Êsra 8 - Nau Brah Ndu Ngơi 2023

Samƀŭt rnoh săk phung bunuyh plơ̆ sĭt tâm n'gor ndrel ma Y-Êsra

¹ Aơ jêng phung kôranh ƀon jêh ri phung bunuyh tă bơh Babilôn plơ̆ sĭt ndrel ma gâp kơp tĭng nâm noi deh, tâm rnôk rô̆ hađăch Artasersês chiă uănh:

² Phung kon sau Y-Phinêas geh Y-Gersôm; phung kon sau Y-Ithamar geh Y-Daniel; phung kon sau Y-Đavit geh Y-Hatus;

³ Phung kon sau Y-Sêkania, phung kon sau Y-Parôs, geh Y-Sakari jêh ri phung hăn ndrel ma păng; kơp tĭng nâm noi deh, geh du rhiăng prăm jât bu klâu.

⁴ Phung kon sau Y-Pahat Môap geh Y-Êliôênai, kon bu klâu Y-Sêrahia, jêh ri phung bunuyh hăn ndrel ma păng, geh bar rhiăng nuyh bu klâu.

⁵ Phung kon sau Y-Sêkania geh kon bu klâu Y-Jahasiêl, jêh ri phung bunuyh hăn ndrel ma păng, geh pe rhiăng nuyh bu klâu.

⁶ Phung kon sau Y-Adin geh Y-Êbet, kon bu klâu Y-Jônathan jêh ri phung bunuyh hăn ndrel ma păng, geh prăm jât nuyh bu klâu.

⁷ Phung kon sau Y-Êlam geh Y-Jêsaiya, kon bu klâu Y-Athali, jêh ri phung bunuyh hăn ndrel ma păng, geh pơh jât nuyh bu klâu.

⁸ Phung kon sau Y-Sêphatia geh Y-Sêbadia, kon bu klâu Y-Mikel, jêh ri phung bunuyh hăn ndrel ma păng, geh pham jât nuyh bu klâu.

⁹ Phung kon sau Y-Jôap geh Y-Ôbadia, kon bu klâu Y-Jêhiêl, jêh ri phung bunuyh hăn ndrel ma păng, geh bar rhiăng jât ma pham nuyh bu klâu.

¹⁰ Phung kon sau Y-Sêlômit geh kon bu klâu Y-Jôsiphia, jêh ri phung bunuyh hăn ndrel ma păng, geh du rhiăng prao jât nuyh bu klâu.

¹¹ Phung kon sau Y-Bêbai geh Y-Sakari, kon bu klâu Y-Bêbai jêh ri bunuyh hăn ndrel ma păng, geh bar jât ma pham nuyh bu klâu.

¹² Phung kon sau Y-Asgat geh Y-Jôhanan, kon bu klâu Y-Hakatan, jêh ri phung bunuyh hăn ndrel păng, geh du rhiăng jât nuyh bu klâu.

¹³ Phung kon sau Y-Adônikam tât pakơi dŭt, amoh khân păng jêng: Y-Êliphêlet, Y-Jêiêl, jêh ri Y-Sêmaya, jêh ri phung bunuyh hăn ndrel ma păng, geh prao jât nuyh bu klâu.

¹⁴ Phung kon sau Y-Bikvai geh Y-Uthai jêh ri Y-Sakur, jêh ri bunuyh hăn ndrel ma păng, geh pơh jât nuyh bu klâu.

Hăn trong plơ̆ sĭt tâm n'gor

¹⁵ Gâp rgum khân păng ta kơh dak krong hoch mpeh Ahava, jêh ri hên gŭ njưh pe nar ta nây. Dôl kơp phung ƀon lan jêh ri phung kôranh ƀư brah, gâp mâu saơ ôh du huê phung Lêvi.

¹⁶ Gâp prơh bu kuăl rgum phung chiă uănh Y-Êliêser, Y-Ariêl, Y-Sêmaya, Y-Êlnathan, Y-Jarip, Y-Êlnathan, Y-Nathan, Y-Sakari, jêh ri Y-Mêsulam, ndrel ma Y-Jôarip jêh ri Y-Êlnathan jêng phung kôranh geh nau blau mĭn.

¹⁷ Gâp prơh phung nây hăn tât ma Y-Idô jêng kôranh chiă uănh, gŭ ta Kasiphia, lah ma Y-Idô jêh ri ma phung oh nâu păng, jêng phung pah kan tâm ngih brah, gŭ ta Kasiphia njŭn ma hên phung bunuyh pah kan tâm ngih Brah Ndu he.

¹⁸ Yorlah rnơm ma ti Brah Ndu rgong he, lĕ phung nây leo tât ma hên du huê bunuyh blau mĭn, jêng noi deh Y-Mahli, jêng kon bu klâu Y-Lêvi, sau bu klâu Y-Israel, amoh păng Y-Sêrêbia, jêh ri phung kon bu klâu păng ndrel ma phung băl mpôl păng, geh lĕ rngôch jêng jât ma pham nuyh;

¹⁹ geh đŏng Y-Hasabia jêh ri Y-Jêsaiya, jêng phung noi deh Mêrari, ndrel ma phung oh nâu păng jêh ri phung kon bu klâu păng, geh lĕ rngôch jêng bar jât nuyh.

