Êsêkiêl 7 - Nau Brah Ndu Ngơi 2023

Nau tât nglĕ dŭt hŏ tât jêh

¹ Nau Brah Yêhôva lah đŏng ma gâp:

² “Hơi kon bunuyh, Yêhôva Brah Ndu lah ma bri dak Israel pô aơ: ‘Nau tât nglĕ dŭt hŏ tât jêh! Puăn njônh bri aơ tât nglĕ dŭt jêh!

³ Aƀaơ aơ, nau tât nglĕ dŭt ma may. Gâp mra nkhŭt nau Gâp ji nuih ta may; Gâp mra phat dôih may tĭng nâm trong may hăn jêh ri mra tâm rmal may yor lĕ nau ƀơ̆ ƀơch may.

⁴ Măt Gâp uănh mâu nhhuach ôh ma may, Gâp mâu mra geh nau yô̆ ma may; ƀiălah Gâp mra mplơ̆ ma may tĭng nâm trong may hăn, jêh ri ntil nau ƀơ̆ ƀơch may mra gŭ ta nklang may. Rnôk aơ, khân may mra gĭt Gâp jêng Brah Yêhôva.’

⁵ Yêhôva Brah Ndu lah: ‘Nau mhĭk tât, dôl du nau mhĭk krit toyh tât!

⁶ Nau nglĕ dŭt hŏ tât, nau nglĕ dŭt hŏ tât jêh! Păng dâk tâm rdâng đah may. Ri păng tât jêh!

⁷ Hơi phung gŭ tâm n'gor bri, mrô hŏ nal ma may; rô̆ lĕ tât jêh, nar hŏ dăch jêh; mra geh nar nau uh ah ntrok nau troh hâk răm ta klơ yôk nâm.

⁸ Aơ hôm djê̆ lê̆ Gâp mra nkhŭt nau Gâp ji nuih ta may jêh ri ăn mpay nau Gâp nuih ma may. Gâp mra phat dôih may tĭng nâm nau gŭ ngao jêh ri mplơ̆ ma may ntil nau ƀơ̆ ƀơch may.

⁹ Măt Gâp uănh mâu nhhuach ôh ma may, mâu lĕ yô̆ ôh ma may. Gâp mplơ̆ ma may tĭng trong may hăn jêh ri lĕ nau ƀơ̆ ƀơch may mra gŭ ta nklang may. Rnôk nây, khân may mra gĭt Gâp yơh, Brah Yêhôva, jêng Nơm tâm rmal.

¹⁰ Aơ, nar nây! Păng tât jêh! Mrô nal lĕ dăp nal jêh, mâng jra hŏ luh kao jêh, nau sưr lĕ chăt nse jêh.

¹¹ Nau janh ƀai hŏ văch jêh nâm bu mâng nau mhĭk; mâu geh du huê bunuyh tâm phung khân păng hôm e klen, mâu hôm geh âk bunuyh, mâu hôm geh nau ndrŏng kuăng, mâu hôm geh nau khlay ta nklang khân păng.

¹² Mông hŏ tât jêh, nar lĕ dăch jêh! Nơm rvăt lơi ta răm, nơm tăch lơi ta rngot ôh, yorlah nau ji nuih dôl gŭ ma lĕ rngôch phung âk.

¹³ Yorlah nơm tăch nđâp lah păng hôm rêh mâu mra plơ̆ sŏk tay ma ndơ păng hŏ tăch jêh. Yorlah nau tâm saơ ma lĕ rngôch phung âk mâu mra tâm rgâl lơi ôh. Yorlah nau mhĭk khân păng, mâu geh du huê dơi prăp nau rêh păng ôh.

¹⁴ Nŭng hŏ uh, lĕ rngôch nau ndrăp da dê ƀiălah mâu geh nơm hăn ma nau tâm lơh yorlah nau Gâp ji nuih gŭ ta lĕ rngôch phung âk.

