Êsêkiêl 6 - Nau Brah Ndu Ngơi 2023

Nau mbơh lor tâm rdâng đah bri dak Israel

¹ Geh nau Brah Yêhôva lah ma gâp:

² “Hơi kon bunuyh, rle hom muh măt may rlet phung yôk Israel jêh ri mbơh lor tâm rdâng đah khân păng,

³ pô aơ: Hơi phung yôk Israel, iăt hom nau Yêhôva Brah Ndu ngơi! Brah Ndu ngơi ma phung nâm, ma phung gôl yôk, bong dak n'hor jêh ri ma phung rlŭng: Aơ Gâp, Gâp nơm yơh, mra ăn gưm đao tât tâm rmal khân may, ƀư rai ntŭk prêh khân may.

⁴ Nơng ƀư brah khân may bu mra ƀư rai, Nơng ƀư brah su ndơ ƀâu kah khân may bu mra dong nchah lơi; Gâp mra klŭp mƀăr phung khân may lĕ khĭt bu nkhĭt panăp rup brah khân may.

⁵ Gâp mra dơm săk jăn nuyh khĭt phung kon Israel panăp rup brah khân păng jêh ri srih mbrach nting khân may jŭm nơng khân may.

⁶ Ăp ntŭk khân may gŭ ƀon toyh bu ƀư rai, lĕ ntŭk prêh mra jêng rngol kŏ tât nơng ƀư brah khân may rai yot jêh ri rlâm lĕ, rup brah mbang nchah jêh ri mâu hôm geh đŏng ôh; Nơng ƀư brah su ndơ ƀâu kah bu ƀư rai lơi jêh ri lĕ rngôch kan khân may bu jut lĕ.

⁷ Phung khĭt mra cha lôt ta nklang khân may, jêh ri khân may mra gĭt Gâp jêng Brah Yêhôva!

⁸ Ƀiălah, Gâp mra om phung ƀaƀă, yorlah mra geh phung ƀaƀă hŏ klaih tă bơh chông đao dôl khân may du pru pra tâm lĕ bri dak.

⁹ Phung bunuyh hŏ dơi klaih jêh tâm khân may mra kah gĭt ma Gâp dôl gŭ tâm lĕ bri dak bu leo khân păng hăn tât, jêh ri khân păng gĭt nuih n'hâm Gâp ji ngăn yor nau khân păng văng tĭr hŏ ƀư ma khân păng chalơi Gâp jêh ri măt nau văng tir khân păng rle ma rup brah khân păng nơm. Rnôk nây, khân păng tâm rmot êng khân păng nơm ma lĕ nau mhĭk khân păng hŏ ƀư jêh ri ma lĕ nau kan ƀơ̆ ƀơch khân păng.

¹⁰ Khân păng mra gĭt Gâp jêng Brah Yêhôva, jêh ri nau mbơh lor Gâp ăn nau mhĭk tât mâu jêng dơm dam ôh.”

¹¹ Yêhôva Brah Ndu lah tâm ban pônây: “Tap hom ti, ntrâm jâng jêh ri ngơi: ‘Ơ yuh! Yorlah lĕ rngôch nau ƀai khư tâm rmot ngih Israel! Yorlah khân păng mra khĭt ma đao, nau sa sât ji ngot jêh ri nau ji tưp.’

¹² Bu nơm gŭ ngai mra khĭt ma nau ji tưp nkhĭt. Bu nơm gŭ dăch mra chôt khĭt tâm dâng chông đao. Nơm hôm klen gŭ rêh jêh ri nơm bu nchueng jŭm mra khĭt ma nau sa sât ji ngot. Kơt nây, Gâp mra ăn tât lĕ nau Gâp ji nuih ta khân păng.

¹³ Tơlah phung bu nkhĭt khân păng lâng khĭt ta nklang phung rup brah gŭ jŭm nơng ƀư brah, ta klơ yôk prêh, ta klơ lĕ rngôch n'gơn yôk, tâm dâng ăp tơm si ndrêh jêh ri tơm n'ho pŭm, ăp ntŭk khân păng nhhơr ndơ ƀâu kah ma lĕ rngôch rup brah khân păng, nôk nây khân may mra gĭt Gâp jêng Yêhôva.

¹⁴ Pônây, Gâp mra yơr ti tâm rdâng ma khân păng, jêh ri lam ntŭk khân păng gŭ, Gâp mra ăn bri dak jêng rngol, roh yot, ntơm bơh bri rdah tât ma ƀon Ribla. Nôk nây khân păng mra gĭt Gâp jêng Brah Yêhôva.”