Êsra 4 - Nau Brah Ndu Ngơi 2023

Phung rlăng tâm rdâng ma nau ndâk tay ngih brah

¹ Tơlah phung rlăng đah phung Yuđa jêh ri phung Benjamin tăng lư ma phung tă ƀư bu nă lĕ sĭt jêh gŭ ndâk ngih brah ăn Yêhôva Brah Ndu phung Israel,

² khân păng hăn tât ma Y-Sôrôƀaƀel jêh ri ăp kôranh ƀon lah: “Hên ŭch rdâk ndrel ma khân may, yorlah hên joi Brah Ndu tâm ban khân may lĕ, jêh ri hên hŏ ƀư brah ma Păng ntơm bơh rnôk Y-Êsarhadôn, hađăch Asiri, jêng nơm hŏ njŭn hên văch ta aơ.”

³ Ƀiălah Y-Sôrôƀaƀel, Y-Jêsua, jêh ri phung kôranh noi deh ƀaƀă Israel, plơ̆ lah ma khân păng pô aơ: “Khân may mâu geh du kô̆ ôh ndrel phung hên tâm nau ndâk du mlâm ngih brah ăn ma Brah Ndu hên. Ƀiălah, knŏng êng hên nơm dơm, mra ndâk du mlâm ngih brah ăn Yêhôva Brah Ndu phung Israel, tĭng nâm nau Y-Sirus, hađăch Persi, hŏ ntăm jêh ma hên.”

⁴ Rnôk nây phung ƀon lan tâm n'gor ƀư ma phung Yuđa rdja nuih n'hâm, dôl khân păng rdâk.

⁵ Khân păng nkhôm phung kơl nchră kan tâm rdâng đah phung Yuđa, gay ƀư rai lơi nau khân păng ŭch mĭn ƀư, dôl rnôk chiă uănh Y-Sirus, hađăch Persi, kŏ tât rnôk Y-Darius, hađăch Persi.

⁶ Dôl rnôk Y-Asuêrus, tơlah hađăch ntơm chiă uănh, khân păng nchih du plơp samƀŭt phong ma phung Yuđa jêh ri phung gŭ ta ƀon Yêrusalem.

⁷ Tât ta rnôk Artasersês, geh Y-Bislam, Y-Mirêdat, Y-Tabêel jêh ri lĕ rngôch băl khân păng pah kan ndrel nchih samƀŭt ma Artasersês, hađăch Persi. Samƀŭt nây bu nchih tâm rplay samƀŭt Aram jêh ri rblang tay ma hađăch.

⁸ Kôranh toyh tahan Y-Rêhum jêh ri kôranh nchih samƀŭt Y-Simsai ăt nchih samƀŭt tâm rdâng đah Yêrusalem ma hađăch Artasersês, pô aơ:

⁹ “Kôranh toyh tahan Y-Rêhum, kôranh nchih samƀŭt Y-Simsai jêh ri lĕ rngôch phung băl khân păng pah kan ndrel, jêng phung Đinit, phung Aphatsathit, phung Tatbêlit, phung Aphatsit, phung Atkêvit, phung Babilôn, phung Susa, phung Đêhavit, phung Êlam,

¹⁰ jêh ri phung mpôl băl êng Y-Ôsnapar nơm toyh jêh ri nơm bu yơk leo du luh tă bơh bri khân păng nơm, ăn gŭ tâm ƀon Samari jêh ri tâm n'gor bri êng mpeh kơh ri dak krong.”

¹¹ Aơ jêng samƀŭt kơt nchih tă bơh samƀŭt khân păng hŏ njuăl jêh ma hađăch Artasersês: “Phung oh mon may, gŭ tâm n'gor mpeh nhâp nar dak krong Ơphrat, mbah hađăch Artasersês.

¹² Mbah hađăch gĭt rah vah phung Yuđa tă bơh ntŭk hađăch gŭ hŏ hăn tât ntŭk hên ta ƀon Yêrusalem. Khân păng dôl ndâk nkra tay nau tâm rdâng jêh ri nau mhĭk ngăn; khân păng ntơm ndâk nkra tay mpêr ƀon, bi mbon hŏ nkra lôch jêh.

