Êsra 7 - Nau Brah Ndu Ngơi 2023

Y-Êsra plơ̆ sĭt ma Yêrusalem

¹ Pakơi jêh nau nây, tâm rnôk rô̆ Artasersês, hađăch Persi, geh Y-Êsra jêng kon bu klâu Y-Sêraya,

² Y-Sêraya, kon bu klâu Y-Asaria; Y-Asaria, kon bu klâu Y-Hilkia, Y-Hilkia, kon bu klâu Y-Salum, Y-Salum, kon bu klâu Y-Sadôk, Y-Sadôk, kon bu klâu Y-Ahitup,

³ Y-Ahitup, kon bu klâu Y-Amaria, Y-Amaria kon bu klâu Y-Asaria, Y-Asaria kon bu klâu Y-Mêraiôt,

⁴ Y-Mêrayôt kon bu klâu Y-Sêrahia, Y-Sêrahia kon bu klâu Y-Usi,

⁵ Y-Usi kon bu klâu Y-Buki, Y-Buki kon bu klâu Y-Abisua, Y-Abisua kon bu klâu Y-Phinêas, Y-Phinêas kon bu klâu Y-Êlêasar, Y-Êlêasar kon bu klâu Y-Arôn, jêng kôranh ƀư brah lor lơn.

⁶ Y-Êsra nây plơ̆ sĭt tă bơh bri Babilôn. Păng jêng du huê kôranh nchih samƀŭt gĭt rbăng tâm nau vay Y-Môis, Yêhôva Brah Ndu phung Israel hŏ ntăm nti jêh. Yorlah ti Yêhôva Brah Ndu kơl ma păng, pôri hađăch ăn ma păng lĕ ndơ păng ŭch dăn.

⁷ Năm tal pơh, rnôk rô̆ hađăch Artasersês, geh ƀaƀă tâm phung Israel glom phung kôranh ƀư brah, phung Lêvi, phung kâp mprơ, phung gak njrăng mpông pêr, jêh ri phung pah kan ma ngih brah ndrel ma păng hăn hao rlet Yêrusalem.

⁸ Khay prăm, năm tal pơh rnôk hađăch nây, Y-Êsra văch tât ta Yêrusalem.

⁹ Păng hăn ntơm bơh Babilôn nar năng nguay, khay nguay, jêh ri yorlah ti ueh Brah Ndu păng rgong ta păng, păng tât ta Yêrusalem nar năng nguay khay prăm.

¹⁰ Yorlah Y-Êsra hŏ mĭn jêh ŭch nti nau vay Brah Yêhôva, djôt prăp jêh ri nti ma phung Israel gĭt lĕ rngôch nau vay dăp jêh ri nau vay ƀư.

¹¹ Aơ jêng pŏk samƀŭt kơt nchih tă bơh samƀŭt nau ntrŭnh bơh hađăch Artasersês jao jêh ma Y-Êsra, kôranh ƀư brah, ăt jêng kôranh nchih samƀŭt, nơm gĭt rbăng âk ma tâm lĕ nau vay ntăm jêh ri lĕ nau vay dăp bơh Brah Yêhôva hŏ ntăm ma phung Israel:

¹² “Artasersês, hađăch ma phung hađăch, nchih njuăl ma Y-Êsra, kôranh ƀư brah, jêh ri kôranh nchih samƀŭt, gĭt rbăng âk nau vay Brah Ndu klơ trôk. Ăn may dơi geh nau đăp mpăn ngăn!

¹³ Gâp ăn samƀŭt nau ntrŭnh pô aơ ma phung ƀon lan Israel gŭ tâm bri dak, mâu lah phung kôranh ƀư brah mâu lah phung Lêvi, ŭch sĭt ta Yêrusalem, hăn hom ndrel ma may.

¹⁴ Gâp jêh ri pơh nuyh phung kơl nchră gâp prơh may hăn ôp sek uănh ma phung Yuđa jêh ri ma Yêrusalem tĭng nâm nau vay bơh Brah Ndu may geh tâm ti.

¹⁵ May mra djôt leo ndrel may mah jêh ri prăk hađăch jêh ri phung kơl nchră păng ŭch nhhơr ma Brah Ndu phung Israel, Nơm dôl gŭ ta Yêrusalem,

¹⁶ nđâp ma lĕ rngôch prăk, mah may dơi sŏk rgum geh jêh ta bri Babilôn, ndrel ma ndơ nhhơr bơh phung ƀon lan jêh ri phung kôranh ƀư brah nđơr êng nhhơr ma ngih Brah Ndu khân păng ta Yêrusalem.

