Êsra 6 - Nau Brah Ndu Ngơi 2023

Hađăch Darius ăn samƀŭt nau ntrŭnh. – Nhhơr ngih brah djôt prăp rƀŭn Nau Găn

¹ Hađăch Darius ntrŭnh ăn bu sek uănh joi tâm ngih jrô prăp samƀŭt ndơ khlay tâm bri Babilôn.

² Bu joi dơi saơ tâm pôih ta ƀon Êkbatana, jêng ƀon ta n'gor Mêdơ, du ndrom samƀŭt bu klôn geh nau nchih pô aơ:

³ “Năm rơh nguay rnôk rô̆ Y-Sirus, hađăch ntrŭnh du nau ntăm ngih brah Brah Ndu ta ƀon Yêrusalem pô aơ: ‘Ndâk njêng hom ngih brah Brah Ndu ta ntŭk mbon ơm gay ƀư ntŭk nhhơr ndơ ƀư brah. Ngih brah prêh klăp lah pe jât met jêh ri dĭ pe jât met,

⁴ geh pe mbor lŭ du nku jêh ri du mbor njon rkăng tơm si mhe. Rnoh prăk bu ƀư ngih nây mra sŏk tă bơh ntŭk prăp prăk tâm ngih hađăch ƀơk prăk nkhôm.

⁵ Lĕ ndơ dŏng ma mah jêh ri prăk bơh ngih Brah Ndu, ndơ nây Y-Nêbukatnetsar lĕ sŏk jêh tă bơh tâm ngih brah ta Yêrusalem jêh ri djôt leo tât ma Babilôn, pôri aƀaơ mplơ̆ sĭt lơi ma ngih brah ta Yêrusalem jêh ri dơm ndơ nây ta ntŭk ơm tâm ngih Brah Ndu.’”

⁶ “Pôri aƀaơ, hơi Y-Tatênai, kôranh chiă uănh tâm n'gor đah ri dak krong, hơi Y-Sêthar-Bôsênai, jêh ri phung pah kan ndrel phung Aphatsak ta đah ri dak krong, ăn khân may du ngai tă bơh ntŭk nây, lơi geh kơl an tâm nau kan rdâk ngih brah Brah Ndu.

⁷ Gay ăn ma phung kôranh mât uănh phung Yuđa jêh ri phung bu ranh khân păng ndâk nkra đŏng ngih brah ma Brah Ndu ta ntŭk ơm.

⁸ Aơ jêng nau gâp ntrŭnh tât ma nau kan ma khân may mra ƀư đah phung bu ranh phung Yuđa tâm nau ndâk nkra đŏng ngih Brah Ndu aơ: Sŏk dŏng hom prăk ngih hađăch bơh lĕ kô̆ prăk pi tâm n'gor mpeh nhâp nar Dak Krong Ơphrat gay nkhôm rĭng lĕ rnoh prăk ndâk ma phung nây, lơi ăn nau kan tăch yơt hêng.

⁹ Moh ntil ndơ khân păng ê hŏ geh tâm ban ndrôk nkuăng rah, biăp nkuăng mâu lah biăp kon, mâu lah ba ƀlê, boh, ndrănh, mâu lah dak ngi ôlive, dŏng ma ndơ ƀư brah gŭch nhhơr ma Brah Ndu, tĭng nâm nau phung kôranh ƀư brah gŭ ta ƀon Yêrusalem dăn đă, ăn hom ndơ nây ma khân păng bêng tŏng ăp nar,

¹⁰ gay ăn khân păng nhhơr ndơ ƀư brah geh n'hôl ƀâu kah ma Brah Ndu klơ trôk, jêh ri mbơh sơm ma gâp nđâp phung kon bu klâu hađăch dơi rêh jŏ năm.

¹¹ Gâp ntrŭnh nau ntăm pô aơ, tơlah mbu moh rlăch samƀŭt nau ntrŭnh aơ, pôri bu mra sŏk du mlâm rkăng vâl tâm ngih nơm nây, kôih mplanh jêh ri ntâp lăp săk jăn păng jêh ri ngih păng mra jêng du mbŭch njŏk.

