Êsêkiêl 5 - Nau Brah Ndu Ngơi 2023

Nau tâm rmal ma ƀon Yêrusalem

¹ “Hơi kon bunuyh, sŏk hom du n'gâr đao dŭt hơr dŏng ƀư pêh poih têp poih bôk sŏk may jêh ri têp kang may. Pakơi nây, sŏk njing gay veh tâm pă brai sŏk.

² Tơlah lĕ lôch jêh lĕ nar nchueng ƀon, ăn may su lơi tâm ŭnh du kô̆ tâm pe sŏk nây ta nklang ƀon, jêh nây sŏk du kô̆ tâm pe êng ăn may dŏng đao lơh păng ta jŭm ƀon. Jêh ri nglĕ dŭt nây dŏng du kô̆ tâm pe ăn may ntô̆ tâm sial yorlah Gâp nơm ro mra tŏk đao tĭng pakơi.

³ Tâm lĕ rngôch brai sŏk hôm e, ăn may sŏk du djê̆ brai sŏk kât ta ntôr ao jâr may.

⁴ May sŏk đŏng bar pe brai sŏk nây mƀăr lơi tâm ŭnh jêh ri ăn ŭnh sa. Tă bơh nây, ŭnh mra trêng tât ma lĕ rngôch ngih Israel.”

⁵ Yêhôva Brah Ndu lah: “Aơ jêng ƀon Yêrusalem; Gâp hŏ ndâk jêh păng ta nklang lĕ ntil mpôl bunuyh jêh ri lĕ bri dak gŭ jŭm păng.

⁶ Ƀiălah păng tâm rdâng đah nau vay ƀư bơh Gâp, ƀư nau ƀai rlau lơn ma lĕ bri dak êng, păng dun nau vay dăp Gâp rlau lơn ma bri dak gŭ jŭm păng yorlah khân păng chalơi nau vay ƀư bơh Gâp jêh ri mâu tĭng nau vay dăp Gâp ôh.

⁷ Yor ri, Yêhôva Brah Ndu lah: ‘Yorlah khân may dăng ko lơn ma phung ntil mpôl gŭ jŭm khân may, mâu chuat ôh tĭng nau vay dăp Gâp, mâu lĕ ŭch djôt prăp nau vay ƀư bơh Gâp; rlau ma nĕ nau vay ƀư phung ntil mpôl bunuyh gŭ jŭm khân may, khân may ăt mâu dơi tĭng lĕ.’

⁸ Yor nây, Yêhôva Brah Ndu lah: ‘Aơ, Gâp, Gâp nơm yơh mra tâm rdâng ma may jêh ri Gâp mra ăn tât nau phat dôih ta nklang may gay ma lĕ ndŭl mpôl bunuyh saơ da dê.

⁹ Yorlah lĕ rngôch nau tâm ƀơ̆ bơch may, Gâp mra ƀư ma may nau Gâp ê hŏ mâp ƀư ôh, jêh ri du nar pakơi taơ mâu mra ƀư đŏng ôh.

¹⁰ Yor ri, tâm nklang may, mbơ̆ mra sa puăch kon, kon mra sa puăch mbơ̆. Gâp mra ƀư ăn nau phat dôih tât ta may, jêh ri Gâp mra ƀư lĕ rngôch phung bunuyh may hôm e klen ăn păng nchah rai pru pra tĭng ăp mpeh sial.’”

¹¹ Yêhôva Brah Ndu lah: “N'hêl nê̆ tĭng nâm Gâp gŭ rêh mro mrăng, yor may hŏ ƀư ƀơ̆ ƀơch jêh ntŭk kloh ueh Gâp tă bơh lĕ nau mhĭk Gâp tâm rmot yor ri Gâp mra ƀư rai may mâu mra nhhuach. Măt Gâp mâu mra yô̆ may đŏng ôh.

¹² Du kô̆ tâm pe tâm phung ƀon lan may mra khĭt ma nau ji tưp, mra djoh jêh ma nau ât ji ngot ta nklang may; du kô̆ tâm pe mra khĭt ma đao gŭ jŭm may; bi du kô̆ tâm pe đŏng Gâp mra ƀư nchah rai pru pra tĭng ăp mpeh sial jêh ri Gâp tŏk đao hăn tĭng khân păng.

¹³ Nau Gâp ji nuih mra dơi lôch jêh ri nau Gâp ji nuih ma khân păng kŏ tât mpay jêh ri aih jêh. Tơlah Gâp hŏ ƀư lĕ lôch jêh nau Gâp nuih ma khân păng pôri khân păng mra gĭt yor nuih n'hâm duh nđơr Gâp nơm yơh, Brah Yêhôva, hŏ lah jêh ma khân păng.

¹⁴ Gâp mra njêng may ntŭk rngol jêh ri plơ̆ jêng nau bêk prêng tâm lĕ bri dak văr jŭm may jêh ri tanăp măt phung prot rgăn.

¹⁵ Tơlah Gâp hao ji nuih phat dôih may, nkhŭt nau ji nuih nduyh nkra may, pôri may mra jêng bêk prêng jêh ri nau bu mưch rmot, nau mbơh lor jêh ri nau krit toyh ăn ma bri dak gŭ jŭm may. Gâp yơh jêng Brah Yêhôva lah pônây!

¹⁶ Gâp mra pănh tâm khân may ma lĕ chiông hăr kăch jêng nau sa sât ji ngot gay ƀư rai khân may; Gâp mra pănh gay ƀư rai khân may. Gâp mra ntop ăn nau sât ji ngot ma khân may jêh ri mâu mra ăn ndơ sông sa ma khân may.

¹⁷ Gâp mra nkhŭt nau sa sât ji ngot tât ma khân may jêh ri njuăl mpô mpa bri sa hêk phung kon khân may. Nau ji tưp jêh ri nau pling mham mra tât ma ta nklang khân may, jêh ri Gâp mra dŏng tak đao tât đŏng ma khân may. Gâp yơh jêng Brah Yêhôva hŏ lah jêh pônây!”