Êsêkiêl 48 - Nau Brah Ndu Ngơi 2023

Tâm pă bri neh mhe

¹ Aơ jêng amoh phung ndŭl mpôl: Kô̆ neh ntơm bơh mpeh pa lơ bơh Hêtlôn tât ma trong lăp Hamat, kŏ tât ma Hasar-Ênan (jêng n'har bri Damas đah Hamat), ntơm bơh mpeh luh nar tât mpeh nhâp nar, jêng kô̆ neh ma phung Dan.

² Mbot đah neh phung Dan, tă mpeh luh nar tât mpeh nhâp nar, jêng kô̆ neh ma phung Aser.

³ Mbot đah neh phung Aser, tă mpeh luh nar tât nhâp nar, mra jêng kô̆ neh ma phung Naptali.

⁴ Mbot đah neh phung Naptali, tă mpeh luh nar tât ma nhâp nar, mra jêng kô̆ neh ma phung Manasê.

⁵ Mbot đah neh Manasê tă mpeh luh nar tât mpeh nhâp nar, mra jêng kô̆ neh ma phung Êphraim.

⁶ Mbot đah neh Êphraim, tă mpeh luh nar tât nhâp nar, mra jêng kô̆ neh ma phung Ruben.

⁷ Mbot đah neh phung Ruben, tă mpeh luh nar tât mpeh luh nar, mra jêng kô̆ neh ma phung Yuđa.

⁸ Mbot đah neh phung Yuđa, tă mpeh luh nar tât mpeh nhâp nar, mra jêng kô̆ neh khân may mra prăp êng. Kô̆ neh nây mra jêng du rmưn bar rbăn prăm rhiăng met nau rkăng jêh ri nau jong tă mpeh luh nar let ma nhâp nar tâm ban kô̆ ma phung ntil mpôl. Ntŭk kloh ueh mra gŭ ta nklang kô̆ neh nây.

⁹ Kô̆ neh khân may mra nhhơr ma Brah Yêhôva geh nau jong du jât ma bar rbăn prăm rhiăng met jêh ri nau rkăng prăm rbăn met.

¹⁰ Kô̆ neh kloh ueh mra prăp ma phung kôranh ƀư brah, geh du rmưn bar rbăn prăm rhiăng met nau jong, rlet mpeh pa lơ, prăm rbăn met nau jong mpeh nhâp nar, prăm rbăn met mpeh luh nar, jêh ri du rmưn bar rbăn prăm rhiăng met nau jong rlet mpeh pa dâng. Ntŭk kloh ueh Brah Yêhôva mra gŭ ta nklang.

¹¹ Kô̆ neh nây mra prăp ma phung kôranh ƀư brah prăp ăn jêng kloh ueh, nây jêng ăn ma phung kon bu klâu Y-Sadôk jêng phung pah kan tâm ntŭk kloh ueh Gâp; khân păng mâu nkhah du nâm bu phung Lêvi tâm rnôk phung kon Israel nkhah du jêh.

¹² Khân păng mra geh du kô̆ êng lơn luh tă bơh kô̆ neh kloh ueh, jêng ntŭk dŭt kloh ueh mbot đah neh phung Lêvi.

¹³ Phung Lêvi mra nchroh kô̆ njŏ tĭng neh phung kôranh ƀư brah, geh du rmưn bar rbăn prăm rhiăng met nau jong, jêh ri prăm rbăn met nau rkăng. Lĕ rngôch nau jong jêng du rmưn bar rbăn prăm rhiăng met, jêh ri nau rkăng jêng prăm rbăn met.

¹⁴ Kô̆ neh nây khân păng mâu dơi tăch, mâu lah tâm rgâl ôh, mâu dơi ăn play bôk rah tă bơh neh nây ma bu êng yor păng lĕ prăp jêng kloh ăn ma Brah Yêhôva.

¹⁵ Kô̆ hôm e, bar rbăn prăm rhiăng met nau rkăng, du rmưn bar rbăn prăm rhiăng met nau jong, neh dŏng nsum ăn ma ƀon toyh, gay ƀư ngih gŭ jêh ri ndrêch gơ̆. Ƀon toyh mra gŭ ta nklang.

¹⁶ Aơ jêng nau veh ƀon păng: Mpeh pa lơ bar rbăn bar rhiăng prăm jât met; mpeh pa dâng bar rbăn bar rhiăng prăm jât met, mpeh luh nar bar rbăn bar rhiăng prăm jât met, mpeh nhâp nar bar rbăn bar rhiăng prăm jât met.

¹⁷ Ndrêch gơ̆ ƀon toyh, mpeh pa lơ mra geh du rhiăng bar jât prăm met; mpeh pa dâng geh du rhiăng bar jât prăm met; mpeh luh nar du rhiăng bar jât prăm met; jêh ri mpeh luh nar du rhiăng bar jât prăm met.