¹² Dăn Brah Ndu, Nơm hŏ ƀư ăn jêh amoh Păng gŭ tâm ngih brah nây, mra ƀư rai lơi mbu moh hađăch, mâu lah mbu phung ƀon lan yơr ti ŭch rgâl lơi nau ntrŭnh aơ gay ƀư rai lơi ngih Brah Ndu ta Yêrusalem. Gâp jêng Darius ăn samƀŭt nau ntrŭnh aơ. Srôih hom ƀư ăn di nau aơ!”

¹³ Y-Tatênai, kôranh mât uănh n'gor đah ri dak krong, Y-Sêthar-Bôsênai jêh ri phung pah kan ndrel khân păng srôih ƀư nau ntrŭnh bơh hađăch Darius hŏ ntăm.

¹⁴ Pôri phung bu ranh phung Yuđa thoi đŏng ndâk ngih brah jêh ri nau kan ƀư dơi chăt hao, di nâm bu nau nơm mbơh lor Y-Hagai jêh ri nơm mbơh lor Y-Sakari, kon bu klâu Y-Idô. Khân păng ƀư lôch jêh nau kan ndâk ngih brah, tĭng nâm nau ntăm bơh Brah Ndu phung Israel jêh ri tĭng nau ntrŭnh bơh hađăch Persi jêng Y-Sirus, Darius, jêh ri Artasersês.

¹⁵ Ngih brah aơ dơi ƀư lôch jêh ta nar rơh pe khay Adar, tâm năm rơh prao rnôk rô̆ hađăch Darius.

¹⁶ Phung ƀon lan Israel, phung kôranh ƀư brah, phung Lêvi, jêh ri lĕ rngôch phung êng lĕ plơ̆ sĭt tă ƀư bu nă, văch râng da dê nau rƀŭn nhhơr ngih brah ma Brah Ndu bêng ma nau hâk răm.

¹⁷ Tâm nau rƀŭn nhhơr ngih brah aơ ma Brah Ndu, khân păng nhhơr du rhiăng mlâm ndrôk nkuăng, bar rhiăng mlâm biăp nkuăng, puăn rhiăng mlâm biăp kon, jêh ri tĭng nâm rnoh phung ndŭl mpôl Israel, khân păng ăt nhhơr jât ma bar mlâm be nkuăng ƀư ndơ ƀư brah chuai nau tih ma lĕ rngôch phung Israel.

¹⁸ Khân păng njêng phung kôranh ƀư brah jêh ri phung Lêvi tĭng nâm mpôl khân păng, gay pah kan ma Brah Ndu ta Yêrusalem, di nâm bu hŏ nchih tâm ndrom samƀŭt Y-Môis.

¹⁹ Ta nar rơh jât ma puăn khay nguay, phung tă ƀư bu nă sĭt djôt prăp rƀŭn Nau Găn.

²⁰ Lĕ rngôch phung kôranh ƀư brah jêh ri phung Lêvi, mâu klen du huê ôh, hŏ ƀư kloh jêh khân păng nơm. Jêh nây khân păng yorlah lĕ rngôch bunuyh lĕ tă bơh nau ƀư bu nă dơi sĭt jêh, yorlah phung kôranh ƀư brah, jêng băl mpôl khân păng nơm, jêh ri yor khân păng nơm, khân păng nkhĭt biăp kon rƀŭn Nau Găn.

²¹ Phung bunuyh Israel lĕ tă bơh nau ƀư bu nă plơ̆ sĭt sa rƀŭn Nau Găn ndrel ma phung hŏ chalơi nau ƀơ̆ ƀơch phung mpôl băl bunuyh tâm n'gor gay joi Yêhôva Brah Ndu phung Israel.

²² Khân păng djôt prăp nau rƀŭn Piăng Let Mâu Geh Ndrui tâm pơh nar ma nau răm maak, yorlah Brah Yêhôva hŏ ƀư ăn nuih n'hâm khân păng hâk răm nôk rgâl nuih n'hâm hađăch Asiri, ƀư ăn hađăch kơl ma khân păng tâm nau ndâk ngih brah Brah Ndu, jêng Brah Ndu phung Israel.