¹³ Pôri, ăn hađăch gĭt pô aơ tơlah ƀon aơ hŏ ndâk đŏng tât lôch jêh, jêh ri mpêr ƀon nkra ndâk tay, nanê̆ khân păng mâu mra nhhơr ndơ, chê̆ pi ôh, mâu lah chê̆ prăk ma nau rvăt samƀŭt rsong trong, jêh nây n'hêl nanê̆ prăk tâm ngih hađăch mra hŭch.

¹⁴ Yorlah hên dơn nau ueh âk tă bơh ngih hađăch, jêh ri mâu đŏng ŭch saơ nau bêk prêng ma hađăch ôh, pôri hên prơh phung mbơh tât ma hađăch,

¹⁵ gay ma bu sek uănh joi tâm nau rêh jêng phung chô yau hađăch. Tơlah bu sek uănh joi tâm ndrom samƀŭt nau rêh jêng nây, hađăch mra gĭt pô aơ ƀon nây jêng du ƀon tâm rdâng, ƀư nau mhĭk ma phung hađăch jêh ri lĕ n'gor. Ntơm bơh rnôk kăl e, phung ƀon lan gŭ ta nây vay ƀư nau tâm rdâng jêh ri yor nau nây ƀon aơ bu hŏ ƀư rai jêh.

¹⁶ Hên mbơh ăn hađăch gĭt tơlah ƀon aơ dơi ndâk njêng tay, jêh ri mpêr ƀon păng dơi nkra ndâk đŏng, nanê̆ ngăn hađăch mra mâu hôm geh tâm n'gor mpeh nhâp nar dak krong Ơphrat đŏng ôh.”

¹⁷ Hađăch njuăl samƀŭt ntrŭnh nau ăn ma kôranh toyh tahan Y-Rêhum, kôranh nchih samƀŭt Y-Simsai, jêh ri ma phung pah kan ndrel khân păng gŭ tâm n'gor Samari jêh ri lĕ n'gor êng mpeh đah ri dak krong, pô aơ: “Nau đăp mpăn ma khân may.

¹⁸ Samƀŭt khân may njuăl jêh ma gâp lĕ rblang jêh ri rŏ rah vah tanăp măt gâp.

¹⁹ Gâp hŏ ăn nau ntrŭnh bu sek uănh joi jêh ri bu lĕ saơ ntơm bơh rnôk rô̆ kăl e, ƀon aơ vay ƀư nau tâm rdâng ma phung hađăch, tâm rdâng jêh ri ƀư nau tâm rdâng vay tât geh tâm ƀon nây.

²⁰ Ta ƀon Yêrusalem hŏ geh phung hađăch geh nau dăng ktang chiă uănh ta mpeh đah ri dak krong, jêh ri bu nhhơr ndơ, chê̆ pi jêh ri chê̆ prăk rvăt samƀŭt rsong trong ma phung hađăch nây.

²¹ Yor nây, khân may nchih hom du nau ntrŭnh rlu lơi ma nau ndâk tay ôh ƀon aơ, ăn tât nar gâp ăn samƀŭt nau ntrŭnh ma nau kan nây.

²² Ăn khân may njrăng ma nau kan aơ, klach lah phung hađăch geh nau mhĭk âk lơn.”

²³ Hŏ lôch jêh răk samƀŭt nau ntrŭnh bơh hađăch Artasersês tanăp măt Y-Rêhum, kôranh nchih samƀŭt Y-Simsai jêh ri phung pah kan ndrel khân păng, pôri khân păng hăn ma nau ndal rlet ma phung ƀon lan Yuđa ta Yêrusalem, sŏk nau dơi ktang nchâp gay ăn khân păng rlu lơi kan rdâk.

²⁴ Pônây nau kan rdâk ngih Brah Ndu ta ƀon Yêrusalem rlu hêng, kŏ tât năm rơh bar rnôk Darius, hađăch Persi, chiă uănh.