Êsra 3 - Nau Brah Ndu Ngơi 2023

Ndâk njêng đŏng nau yơk mbah

¹ Tât khay pơh, tơlah phung Israel hŏ gŭ jêh tâm lĕ ƀon khân păng nơm jêh, pôri phung ƀon lan tâm rƀŭn tâm ban du huê bunuyh ta ƀon Yêrusalem.

² Rnôk nây, Y-Jêsua, kon bu klâu Y-Jôsadak, jêh ri phung oh nâu păng jêng kôranh ƀư brah êng, ndrel ma Y-Sôrôƀaƀel, kon bu klâu Y-Sêaltiêl jêh ri phung mpôl băl păng, dâk hăn gay ndâk nkra nơng ƀư brah Brah Ndu phung Israel, gay nhhơr ndơ ƀư brah gŭch ta klơ nơng nây, tĭng nâm nau nchih jêh tâm nau vay Y-Môis, jêng bunuyh Brah Ndu.

³ Khân păng klach ma phung ƀon lan tâm n'gor nây, pôri ndâk tay nơng ƀư brah ta ntŭk mbon ơm jêh ri nhhơr ta nây ndơ ƀư brah gŭch ma Brah Yêhôva, jêng ndơ ƀư brah gŭch kêng ôi jêh ri kêng mhaơ.

⁴ Khân păng mât đŏng nau rƀŭn Ngih Ndưp, tĭng nâm nau hŏ nchih, jêh ri nhhơr lĕ ndơ ƀư brah gŭch ăp nar, tĭng nâm rnoh hŏ dăp jêh tâm di ăp nar.

⁵ Pakơi nây, khân păng nhhơr lĕ ndơ ƀư brah gŭch ƀaƀơ, nđâp ma lĕ ndơ ƀư brah ta nar bôk khay mhe jêh ri ta lĕ rngôch nar rƀŭn khư yơk prăp ma nau kloh ueh ma Brah Yêhôva, tâm ban đŏng lĕ ndơ ƀư brah ma ăp nơm ŭch nhhơr ma Brah Yêhôva.

⁶ Ntơm bơh lơ nguay khay pơh, khân păng ntơm nhhơr ndơ ƀư brah gŭch ma Brah Yêhôva nđâp lah ê hŏ ndâk mbon ngih Brah Yêhôva.

⁷ Khân păng ăn prăk ma phung ndâk lŭ, phung trah si, ăn ndơ sông sa, dak nhêt, jêh ri dak ngi ôlive ma phung Sidôn jêh ri Tyre, gay khân păng djôt leo tơm si sêdar tă bơh bri Liban tât ta dak mƀŭt Jôpa, tĭng nâm samƀŭt nau ntrŭnh tă bơh Y-Sirus, hađăch Persi.

⁸ Khay bar năm rơh bar, tơlah khân păng tât jêh ta ngih Brah Ndu ta Yêrusalem, Y-Sôrôƀaƀel, kon bu klâu Y-Sêaltiêl, jêh ri Y-Jêsua, kon bu klâu Y-Jôsadak, ndrel ma lĕ rngôch phung oh nâu khân păng ƀaƀă, jêng phung kôranh ƀư brah, phung Lêvi, nđâp ma lĕ rngôch phung tă bơh nau ƀư bu nă hŏ plơ̆ sĭt ta Yêrusalem, ntơm pah kan ndâk ngih brah. Khân păng dơm kan ma phung Lêvi, ntơm bơh bar jât năm klơ, ăn khân păng mât uănh nau pah kan ndâk ngih brah Brah Yêhôva.

⁹ Rnôk nây, Y-Jêsua ndrel ma phung kon bu klâu jêh ri oh nâu păng, Y-Katmiêl ndrel phung kon bu klâu păng, phung kon sau Y-Yuđa jêh ri phung kon sau Y-Hênadat, jêng phung Lêvi, ndrel ma phung kon bu klâu jêh ri phung oh nâu khân păng, chiă uănh ndrel lĕ phung pah kan tâm ngih Brah Ndu.

¹⁰ Tơlah phung ƀư mon mbon ngih Brah Yêhôva, phung kôranh ƀư brah nsoh ao khân păng jêh ri djôt nŭng, bi ma phung Lêvi, kon sau Y-Asap djôt ching ndrup tâm nchâm dâk ta nây gay tâm rnê ma Brah Yêhôva tĭng nâm bu nau Y-Đavit, hađăch phung Israel, hŏ ntăm jêh.

¹¹ Khân păng mprơ tâm rdơn ndrăng khân păng gay mât ton jêh ri tâm rnê lah ueh ma Brah Yêhôva pô aơ: “Păng ueh ngăn, Nuih n'hâm yô̆ nđach Păng đah phung Israel hôm kŏ tât ƀaƀơ n'ho ro!” Jêh nây lĕ rngôch bunuyh ƀon lan ma du bâr nter huy toyh, tâm rnê Brah Yêhôva, yorlah mbon ngih Brah Yêhôva dơi ndâk njêng jêh.

¹² Âk phung kôranh ƀư brah, phung Lêvi, kôranh ƀon, jêng phung bu ranh hŏ saơ ngih brah kăl e ri, khân păng nhĭm nter dôl nôk saơ mbon ngih brah mhe bu hŏ ndâk njêng jêh, nôk nây geh âk đŏng phung êng troh nter yorlah răm rhơn.

¹³ Bu mâu gĭt năl ôh bâr răm rhơn ma đah bâr phung nter nhĭm, yorlah phung ƀon lan troh nter hâu ngăn jêh ri bâr nter nây huy ăp ntŭk.