Êsêkiêl 9 - Nau Brah Ndu Ngơi 2023

Nau tâm rmal ma ƀon Yêrusalem

¹ Păng nter kuăl nteh huy ta tôr gâp pô aơ: “Ăn phung mât uănh ƀon toyh văch dăch hom, ăp nơm djôt ndơ tâm lơh ƀư rai tâm ti păng nơm.”

² Jêh ri, geh prao nuyh tă bơh mpông pêr ta klơ mpeh pa lơ văch tât, ăp nơm djôt ndơ tâm lơh nkhĭt bunuyh tâm ti. Tâm phung khân păng geh du huê nsoh ao bok mhay, ta gang bŭt păng văn hip ndơ nchih. Prao bunuyh chuat lăp dâk ta meng nơng ƀư brah ma kông.

³ Nau chrêk rmah Brah Ndu Israel hao trơn bơh Chêrub jêng ntŭk păng vay gŭ hăn tât ta kađar lăp mpông sâng ngih brah. Brah Yêhôva kuăl bunuyh nsoh ao bok mhay, gang bŭt văn hip ndơ nchih

⁴ jêh ri lah: “Hăn hom rgăn lam ƀon, jêng ƀon Yêrusalem, jêh ri nchih nau mbên ta ndăr kleng phung bunuyh vơl nter, nhĭm nhhiăng ma lĕ rngôch nau mhĭk hŏ ƀư tih jêh nklang ƀon aơ.”

⁵ Jêh nây gâp tăng Păng lah ma phung êng pô aơ: “Tĭng hom pakơi bunuyh nây, hăn lam ƀon jêh ri lơh nkhĭt; măt may uănh lơi nhhuach ôh, mâu lĕ geh nau yô̆.

⁶ Nkhĭt lĕ hom, ƀă phung bu ranh, ƀă phung mom ndăm, ƀă phung bu ur druh, ƀă bu ur me jêh ri phung kon se jê̆, ƀă bu-ur jêh ri kon se jê̆. Ƀiălah lơi hăn dăch mbu geh nchih nau mbên ta ndăr kleng. Ntơm hom tă bơh phung bu ranh gŭ panăp ngih.”

⁷ Păng lah đŏng ma khân păng: “Ƀư ƀơ̆ hom ngih brah, ƀư ma săk jăn khĭt bêng ma lĕ nkual nhuang! Hăn hom!” Pôri khân păng hăn jêh ri lơh nkhĭt bunuyh tâm ƀon.

⁸ Dôl khân păng lơh nkhĭt gâp gŭ êng du huê. Gâp păn muh măt jêh ri kuăl nter pô aơ: “Ơ Yêhôva Brah Ndu! May ŭch nkhŭt nau ji nuih tâm ƀon Yêrusalem gay ƀư rai lơi lĕ rngôch phung hôm klen ta ƀon Israel mâm ƀư?”

⁹ Păng lah ma gâp pô aơ: “Nau tih mhĭk ngih Israel jêh ri Yuđa hŏ toyh hâu ngăn. Bri neh bêng ma nau pling mham, tâm ƀon bêng nau mâu sŏng yorlah khân păng lah pô aơ: ‘Brah Yêhôva hŏ chalơi jêh bri neh aơ, Brah Yêhôva mâu saơ ôh.’

¹⁰ Bi ma Gâp, măt Gâp uănh mâu mra nhhuach ôh, mâu mra yô̆ klâng lĕ. Gâp mra ƀư trong khân păng nkhŭt ta klơ bôk khân păng nơm.”

¹¹ Ri, bunuyh nsoh ao bok mhay, hip ndơ nchih plơ̆ sĭt mbơh pô aơ: “Gâp ƀư jêh tĭng nâm nau May hŏ ntăm.”