Êsra 5 - Nau Brah Ndu Ngơi 2023

Ndâk njêng tay ngih brah

¹ Nôk nây, nơm mbơh lor Y-Hagai jêh ri nơm mbơh lor Y-Sakari, kon Y-Idô, amoh Brah Ndu phung Israel gay mbơh nkoch nau Kôranh Brah ngơi ma phung Yuđa gŭ tâm n'gor Yuđa jêh ri tâm ƀon Yêrusalem.

² Y-Sôrôƀaƀel, kon bu klâu Y-Sêaltiêl, jêh ri Y-Jêsua, kon bu klâu Y-Jôsadak, mhe tăng nau ngơi Kôranh Brah mbơh nkoch, khân păng ro ntơm ndâk ngih Brah Ndu ta ƀon Yêrusalem, ndrel ma nau kơl bơh phung nơm mbơh lor Brah Ndu.

³ Tâm rnôk nây, Y-Tatênai, kôranh chiă uănh n'gor mpeh đah ri dak krong, Y-Sêthar-Bôsênai, jêh ri phung pah kan ndrel ma khân păng, hăn joi phung Yuđa, gay lah ma khân păng: “Mbu moh ăn nau ntrŭnh aơ ma khân may dơi ndâk tay du mlâm ngih brah aơ jêh ri mpêr ƀon aơ?”

⁴ Khân păng ôp đŏng: “Mâm amoh phung bunuyh ndâk ngih brah aơ?”

⁵ Ƀiălah Brah Ndu n'gang phung bu ranh phung Yuđa, yor ri khân păng mâu buay ôh nau rdâk kŏ tât nôk plơ̆ mbơh nau nây ma hađăch Darius, jêh ri hađăch ăn samƀŭt nau ntrŭnh ma nau kan nây.

⁶ Aơ jêng pŏk samƀŭt kơt nchih bơh samƀŭt Y-Tatênai, kôranh chiă uănh n'gor mpeh đah ri dak krong, Y-Sêthar-Bôsênai, jêh ri phung pah kan ndrel ma khân păng, phung Aphatsac, mbơh ma hađăch Darius.

⁷ Nau tâm samƀŭt nây nchih pô aơ: “Nchih njuăl ma hađăch Darius geh nau đăp mpăn!

⁸ Hên ăn hađăch gĭt pô aơ hên hŏ hăn jêh tâm n'gor Yuđa jêh ri tât ta ngih Brah Ndu dŭt toyh. Phung Yuđa ndâk ngih brah nây ma lŭ du nku jêh ri bu lĕ krĭp n'hao rkăng mpir jêh. Nau kan ƀư nanê̆ ngăn jêh ri gơih nđơr hao jêng tă ti khân păng.

⁹ Hên ôp ma phung bu ranh nây pô aơ: ‘Mbu moh ăn nau ntrŭnh ma khân may ndâk ngih brah aơ jêh ri mpêr ƀon aơ?’

¹⁰ Tâm ban lĕ hên ôp amoh săk khân păng gay mbơh ăn hađăch gĭt amoh lĕ phung chiă uănh khân păng.

¹¹ Khân păng plơ̆ lah kơt aơ: ‘Hên jêng phung oh mon Brah Ndu, Kôranh Brah ma trôk jêh ri neh ntu. Hên dôl ndâk nkra đŏng ngih brah aơ, hŏ jŏ năm jêh lor panăp nơh, geh du huê hađăch toyh Israel hŏ ndâk njêng jêh ri ƀư lôch jêh.

¹² Ƀiălah phung chô yau hên nsônh nau ji nuih Brah Ndu, yor ri Păng jao khân păng tâm ti Y-Nêbukatnetsar, hađăch Babilôn, jêng phung Kaldê. Hađăch nây ƀư rai ngih brah aơ jêh ri veng phung ƀon lan leo tât ta Babilôn.

¹³ Ƀiălah năm tal nguay rnôk rô̆ Y-Sirus, hađăch Babilôn, hađăch ntrŭnh ăn ndâk đŏng ngih brah ma Brah Ndu.

¹⁴ Hađăch Y-Sirus sŏk tay tă bơh ngih brah Babilôn lĕ rngôch ngan grưng ma mah jêh ri prăk ngih Brah Ndu, lĕ ndơ nây Nêbukatnetsar sŏk nchuăn lơi tă bơh ngih brah tâm ƀon Yêrusalem jêh ri djôt leo ndơ nây prăp tâm ngih brah Babilôn. Hađăch jao lĕ ndơ nây ma Y-Sêsbasar, jêng nơm kôranh chiă uănh.’

¹⁵ Păng lah ma păng: ‘Sŏk hom lĕ ndơ dŏng aơ dơm tâm ngih brah ta ƀon Yêrusalem, jêh ri ăn bu ndâk nkra đŏng ngih Brah Ndu ta ntŭk ơm.’

¹⁶ Yor ri Y-Sêsbasar hăn tât Yêrusalem jêh ri ndâk njêng mbon ngih brah Brah Ndu. Ntơm bơh nôk nây tât aƀaơ, nau ndâk nkra ăt thoi đŏng, ƀiălah ê hŏ lôch ôh.

¹⁷ Pôri aƀaơ, tơlah hađăch mĭn ueh, ăn bu sek uănh joi hom tâm ntŭk jrô prăp lĕ ndơ khlay ngih hađăch ta Babilôn, gay saơ gĭt lah ngăn hađăch Sirus ăn samƀŭt nau ntrŭnh ndâk đŏng ngih brah ma Brah Ndu ta ƀon Yêrusalem mâu lah mâu. Pakơi nây, dăn hađăch ăn samƀŭt nau ntrŭnh ma nau kan aơ.”