĕ rngôch phung bunuyh tâm rƀŭn gŭ jŭm gâp, klach râm nsâr ngăn ma nau ngơi Brah Ndu Israel, yorlah tih mâu geh gŭ ueh răp jăp phung tă ƀư bu nă lĕ sĭt jêh hŏ ƀư tih; bi gâp lĕ krit ngăn gŭ ta nây kŏ tât mông nhhơr ndơ ƀư brah kêng mhaơ.

Nau Y-Êsra mbơh sơm

⁵ Tât jêh mông nhhơr ƀư brah kêng mhaơ, gâp dâk tă bơh ntŭk rêh ni bêk prêng, ao tâm dâng jêh ri ao jong lĕ hêk jêh, jêh ri gâp chon kômâk, yơr ti gâp rle mpeh Yêhôva Brah Ndu gâp

⁶ lah ma Păng: “Hơi Brah Ndu gâp, gâp prêng jêh ri brâp muh măt, mâu janh n'gơr măt uănh May jêng Brah Ndu gâp, yorlah nau djơh mhĭk hên lơ ntop âk lơn rlau bôk hên, jêh ri nau tih phung kon prêh hao tât klơ trôk.

⁷ Ntơm rnôk chô yau hên kăl e tât aƀaơ aơ, hên hŏ ƀư tih toyh jêh. Yor nau djơh hên nơm, yor ri phung kon, phung hađăch, phung kôranh ƀư brah hên, lĕ jao jêh hên tâm ti phung hađăch bri bu năch, ma đao tak, bu nhŭp ƀư bu nă, bu pit in drăp ndơ, jêh ri bu gơm mưch kŏ tât ta nar aơ.

⁸ Ƀiălah aƀaơ ri, Yêhôva Brah Ndu phung kon hŏ yô̆ an ma hên, gay ăn hên du kô̆ hôm e klen dơi klaih, jêh ri ăn ma hên du ngih brah tâm trôm ntŭk kloh ueh aơ, gay ma Brah Ndu hên ƀư ăn ang măt phung kon dơi saơ ang jêh ri ăn hên dơi rêh đŏng djê̆ djê̆ tă bơh ƀư bu nă.

⁹ Yorlah hên jêng phung ƀư dĭk, ƀiălah Brah Ndu hên mâu chalơi phung kon ôh tâm nau ƀư dĭk nây. Păng hŏ ăn jêh ma hên geh nau yô̆ tanăp măt phung hađăch n'gor Persi, ƀư ăn hên dơi rêh đŏng gay plơ̆ sĭt ndâk tay ngih brah ma Brah Ndu phung kon, nkra đŏng lĕ ntŭk hŏ rlâm jêh, jêh ri ăn ma hên du ntŭk gŭ đăp mpăn tâm n'gor Yuđa jêh ri ƀon Yêrusalem.

¹⁰ Aƀaơ ri, hơi Brah Ndu phung kon, pakơi lĕ nau aơ, mâm phung kon mra lah? Yorlah hên hŏ chalơi lĕ rngôch nau vay ntăm bơh May ntĭnh.

¹¹ May hŏ prơh jêh phung nơm mbơh lor jêng oh mon May, gay ăn ntĭm nti hên pô aơ: ‘N'gor bri phung khân may mra hăn lăp sŏk nây, jêng du n'gor bri ƀơ̆ ƀơch ngăn yor nau ƀơ̆ ƀơch tă bơh phung ntil mpôl bunuyh tâm n'gor. Ma lĕ nau vay ƀơ̆ ƀơch, khân păng hŏ ƀư ƀơ̆ ƀơch ăp ntŭk tâm n'gor nĕ.

¹² Yor ri, lơi ăn văng ôh phung kon bu ur khân may đah phung kon bu klâu khân păng, mâu lĕ dơi sŏk phung kon bu ur khân păng đah phung kon bu klâu khân may. Mâu đŏng joi nau ndrŏng mâu lah nau đăp mpăn bơh khân păng, gay khân may dơi jêng ktang, sa kao play tâm n'gor, jêh ri gay n'gor nây ăn ma phung kon khân may ƀư drăp ndơn n'ho ro.’

¹³ Pakơi lĕ nau mhĭk ăn tât nây ma hên, yor lĕ nau djơh jêh ri nau tih toyh hên, — hơi Brah Ndu hên! Nanê̆ ngăn Kôranh Brah mâu tâm rmal ôh hên ăn di nâm bu nau tih hên, ƀiălah hŏ ăn ma hên du kô̆ hôm e klen tâm ban pônây, —

¹⁴ pôri mâm hên hôm ƀư tih lĕ nau vay ntăm bơh Kôranh Brah, gŭ sai ur jêh đah lĕ phung ntil mpôl bunuyh tĭng lĕ ndô̆ nau vay ƀơ̆ ƀơch aơ? Nau ji nuih bơh Kôranh Brah mâu mra nkhŭt ma hên, ƀư rai lơi hên kŏ tât mâu hôm klen đŏng ôh mâu lah nchuăt klaih lĕ?

¹⁵ Hơi Yêhôva Brah Ndu phung Israel, Kôranh Brah jêng sŏng srăng! Hên jêng phung hôm e klen djê̆, tâm ban hŏ saơ nar aơ. Aơ hên gŭ tanăp măt Kôranh Brah, bêng ma nau tih, nđâp lah mâu geh du huê nuyh ôh dơi gŭ tanăp măt May tâm nau tâm ban pônây.”