¹⁸ Bi ma neh hôm e njŏ tĭng kô̆ neh kloh ueh, mra jêng prăm rhiăng met mpeh luh nar jêh ri prăm rbăn met mpeh nhâp nar, nây jêng nau jong kô̆ neh kloh ueh nây, mra ƀư ntŭk ăn kao play dŏng ƀư ndơ sông sa ma phung pah kan tâm ƀon.

¹⁹ Phung pah kan tâm ƀon toyh jêng lĕ rngôch ndŭl mpôl Israel mra pŏk rlơk kô̆ neh nây.

²⁰ Lĕ rngôch kô̆ neh prăp êng nây glom geh du rmưn bar rbăn prăm rhiăng met nau jong, du rmưn bar rbăn prăm rhiăng met nau rkăng; khân may mra nhhơr kô̆ neh kloh ueh nây ƀư jêng drăp ndơ ma ƀon toyh.

²¹ Kô̆ neh hôm e ntŭk bar đah neh kloh ueh jêh ri neh ƀon toyh mra jêng ndơ hađăch. Păng ling jong mpeh luh nar bơh du rmưn bar rbăn prăm rhiăng met kô̆ neh kloh ueh kŏ tât n'har mpeh luh nar, jêh ri mpeh nhâp nar, bơh du rmưn bar rbăn prăm rhiăng met kŏ tât n'har mpeh nhâp nar, njŏ tĭng lĕ kô̆ neh lĕ ndŭl mpôl. Păng mra jêng ndơ hađăch; bi ma kô̆ neh kloh ueh ndrel ntŭk kloh ueh ngih brah mra gŭ ta nklang.

²² Pônây, n'hŭch kô̆ drăp ndơn phung Lêvi jêh ri neh ƀon toyh pôri kô̆ neh hađăch mra gŭ ta nklang neh Yuđa jêh ri neh Benjamin.

²³ Bi ma lĕ phung ndŭl mpôl hôm e: Bơh ma luh nar tât nhâp nar, jêng kô̆ neh prăp ma phung Benjamin.

²⁴ Mbot đah neh Benjamin, ntơm bơh luh nar tât nhâp nar, jêng kô̆ prăp ăn ma phung Simêôn.

²⁵ Mbot đah neh Simêôn, ntơm bơh luh nar tât nhâp nar, jêng kô̆ neh prăp ma phung Isakar;

²⁶ Mbot đah neh Isakar, ntơh bơh luh nar tât nhâp nar, jêng kô̆ neh prăp ăn ma phung Sabulôn.

²⁷ Mbot đah neh Sabulôn, ntơm bơh luh nar tât nhâp nar, jêng kô̆ neh prăp ăn ma phung Gat.

²⁸ Jêh ri n'har neh mpeh pa dâng phung Gat mra chor jong ntơm bơh pa dâng, ntơm bơh Tamar tât n'hong dak Mêriba ta ntŭk Kadês, tât Dak N'hor Êjipt kŏ tât Dak Mƀŭt Toyh.

²⁹ Aơ jêng neh khân may tâm nchroh gay tâm pă ăn phung ndŭl mpôl Israel ƀư jêng drăp ndơn jêh ri jêng kô̆ neh khân păng, Kôranh Brah Yêhôva lah pônây.

³⁰ Aơ jêng lĕ trong luh ƀon toyh: Bi mpeh pa lơ, veh geh bar rbăn bar rhiăng prăm jât met.

³¹ Lĕ mpông ƀon mra ntơ amoh tĭng amoh phung mpôl băl Israel. Pe mpông pêr mpeh pa lơ: mpông pêr Ruben, mpông pêr Yuđa, jêh ri mpông pêr Lêvi.

³² Mpeh luh nar veh geh bar rbăn bar rhiăng prăm jât met, jêh ri geh pe mpông pêr: mpông pêr Yôsep, mpông pêr Benjamin, jêh ri mpông pêr Dan.

³³ Mpeh pa dâng veh geh bar rbăn bar rhiăng prăm jât met, jêh ri geh pe mpông pêr: mpông pêr Simêôn, mpông pêr Isakar, mpông pêr Sabulôn.

³⁴ Mpeh nhâp nar veh geh bar rbăn bar rhiăng prăm jât met, jêh ri geh pe mpông pêr: mpông pêr Gat, mpông pêr Aser, jêh ri mpông pêr Naptali.

³⁵ Ndăch jŭm ƀon toyh mra geh sĭn rbăn met, jêh ri ntơm bơh aƀaơ tât ô klak, amoh ƀon mra jêng: “Brah Yêhôva gŭ ta nây!”