²⁰ Rmeh ma nây, phung pah kan tâm ngih brah Y-Đavit jêh ri phung kôranh hŏ dơm jêh gay kâp kơl phung Lêvi, geh bar rhiăng bar jât nuyh, lĕ rngôch bu hŏ nchih tâm samƀŭt.

²¹ Ta nây, dăch kơh dak krong Ahava, gâp kuăl ver ât sông sa, gay he ntrŭnh săk panăp măt Brah Ndu hên jêh ri dăn vơh vơl ma Păng ntĭm ăn gâp trong di gay hên jêh ri phung kon sau hên hăn, nđâp ma drăp ndơ hên.

²² Gâp geh nau prêng, mâu janh dăn hađăch du mpôl phung tahan jêh ri tahan ncho seh king n'gang hên tă bơh nơm rlăng tâm dôl hên hăn trong yorlah hên geh lah jêh ma hađăch pô aơ: “Ti Brah Ndu hên rgong lĕ rngôch bunuyh joi Păng, ƀiălah nau brah Păng jêh ri nau ji nuih Păng tâm rdâng đah ma mbu nơm dun chalơi Păng.”

²³ Pôri, hên ver ât sông sa jêh ri vơh vơl Brah Ndu nau nây jêh ri Păng tăng bâr hên vơh vơl.

²⁴ Tâm phung kôranh ƀư brah, gâp săch jât ma bar nuyh, jêng Y-Sêrêbia, Y-Hasabia jêh ri jât nuyh nâu oh khân păng.

²⁵ Jêh nây gâp njing ma khân păng prăk, mah jêh ri lĕ ndơ dŏng hŏ nhhơr jêh ăn ngih Brah Ndu he tă bơh hađăch, phung kơl nchră păng, phung kôranh hađăch, nđâp ma lĕ rngôch phung Israel geh măt ta nây.

²⁶ Pôri, gâp njing jao ma khân păng bar jât ton prăk, lĕ ndơ dŏng ma prăk klăp lah pe ton jêh ri pe ton mah,

²⁷ bar jât mlâm kachok ma mah klăp lah pham kilô n'gul, bar mlâm ngan grưng ma kông ueh ngăn, chrêk, khlay nâm bu mah lĕ.

²⁸ Jêh nây gâp lah ma khân păng: “Khân may hŏ dơi prăp êng ma nau kloh ueh ma Brah Yêhôva, jêh ri lĕ ndơ dŏng aơ ăt jêng kloh ueh. Prăk jêh ri mah nây jêng ndơ nđơr êng nhhơr ma Yêhôva Brah Ndu phung chô yau phung he.

²⁹ Djôt prăp hom lĕ ndơ dŏng nây nanê̆ kŏ tât nôk khân may njing tay tanăp măt phung kôranh ƀư brah toyh jêh ri phung Lêvi, ndrel tanăp măt phung kôranh noi deh phung Israel ta Yêrusalem, tâm lĕ jrô tâm ngih Brah Yêhôva.”

³⁰ Pônây, phung kôranh ƀư brah jêh ri phung Lêvi, lah jêh hŏ njing jâk prăk, mah, jêh ri lĕ ndơ dŏng nây jêh, jêh nây sŏk lĕ ndơ nây gay djôt leo tât Yêrusalem, dơm tâm ngih Brah Ndu he.

Plơ̆ sĭt ta Yêrusalem

³¹ Nar jât ma bar khay nguay, hên hăn ntơm tă bơh dak krong Ahava ŭch hăn tât ma Yêrusalem. Ti Brah Ndu hên rgong hên, jêh ri Păng tâm rklaih hên tă bơh ti phung rlăng jêh ri phung ntŭng njŏ trong.

³² Jêh nây, hên tât Yêrusalem, gŭ ta nây pe nar.

³³ Nar tal puăn, hên njing đŏng prăk, mah, jêh ri lĕ ndơ dŏng tâm ngih brah Brah Ndu, jêh nây jao ma Y-Mêrêmôt, kon bu klâu Y-Urija, kôranh ƀư brah (ndrel ma păng geh Y-Êlêasar, kon bu klâu Y-Phinêas, Y-Jôsaƀat, kon bu klâu Y-Jêsua, jêh ri Y-Nôadia, kon bu klâu Y-Binui, bunuyh Lêvi.)

³⁴ Bu kơp jêh ri njing lĕ rngôch ntil ndơ; njing jâk ăp ndơ bu nchih prăp tâm samƀŭt dôl rnôk nây.

³⁵ Phung bunuyh tă bu veng ƀư bu nă lĕ sĭt jêh, nhhơr ndơ ƀư brah gŭch ma Yêhôva Brah Ndu phung Israel geh jât ma bar mlâm ndrôk nkuăng yor lĕ rngôch phung Israel, sĭn jât ma prao mlâm biăp nkuăng; pơh jât ma pơh biăp kon, jêh ri jât ma bar mlâm be nkuăng gay ƀư ndơ ƀư brah chuai nau tih: Lĕ rngôch nhhơr da dê ƀư ndơ ƀư brah gŭch ma Brah Yêhôva.

³⁶ Khân păng jao samƀŭt nau ntrŭnh bơh hađăch ma phung kôranh n'gor jêh ri ma phung kôranh mât uănh hađăch gŭ mpeh đah ri dak krong. Phung nây kâp kơl phung ƀon lan jêh ri kan ngih brah Brah Ndu.