¹⁷ May njrăng hom dŏng prăk aơ rvăt phung ndrôk nkuăng, biăp nkuăng, biăp kon, ndrel ma ndơ ƀư brah rnih môi, ndơ nhhơr nhêt gay nhhơr ta klơ nơng ƀư brah tâm ngih Brah Ndu khân may ta Yêrusalem.

¹⁸ Bi ma prăk jêh ri mah hôm e rmeh, may jêh ri oh nâu may klăp lah dŏng tâm moh nau kan khân may saơ jêng ueh, tĭng nau mĭn ŭch Brah Ndu khân may.

¹⁹ Ma lĕ ndơ dŏng hŏ jao ma khân may gay dŏng ma kan yơk mbah tâm ngih Brah Ndu khân may, ăn dơm hom lĕ ndơ nây panăp Brah Ndu ta Yêrusalem.

²⁰ Ndơ hôm dŏng êng ŭch dŏng ăn ngih Brah Ndu may, jay ngih prăp ndơ hađăch mra ăn ma may.

²¹ Pôri, gâp jêng hađăch Artasersês ƀư du pŏk samƀŭt nau ntrŭnh ntăm ma phung kôranh djôt prăk tâm n'gor đah ri dak krong: Ăp moh ntil ndơ Y-Êsra, kôranh ƀư brah ăt jêng kôranh nchih samƀŭt gĭt rbăng ma nau vay Brah Ndu klơ trôk, dăn ma khân may, ăn khân may srôih ƀư bêng tŏng ma păng,

²² nđâp lah pe ton n'gul prăk, du rhiăng ƀau ba ƀlê, du rhiăng thŭng ndrănh, du rhiăng thŭng dak ngi ôlive, jêh ri boh mâu nhueh ôh.

²³ Ăp moh nau Brah Ndu klơ trôk ntăm nti ma ngih brah Păng, njrăng hom ƀư ma nau srôih, klach lah nau ji nuih Păng ƀư tŭp ma bri dak hađăch jêh ri ma phung kon bu klâu hađăch.

²⁴ Tâm ban lĕ gâp mbơh đŏng ma phung khân may gĭt, mâu dơi vay sŏk pi mâu lah prăk rvăt samƀŭt rsong trong bơh phung kôranh ƀư brah, phung Lêvi, phung kâp mprơ, phung gak njrăng mpông pêr, phung pah kan tâm ngih brah mâu lah bơh phung pah kan êng tâm Brah Ndu.

²⁵ Bi ma may, Y-Êsra, tĭng nâm nau blau mĭn Brah Ndu hŏ ăn ma may, njêng hom phung kôranh chiă uănh, phung phat dôih, jêng phung gĭt rbăng nau vay Brah Ndu may; gay khân păng phat dôih lĕ rngôch phung ƀon lan gŭ kơh đah ri dak krong. Bi ma phung ê hŏ gĭt nau vay, ăn khân may nti păng ăn gĭt.

²⁶ Tơlah geh bunuyh mâu ŭch tông ôh nau vay Brah Ndu may jêh ri nau vay hađăch, ăn khân may phat dôih ro ma păng, mâu lah ma nau khĭt, mâu lah ma nau ƀư dĭk, mâu lah sŏk lĕ rngôch drăp ndơ păng mâu lah krŭng.”

²⁷ Y-Êsra lah: “Tâm rnê ma Yêhôva Brah Ndu chô yau hên, jêng Nơm hŏ dơm nau aơ tâm nuih n'hâm hađăch gay nkrơ̆ ngih brah Brah Yêhôva ta Yêrusalem,

²⁸ jêh ri ƀư ăn gâp geh nau yô̆ tanăp măt hađăch, phung kôranh kơl nchră jêh ri tanăp phung kôranh chiă uănh geh nau dơi bơh hađăch! Gâp geh nau janh nănh, yorlah ti Yêhôva Brah Ndu gâp gŭ ndrel gâp jêh ri gâp rgum phung kôranh chiă uănh Israel gay plơ̆ sĭt tâm n'gor ndrel ma gâp.”