¹⁵ Mpeh padih geh tak đao, mpeh tâm trôm geh nau ji tưp jêh ri sa sât ji ngot! Mbu moh bunuyh gŭ tâm mir mra khĭt ma gưm đao; mbu nơm gŭ tâm trôm ƀon mra khĭt nau sa sât ji ngot jêh ri nau ji tưp ran sŏk rvăn.

¹⁶ Đơ bunuyh hôm gŭ rêh klen mra nchuăt klaih jêh ri gŭ ta ka lơ yôk nâm bu plŭk gŭ tâm rlŭng, lĕ rngôch bunuyh nhĭm vơl da dê ma nau djơh mhĭk khân păng nơm.

¹⁷ Lĕ rngôch ti hŏt rgănh da dê, lĕ rngôch kômâk rbăn huơi da dê nâm bu dak!

¹⁸ Khân păng mra vân rse bŭt ma bok ƀau, nau krit nkŭm khân păng; lĕ rngôch muh măt prêng da dê, lĕ rngôch bôk poih plưn da dê.

¹⁹ Khân păng mƀăr lơi prăk khân păng tâm trong toyh, mah khân păng jêng ndơ ƀơ̆ ƀơch. Prăk mâu lah mah ăt mâu dơi tâm rklaih ôh khân păng tâm nar Brah Yêhôva ji nuih. Khân păng mâu dơi ƀư ma khân păng bah ji ngot mâu hơm ndŭl yorlah nây jêng ndơ ƀư ăn ma khân păng tŭp tâm nau tih!

²⁰ Đơ ndơ nkrơ̆ săk ƀư ăn ma nau sưr khân păng jêh ri khân păng dŏng ndơ nây ƀư lĕ rup brah mhĭk jêh ri ndơ tâm rmot. Yor nây, Gâp hŏ ƀư ăn ndơ nây jêng ndơ ƀơ̆ ƀơch ma khân păng!

²¹ Gâp mra jao ndơ nây tâm ti phung bu năch jêng ndơ pit in tâm ban lĕ, ƀư ndơ ntŭng ăn ma bunuyh mhĭk tâm neh ntu, jêh ri khân păng mra ƀư ƀơ̆ păng.

²² Gâp mra rle muh măt ma khân păng, khân păng mra ƀư ƀơ̆ lơi ntŭk kloh ueh Gâp; phung ntŭng mra lăp ta nây jêh ri ƀư ƀơ̆ păng.

²³ Ndrăp hom rse rvăk! Yorlah neh bêng ma nau ƀư pling mham jêh ri ƀon bêng ma nau tih mhĭk.

²⁴ Gâp mra njŭn leo lĕ bunuyh mhĭk lơn tâm lĕ rngôch phung bu năch gay ŭch pit in ngih khân păng. Gâp mra ƀư ma nau sưr nơm ktang lơn bu mra nhhât; lơi; lĕ ntŭk kloh ueh khân păng mra ƀư ƀơ̆ lơi.

²⁵ Nau krit toyh dăch tât! Khân păng mra joi nau đăp mpăn ƀiălah mâu dơi geh ôh.

²⁶ Nau mhĭk ntop âk nau mhĭk, lư nau mhĭk thoi tay lư nau mhĭk. Khân may mra joi du nau tâm saơ tă bơh nơm mbơh lor ƀiălah nau ntrŭnh du bơh kôranh ƀư brah, jêh ri nau blau mĭn du bơh phung kôranh bu ranh.

²⁷ Hađăch mra nhĭm vơl, phung kôranh chiă uănh mra nsoh nau klach, ti phung ƀon lan tâm n'gor bri râm sâr da dê. Gâp mra ƀư ma khân păng tĭng nâm nau khân păng gŭ ngao; Gâp mra phat dôih khân păng tĭng nâm khân păng hŏ ƀư tih. Rnôk nây, khân păng mra gĭt ma Gâp jêng Brah Yêhôva.’”