Êsra 1 - Nau Brah Ndu Ngơi 2023

Hađăch Sirus ăn nau ntrŭnh gay ndâk njêng tay ngih Yêrusalem

¹ Năm rơh nguay rnôk rô̆ Y-Sirus, hađăch Persi, Brah Yêhôva ŭch ƀư tât di nau ngăn Păng hŏ ngơi jêh ma bâr mbung Y-Yêrêmi, yor ri Brah Yêhôva hŏ nsŭk nsôr nuih n'hâm Y-Sirus, hađăch Persi, ăn nau ntrŭnh jêh ri mbơh tâm lam bri dak păng pô aơ:

² “Y-Sirus, hađăch Persi, lah: ‘Brah Yêhôva, Brah Ndu klơ lĕ ndâr trôk, ăn jêh lĕ rngôch bri dak lam ta neh ntu jêh ma gâp, jêh ri Păng nơm yơh hŏ ntăm jêh ma gâp ndâk ăn Păng du rplay ngih brah ta ƀon Yêrusalem, tâm n'gor Yuđa.

³ Tâm khân may, mbu moh jêng phung ƀon lan Păng — dăn Brah Ndu gŭ ndrel ma păng — hăn hao hom ma ƀon Yêrusalem tâm n'gor Yuđa gay ndâk tay đŏng ngih brah Brah Yêhôva, jêng Brah Ndu phung Israel, Păng hôm gŭ ta Yêrusalem.

⁴ Jêh ri phung ƀon lan gŭ ta ntŭk phung Yuđa hôm e klen dôl gŭ rêh, ăn kơl khân păng ma prăk, mah, drăp ndơ, mpô mpa rong, nđâp ma lĕ ndơ nhhơr hŏ mĭn jêh ma ngih Brah Ndu ta Yêrusalem.’ ”

⁵ Rnôk nây, phung kôranh ƀon Yuđa jêh ri phung Benjamin, phung kôranh ƀư brah, jêh ri phung Lêvi, ndrel ma lĕ rngôch bunuyh Brah Ndu hŏ nsŭk nsôr tâm nuih n'hâm ŭch hăn hao ndâk njêng đŏng ngih brah Brah Yêhôva ta ƀon Yêrusalem, hŏ ndrăp hăn.

⁶ Lĕ rngôch phung chiau meng khân păng kơl ndơ ma khân păng, lĕ ndơ ƀư ma prăk, ma mah, drăp ndơ, mpô mpa rong, jêh ri ndô ndơ khlay, nđâp ma lĕ ndơ nhhơr êng êng.

⁷ Hađăch Sirus tâm ban lĕ mplơ̆ tay lĕ ndơ dŏng ngih brah Brah Yêhôva, ndơ hađăch Nêbukatnetsar sŏk nchuăn jêh tă bơh Yêrusalem jêh ri dơm tâm ngih phung brah păng.

⁸ Y-Sirus, hađăch Persi, mbơh ma Y-Mirêdat, kôranh djôt prăk, sŏk lĕ rngôch ndơ dŏng nây, kơp jêh ri jao ma Y-Sêsbasar, kôranh mât uănh phung Yuđa.

⁹ Aơ jêng rnoh kơp lĕ ndơ dŏng nây: pe jât mlâm ngan grưng mah, du rbăn mlâm ngan grưng prăk, bar jât ma sĭn mlâm pêh,

¹⁰ pe jât mlâm kachok mah; puăn rhiăng jât mlâm kachok prăk ntil tal bar, jêh ri du rbăn lĕ ndơ dŏng êng.

¹¹ Lĕ rngôch ndơ dŏng mah jêh ri prăk geh prăm rbăn puăn rhiăng mlâm. Rnôk phung ƀư bu nă tă bơh Babilôn bu leo sĭt ma ƀon Yêrusalem, Y-Sêsbasar djôt leo đŏng lĕ rngôch ndơ nây.