Êsêkiêl 8 - Nau Brah Ndu Ngơi 2023

Phung ƀon lan Yêrusalem mbah rup brah

¹ Năm rơh prao, ta năng prăm khay prao, dôl gâp gŭ tâm ngih gâp ndrel ma phung bu ranh Yuđa gŭ panăp, ti Yêhôva Brah Ndu pah ta gâp.

² Nôk nây, gâp saơ du mlâm rup tâm ban ma ŭnh. Tă bơh gang bŭt bunuyh nây rlet pa dâng jêng ŭnh; bi ma ntơm bơh bŭt rlet klơ geh nau nchrat lơp nâm bu kông chrêk.

³ Păng yơr ti tâm ban ma rup mpang ti djôt du pha sŏk ta klơ bôk gâp. Huêng Brah chông gâp leo klơ vah vang trôk đah neh tâm nau tâm saơ Brah Ndu mpơl ma gâp. Gâp dơi leo tât ma ƀon Yêrusalem, ta ntŭk lăp mpông pêr tâm nkual tâm trôm mpeh pa lơ, jêng ntŭk geh ndâk rup brah nau ntôn ƀư ma nau ntôn.

⁴ Ri nau chrêk rmah Brah Ndu Israel gŭ ta nây nâm bu gâp hŏ uănh nau tâm saơ ta neh lâng.

⁵ Păng lah ma gâp: “Hơi kon bunuyh, n'gơr uănh hom mpeh pa lơ.” Pônây gâp n'gơr măt uănh mpeh pa lơ, jêh ri nĕ, mpeh pa lơ mpông pêr nơng ƀư brah, ntŭk trong lăp, geh rup brah nau ntôn nây.

⁶ Păng lah đŏng ma gâp, “Hơi kon bunuyh, may saơ lĕ nau khân păng dôl ƀư, nây jêng lĕ nau ƀơ̆ ngăn ma ngih Israel hŏ ƀư tih ta aơ ƀư ăn ma Gâp ngai bơh ntŭk kloh ueh Gâp bơh? Ƀiălah may mra hôm saơ lĕ nau mhĭk toyh lơn đŏng!”

⁷ Jêh nây, Păng leo gâp tât mpông ndring ngih. Gâp mêt uănh saơ du trôm bluh ta mpêr.

⁸ Păng lah ma gâp: “Hơi kon bunuyh, kuar hom mpêr aơ. Tơlah gâp kuar jêh mpêr jêh ri saơ du mlâm mpông.”

⁹ Păng lah đŏng: “Lăp hom uănh lĕ nau mhĭk di nau tâm rmot ma khân păng ƀư ta aơ.”

¹⁰ Pônây gâp chuat lăp jêh ri uănh saơ, ri, jŭm mpêr geh kach nsêr ăp ntil rup brah mpa vơr jêh ri mpô mpa ƀơ̆ ƀơch, lĕ rngôch rup brah ngih Israel.

¹¹ Dâk panăp rup nây geh pơh jât kôranh bu ranh ngih Israel, tâm phung nây geh Y-Jasania, kon bu klâu Y-Saphan, ti ăp nơm djôt khăl gŭch ndơ ƀâu kah nhhŭk ndơ ƀâu kah n'hôl rlet klơ.

¹² Păng lah ma gâp: “Hơi kon bunuyh, may saơ lĕ nau phung bu ranh ngih Israel, ăp nuyh ƀư tâm ntŭk ngo klĕng, trôm jrô kach nsêr rup brah khân păng? Yorlah khân păng lah pô aơ: ‘Brah Yêhôva mâu saơ ôh he; Brah Yêhôva hŏ chalơi jêh bri aơ!’”

¹³ Păng lah đŏng ma gâp: “May mra saơ nau mhĭk toyh lơn đŏng khân păng hŏ ƀư jêh!”

¹⁴ Jêh nây Păng leo gâp tât ma ntŭk lăp mpông pêr mpeh pa lơ tâm ngih Brah Yêhôva; ri, ta nây gâp saơ phung bu ur gŭ nhĭm ma brah Y-Tamus.

¹⁵ Păng lah ma gâp: “Hơi kon bunuyh, mâp saơ lĕ? May mra hôm saơ lĕ nau mhĭk gâp tâm rmot toyh lơn đŏng!”

¹⁶ Jêh nây, Păng leo gâp lăp nkual nhuang ta trôm ngih Brah Yêhôva, ntŭk trong lăp ngih Brah Yêhôva, ta vah vang ndring jêh ri nơng ƀư brah. Gâp saơ geh tâm bar jât ma prăm nuyh, ndôn kơi mpeh ma ngih Brah Yêhôva, bi muh măt rle mpeh ma luh nar gŭ yơk mbah ma nar mpeh luh nar.

¹⁷ Păng lah ma gâp: “Hơi kon bunuyh, may saơ lĕ? Ngih Yuđa hŏ ƀư tih lĕ nau ƀơ̆ kơt nây khân păng ƀư tih kơp jêng du ntil nau jê̆ lê̆ lĕ? Khân păng ƀư nau djơh mhĭk bêng bri neh jêh ri nsônh nuih Gâp ji nuih đŏng lĕ bơh. Ri, khân păng sŏk n'gĭng tơm si ăn dăch trôm muh khân păng!

¹⁸ Yor nây yơh, Gâp mra ƀư ma khân păng tĭng nau ji nuih; măt Gâp mâu nhhuach ôh, mâu lĕ yô̆ klâng đŏng. Nđâp tơlah khân păng kuăl nter tăng tât ma tôr Gâp, Gâp mâu hôm ŭch n'gĭl iăt ôh.”